లైసెన్స్ అక్కర్లేదు.. రిజిస్ట్రేషన్ అస్సలే వద్దు.. ఛార్జింగ్ అయిపోతే తొక్కేయడమే.. క్రేజీ బైక్ గురూ!

భారతీయ ఇంధన మార్కెట్లో పెట్రోల్ ధరలు భారీగా పెరిగిపోతుండడంతో సామాన్య ప్రజలు ప్రత్యామ్నాయ వాహనాల వైపు చూస్తున్నారు. ఈ క్రమంలో ప్రతి చిన్న అవసరానికి సైకిల్ తొక్కడం కష్టంగా అనిపిస్తుంది.. అలాగని లక్ష రూపాయలు పెట్టి పెద్ద ఎలక్ట్రిక్ స్కూటర్లు కొనడం అందరికీ సాధ్యం కాదు. ఇలాంటి వారి కోసమే సరిగ్గా సైకిల్‌కు పైన, స్కూటర్‌కు కింద ఉండేలా ఒక సరికొత్త ఇంటర్మీడియట్ ఈవీ టూవీలర్‌ను కోమాకి కంపెనీ పరిచయం చేసింది. అదే కోమాకి XR1 (Komaki XR1) ఎలక్ట్రిక్ మొపెడ్. నగరాల్లో, గ్రామాల్లో తక్కువ దూరాలు ప్రయాణించడానికి ఇది అత్యంత అనుకూలమైన వాహనంగా పేరు తెచ్చుకుంది.

ధనుష్ రఘువరన్ B.Tech స్టైల్ డిజైన్
ఈ సరికొత్త ఎలక్ట్రిక్ మోపెడ్ లుక్ చూడటానికి మనకు ప్రముఖ హీరో ధనుష్ నటించిన రఘువరన్ B.Tech సినిమాలో ఆయన ఉపయోగించే పాతకాలపు రాయల్ ఎన్‌ఫీల్డ్ మోఫా (Enfield Mofa) మోటర్ సైకిల్‌ను గుర్తు చేస్తుంది. అయితే ఆ మోఫా బైక్ పెట్రోల్‌తో నడిచేది.. కానీ మన ఈ ఆధునిక కోమాకి XR1 మొపెడ్ పూర్తిగా బ్యాటరీ విద్యుత్ శక్తితో నడుస్తుంది. దీనివల్ల ప్రయాణ ఖర్చులు చాలా వరకు తగ్గిపోతాయి. ఒకవేళ ప్రయాణంలో దారి మధ్యలో ఎక్కడైనా బ్యాటరీ ఛార్జింగ్ అయిపోతే.. ఇందులో పెడల్స్ (Pedals) కూడా ఇచ్చారు కాబట్టి హ్యాపీగా సైకిల్‌లా తొక్కుకుంటూ సురక్షితంగా ఇంటికి చేరుకోవచ్చు.

లైసెన్స్ లేదు.. చలాన్ల గొడవే లేదు
ఈ కోమాకి XR1 ఎలక్ట్రిక్ మోపెడ్ అతిపెద్ద ప్రయోజనం ఏంటంటే.. దీనిని రోడ్డుపై నడపడానికి ఎలాంటి డ్రైవింగ్ లైసెన్స్ (Driving License) అవసరం లేదు. అలాగే దీనిని ఆర్టీఓ (RTO) ఆఫీసులో నంబర్ ప్లేట్ కోసం రిజిస్ట్రేషన్ చేయించాల్సిన అవసరం కూడా లేదు. ఎందుకంటే ఇది తక్కువ వేగంతో ప్రయాణించే లో-స్పీడ్ ఎలక్ట్రిక్ వాహనాల కేటగిరీ కిందకు వస్తుంది. దీనివల్ల స్కూల్, కాలేజీలకు వెళ్లే విద్యార్థులు, ట్రాఫిక్ రూల్స్, చలాన్ల టెన్షన్ లేకుండా ప్రశాంతంగా దీనిని వాడుకోవచ్చు. ఇళ్లలోని మహిళలు, వృద్ధులకు కూడా ఇది ఎంతగానో ఉపయోగపడుతుంది.

