నాన్నలు వాడిన వండర్ బైక్.. కాలగర్భంలో కలిసిపోనుందా? మార్చి నెలలో అమ్ముడైనవి కేవలం 5 బైకులే

ఒకప్పుడు ఇంట్లో కొత్త బైక్ కొంటే... నాన్న గర్వంగా కీలు తిప్పి బయటకు తీసుకొచ్చేది అదే. పిల్లలు వెనుక కూర్చుని షికార్లకు వెళ్లిన మొదటి జ్ఞాపకం కూడా అదే. ఎక్కువ ఖర్చు లేకుండా, నమ్మకంగా రోజూ ఆఫీస్‌కు తీసుకెళ్లే కుటుంబ సభ్యుడిలా ఉండేది ఆ బైక్. కానీ ఇప్పుడు కాలం మారింది... కొత్త మోడల్స్, కొత్త స్టైల్ మధ్య ఆ పాత నేస్తం నెమ్మదిగా కనుమరుగవుతోంది. అదే టీవీఎస్ స్టార్ సిటీ ప్లస్( TVS Star City Plus) ఒకప్పుడు లక్షల మంది హృదయాలను గెలిచిన బైక్, ఇప్పుడు కేవలం జ్ఞాపకాలలో మిగిలిపోతుందా అనే స్థితికి చేరుకుంది.

ఒకప్పుడు మధ్యతరగతి తండ్రుల నమ్మకానికి చిరునామాగా నిలిచిన వాహనం. తక్కువ ధర, ఎక్కువ మైలేజీ.. ఈ రెండు సూత్రాలతో లక్షలాది మంది భారతీయుల మనసు గెలుచుకున్న ఆ బైక్ ఇప్పుడు కనుమరుగయ్యే స్థితికి చేరుకుంది. ఒకప్పుడు నెలకు వేల సంఖ్యలో అమ్ముడైన ఈ బైక్, ఇప్పుడు కేవలం సింగిల్ డిజిట్ అమ్మకాలకు పరిమితం కావడం ఆటోమొబైల్ రంగాన్ని విస్మయానికి గురిచేస్తోంది. దీనికి సంబంధించిన షాకింగ్ అమ్మకాల లెక్కలు ఇప్పుడు బయటకు వచ్చాయి.

టీవీఎస్ స్టార్ సిటీ ప్లస్ అమ్మకాల గణాంకాలు చూస్తుంటే ఎవరైనా ఆశ్చర్యపోవాల్సిందే. గతేడాది అంటే 2025 మార్చి నెలలో టీవీఎస్ సంస్థ 2,855 స్టార్ సిటీ ప్లస్ బైకులను విక్రయించింది. కానీ, సరిగ్గా ఏడాది తిరిగేసరికి అంటే 2026 మార్చి నెలలో ఈ సంఖ్య కేవలం 5కు పడిపోయింది. అంటే ఏకంగా 99.82 శాతం అమ్మకాలు పడిపోయాయి. టీవీఎస్ చరిత్రలో ఒక పాపులర్ మోడల్‌కు ఈ స్థాయి పతనం రావడం ఇదే మొదటిసారి. ఫిబ్రవరి 2026లో కేవలం 3 బైకులు మాత్రమే అమ్ముడవగా, మార్చిలో మరో రెండు అదనంగా అమ్ముడై 5కి చేరుకుంది. పర్సంటేజ్ లెక్కన 66 శాతం పెరిగినట్లు అనిపించినా, అంకెల్లో చూస్తే ఇది చాలా ఘోరమైన పరిస్థితి.

ప్రస్తుతం వినిపిస్తున్న సమాచారం ప్రకారం, టీవీఎస్ సంస్థ ఇప్పటికే స్టార్ సిటీ ప్లస్ ఉత్పత్తిని నిలిపివేసింది. అయితే అధికారిక వెబ్‌సైట్‌లో ఇంకా ఈ బైక్ జాబితాలో ఉండటానికి కారణం డీలర్ల వద్ద ఉన్న పాత స్టాక్ మాత్రమే. షోరూమ్‌లలో మిగిలిపోయిన బైకులను విక్రయించడానికి కంపెనీ ప్రయత్నిస్తోంది. ఆ స్టాక్ కూడా అయిపోగానే, టీవీఎస్ ఈ బైక్‌ను అధికారికంగా మార్కెట్ నుంచి తొలగించే అవకాశం ఉంది. కొత్త మోడల్స్, మరీ ముఖ్యంగా స్పోర్టీ లుక్ ఉన్న బైకుల రాకతో ఈ క్లాసిక్ మోడల్ తన ప్రభావాన్ని కోల్పోయింది.

టీవీఎస్ స్టార్ సిరీస్ బైకులు భారతీయ మార్కెట్లో ఒకప్పుడు ప్రభంజనం సృష్టించాయి. ఇప్పటివరకు దాదాపు 30 లక్షల మందికి పైగా వినియోగదారులు స్టార్ సిరీస్ బైకులను కొనుగోలు చేశారు. సాధారణ స్టార్ సిటీకి అప్‌డేటెడ్ వెర్షన్‌గా వచ్చిన స్టార్ సిటీ ప్లస్ 110 సీసీ ఇంజిన్‌తో నమ్మకమైన పనితీరును అందించేది. సుమారు రూ.71,600 (ఎక్స్-షోరూమ్ తమిళనాడు) ప్రారంభ ధరతో లభించే ఈ బైక్, లీటరుకు భారీ మైలేజీని ఇచ్చేది. తక్కువ మెయింటెనెన్స్ ఉండటం వల్ల మధ్యతరగతి కుటుంబాలకు ఇది మొదటి ప్రాధాన్యతగా ఉండేది.

కాలం మారుతున్న కొద్దీ కస్టమర్ల అభిరుచులు మారాయి. నేటి యువత 110 సీసీ సెగ్మెంట్‌లో కూడా అత్యాధునిక ఫీచర్లు, డిజిటల్ మీటర్లు, స్మార్ట్ కనెక్టివిటీ మరియు స్పోర్టీ డిజైన్లను కోరుకుంటున్నారు. టీవీఎస్ సంస్థ నుంచే వచ్చిన రైడర్ 125 (TVS Raider) వంటి బైకులు విపరీతమైన ఆదరణ పొందడం వల్ల స్టార్ సిటీ ప్లస్ వంటి ఓల్డ్ స్కూల్ మోడల్స్ వెనుకబడిపోయాయి. అలాగే హోండా షైన్, హీరో స్ప్లెండర్ వంటి మోడల్స్ నుండి ఎదురైన తీవ్రమైన పోటీని తట్టుకోవడంలో స్టార్ సిటీ ప్లస్ విఫలమైందని విశ్లేషకులు భావిస్తున్నారు.

ఏది ఏమైనా, మన చిన్నతనంలో నాన్న వెనుక కూర్చుని షికార్లకు వెళ్లిన జ్ఞాపకాల్లో ఈ బైక్ ఒక భాగం. ఇప్పుడు కేవలం ఐదుగురు మాత్రమే కొనే స్థాయికి ఇది చేరిందంటే, అది ఒక శకం ముగిసిందని అర్థం. రోడ్లపై ఎక్కడో ఒకచోట కనిపించే ఈ బైక్, త్వరలోనే జ్ఞాపకంగా మిగిలిపోనుంది. ఒక లెజెండరీ మోడల్‌కు ఇలాంటి వీడ్కోలు లభించడం కాస్త బాధాకరమే అయినా, మార్కెట్ పోటీలో కొత్తవారికే అగ్రతాంబూలం దక్కుతుందనేది కాదనలేని సత్యం.