ఒక్కసారి టెస్ట్ డ్రైవ్ చేస్తే చాలు.. ఈ కారే కావాలని ఫిక్స్ అయిపోతారు.. దీనిలో ఏదో మ్యాజిక్ ఉంది మావ

ఈ రోజుల్లో కారు కొనడం అంటే కేవలం ప్రయాణం కోసం మాత్రమే కాదు.. స్టైల్, స్టేటస్, టెక్నాలజీ అన్నీ కలిపి ఓ ప్యాకేజ్‎లా ఉండాలి.. అలాంటి ఎక్స్‌పెక్టేషన్స్ మధ్య, తక్కువ బడ్జెట్‌లోనే ప్రీమియం ఫీల్ ఇచ్చే కార్లు ఉంటేనే మధ్యతరగతి కస్టమర్లు వెంటనే ఆకర్షితులవుతున్నారు. ఇదే ట్రెండ్‌ను సరిగ్గా అర్థం చేసుకున్న కియా మోటార్స్ తన కియా సోనెట్‎తో మార్కెట్లో నిజంగానే సునామీ సృష్టిస్తోంది.

భారత ఆటోమొబైల్ రంగంలో కియా మోటార్స్ తన సత్తాను మరోసారి చాటుకుంది. ముఖ్యంగా మధ్యతరగతి ప్రజల కలల కారుగా మారిన కియా సోనెట్ (Kia Sonet) అమ్మకాల్లో సునామీ సృష్టిస్తోంది. తాజాగా ముగిసిన ఆర్థిక సంవత్సరం 2026 (FY2026) గణాంకాలను పరిశీలిస్తే, ఈ కాంపాక్ట్ ఎస్‌యూవీ కియా సంస్థలోనే నంబర్ 1 స్థానాన్ని కైవసం చేసుకుంది. కేవలం రూ.8.32 లక్షల ప్రారంభ ధరతో లభిస్తున్న ఈ కారును గత 12 నెలల్లో ఏకంగా 1.15 లక్షల మంది కొనుగోలు చేయడం విశేషం.

భారతీయ మార్కెట్లో కియా సోనెట్ తన స్థానాన్ని సుస్థిరం చేసుకుంది. ఆర్థిక సంవత్సరం 2026లో ఈ మోడల్ కు మొత్తం 1,14,142 మంది కొత్త కస్టమర్లు లభించారు. గతేడాది (FY2025) ఇదే సమయంలో 99,805 యూనిట్లు అమ్ముడవగా, ఈసారి 14 శాతం వృద్ధిని నమోదు చేసింది. కియా సంస్థ అమ్మిన మొత్తం కార్లలో సోనెట్ వాటానే అధికంగా ఉండటం విశేషం. స్టైలిష్ లుక్, అత్యాధునిక ఫీచర్లు, నమ్మకమైన ఇంజన్ ఆప్షన్లు ఉండటమే ఈ భారీ విజయానికి కారణం.

కేవలం సోనెట్ మాత్రమే కాకుండా, కియాకు చెందిన ఇతర మోడళ్లు కూడా అదరగొడుతున్నాయి.
కియా సెల్టోస్: అమ్మకాల్లో రెండో స్థానంలో నిలిచింది. ఈ ఆర్థిక సంవత్సరంలో 15 శాతం వృద్ధితో మొత్తం 83,747 యూనిట్లు అమ్ముడయ్యాయి.
కియా క్యారెన్స్: ఫ్యామిలీ మ్యాన్ ఫేవరెట్ కారుగా మారిన క్యారెన్స్ 19 శాతం వృద్ధితో 76,837 యూనిట్ల అమ్మకాలను నమోదు చేసింది.
అయితే, కియా సైరోస్ (Syros) అమ్మకాలు మాత్రం 16 శాతం క్షీణించి 13,433 యూనిట్లకు పరిమితమయ్యాయి.

లగ్జరీ, ఎలక్ట్రిక్ విభాగంలో కియాకు మిశ్రమ ఫలితాలు ఎదురయ్యాయి. కియా కార్నివాల్ అమ్మకాలు 36 శాతం తగ్గి కేవలం 874 యూనిట్లకు పరిమితం కాగా, అత్యంత ఖరీదైన EV9 మోడల్ కేవలం 2 యూనిట్లు మాత్రమే అమ్ముడయ్యాయి. మరీ ముఖ్యంగా కియా EV6 మోడల్ ను ఈ ఏడాది ఒక్కరు కూడా కొనకపోవడం సంస్థను ఆశ్చర్యపరిచింది. ఓవరాల్‌గా చూస్తే కియా ఇండియా ఈ ఆర్థిక సంవత్సరంలో మొత్తం 2,89,035 కార్లను విక్రయించి తన పట్టును నిరూపించుకుంది.

ఇంజన్ పవర్
కియా సోనెట్ తన కస్టమర్ల కోసం మూడు రకాల ఇంజన్ ఆప్షన్లను అందిస్తోంది.
1.0 లీటర్ టర్బో పెట్రోల్: ఇది 120bhp పవర్, 172Nm టార్క్ ఇస్తుంది. స్పీడ్ ఇష్టపడే వారికి ఇది బెస్ట్.
1.2 లీటర్ నేచురల్లీ ఆస్పిరేటెడ్ పెట్రోల్: ఇది 83bhp పవర్, 115Nm టార్క్ జనరేట్ చేస్తుంది. సిటీ డ్రైవింగ్ కు ఇది అనుకూలం.
1.5 లీటర్ డీజిల్ ఇంజన్: మైలేజీ కోరుకునే వారి కోసం 116bhp పవర్, 250Nm టార్క్ ఇచ్చే ఈ ఇంజన్ అందుబాటులో ఉంది.

రూ.8.32 లక్షల ప్రారంభ ధర (ఎక్స్-షోరూమ్) ఉన్న సోనెట్ టాప్ మోడల్ ధర రూ. 14.17 లక్షల వరకు ఉంటుంది. ఈ 5-సీటర్ కారులో 10.25 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ డ్రైవర్ డిస్‌ప్లే, ఆటోమేటిక్ క్లైమేట్ కంట్రోల్, సన్‌రూఫ్, కనెక్టెడ్ కార్ టెక్నాలజీ వంటి ప్రీమియం ఫీచర్లు ఉన్నాయి. మార్కెట్లో దీనికి టాటా నెక్సాన్, మారుతి బ్రెజ్జా, హ్యుందాయ్ వెన్యూ వంటి దిగ్గజ కార్లతో గట్టి పోటీ ఉన్నప్పటికీ, సోనెట్ తనదైన ముద్ర వేస్తోంది.

రాబోయే రోజుల్లో కియా మరిన్ని ఎలక్ట్రిక్ వేరియంట్లను (సెల్టోస్ EV, సైరోస్ EV) లాంచ్ చేసేందుకు సిద్ధమవుతోంది. ప్రస్తుతం ఉన్న డిమాండ్ ను బట్టి చూస్తే, 2027 నాటికి కియా సోనెట్ అమ్మకాలు మరింత పెరిగే అవకాశం ఉందని మార్కెట్ నిపుణులు విశ్లేషిస్తున్నారు. ముఖ్యంగా యువతను ఆకర్షించే విధంగా డిజైన్ మార్పులు చేయడం కియాకు బాగా కలిసివస్తోంది.