ఒక్క ఛార్జ్‌తో 80 కిలోమీటర్ల రేంజ్
సాంకేతిక సామర్థ్యం పరంగా చూస్తే.. కోమాకి XR1 మొపెడ్‌లోని బ్యాటరీని ఒక్కసారి పూర్తిగా ఛార్జ్ చేస్తే సుమారు 70 కిలోమీటర్ల నుంచి 80 కిలోమీటర్ల వరకు నాన్‌స్టాప్‌గా ప్రయాణించవచ్చు. ఇందులో అమర్చిన ఎలక్ట్రిక్ మోటార్ గరిష్టంగా గంటకు 25 కిలోమీటర్ల వేగంతో (Top Speed) వెళ్లే సామర్థ్యాన్ని కలిగి ఉంటుంది. నగరాల లోపల ప్రయాణించడానికి ఈ స్పీడ్ చాలా సేఫ్ అండ్ పర్ఫెక్ట్. దీని బ్యాటరీ పూర్తిగా ఛార్జ్ కావడానికి కేవలం 3 నుండి 4 గంటల సమయం మాత్రమే పడుతుంది. ఇందుకు అయ్యే విద్యుత్ ఖర్చు కేవలం రూ.8 నుంచి రూ.10లు మాత్రమే కావడం విశేషం.

ప్రాక్టికల్ ఫీచర్లు, లగ్జరీ కుషన్ సీట్లు
కోమాకి సంస్థ ఈ చిన్న మోపెడ్‌లో కూడా అన్ని రకాల అవసరమైన ఫీచర్లను అందించింది. రాత్రి వేళల్లో సురక్షితంగా ప్రయాణించడానికి బ్రైట్ హెడ్‌లైట్లు, టెయిల్ లైట్లు, టర్న్ ఇండికేటర్లను అమర్చారు. ప్రయాణం ఎగుడుదిగుడు రోడ్లపై కూడా సాఫీగా సాగడానికి మంచి సస్పెన్షన్ సిస్టమ్ ఉంది. నిత్యం మార్కెట్ నుంచి కూరగాయలు లేదా సామాన్లు తెచ్చుకోవడానికి వీలుగా ముందు భాగంలో ఒక పెద్ద బుట్టను ఉంచారు. అలాగే ఇద్దరు వ్యక్తులు ఎంతో సౌకర్యవంతంగా కూర్చోవడానికి వీలుగా కేబిన్ లోపల రెండు విడివిడి సాఫ్ట్ కుషన్ సీట్లను కంపెనీ డిజైన్ చేసింది.

ధరల వివరాలు
ప్రస్తుతం భారత మార్కెట్లో ఈ కోమాకి XR1 ఎలక్ట్రిక్ మొపెడ్ ప్రారంభ ఎక్స్-షోరూమ్ ధర రూ.34,499 గా ఉంది. ఇది గత ఏడాది జూన్‌లో విడుదలైనప్పుడు కేవలం రూ.29,999 ధరకే అందుబాటులో ఉండేది.. అయితే పెరిగిన డిమాండ్ కారణంగా కంపెనీ ఒక ఏడాదిలోనే దీని ధరను రూ.4,500 వరకు పెంచింది. తక్కువ బడ్జెట్‌లో ఎలాంటి మెయింటెనెన్స్ ఖర్చులు లేకుండా, రోడూ ఆఫీసులకు లేదా మార్కెట్‌కు వెళ్లాలనుకునే వారికి, స్కూల్ పిల్లలకు ఈ కోమాకి XR1 ఎలక్ట్రిక్ మోపెడ్ అత్యంత తెలివైన, బెస్ట్ ఆప్షన్ అని నిపుణులు అభిప్రాయపడుతున్నారు.