రెండు కుటుంబాలకు పర్ఫెక్ట్‎గా సరిపోతుంది.. రూ.15 లక్షల బడ్జెట్‌లో టాప్ 7 సీటర్ కార్స్ ఇవే

వేసవి సెలవులు వచ్చేశాయి. ఫ్యామిలీతో కలిసి ట్రిప్ ప్లాన్ చేస్తున్నారా? అయితే మీకు మంచి మైలేజీ ఇచ్చే, భారీ స్పేస్ ఉన్న 7-సీటర్ కారు అవసరమని వేరే చెప్పక్కర్లేదు. ముఖ్యంగా సిఎన్‌జి (CNG) ధరల్లో మార్పులు వచ్చాక, మధ్యతరగతి కుటుంబాల చూపు బడ్జెట్ ఫ్రెండ్లీ ఎంపీవీల (MPV) వైపు మళ్లింది. 2026 ఏప్రిల్, మే నెలల అమ్మకాల ట్రెండ్ ప్రకారం.. రూ.15 లక్షల లోపు బడ్జెట్‌లో భారతీయ రోడ్లపై రాజసం చలాయిస్తున్న నాలుగు బెస్ట్ 7-సీటర్ కార్ల పూర్తి వివరాలు మీకోసం!

1. మారుతీ సుజుకి అర్టిగా (Maruti Ertiga):
7-సీటర్ అనగానే అందరికీ గుర్తొచ్చే పేరు అర్టిగా. 2026లో కూడా దీని క్రేజ్ తగ్గలేదు. దీని ఎక్స్-షోరూమ్ ధర సుమారు రూ.8.80 లక్షల నుంచి ప్రారంభమై రూ.12.94 లక్షల వరకు ఉంది. 1.5 లీటర్ పెట్రోల్ ఇంజిన్‌తో వచ్చే ఈ కారులో స్మార్ట్ హైబ్రిడ్ టెక్నాలజీ ఉంటుంది. పెట్రోల్‌పై సుమారు 20.51 కిమీ, సిఎన్‌జి వేరియంట్ అయితే ఏకంగా 26.11 కిమీ/కేజీ మైలేజీని అందిస్తుంది. వెనుక కూర్చునే వారికి కూడా చల్లని గాలి అందించేందుకు రూఫ్ మౌంటెడ్ ఏసీ వెంట్స్ ఉన్నాయి.

2. టయోటా రుమియన్ (Toyota Rumion):
అర్టిగా ప్లాట్‌ఫామ్ మీదనే తయారైనప్పటికీ, టయోటా తనదైన స్టైల్‌తో రుమియన్‌ను తీసుకొచ్చింది. దీని ధర సుమారు రూ. 9.56 లక్షల నుండి రూ. 13.86 లక్షల వరకు ఉంటుంది. క్రోమ్ ఫినిష్ గ్రిల్, కొత్త డిజైన్ అలాయ్ వీల్స్‌తో ఇది చాలా రిచ్‌గా కనిపిస్తుంది. ఇది కూడా 26.11 కిమీ/కేజీ (CNG) మైలేజీని ఇస్తుంది. టయోటా ఇచ్చే సర్వీస్ క్వాలిటీ, ఎక్కువ కాలం మన్నిక ఉండటం దీని ప్లస్ పాయింట్.

3. రెనాల్ట్ ట్రైబర్ (Renault Triber):
మీ బడ్జెట్ రూ. 10 లక్షల కంటే తక్కువ ఉంటే, ట్రైబర్ కంటే మంచి ఆప్షన్ మరొకటి లేదు. దీని 2026 అప్డేటెడ్ మోడల్ ప్రారంభ ధర కేవలం రూ. 5.81 లక్షల నుండే ఉండటం విశేషం. 8-అంగుళాల టచ్‌స్క్రీన్, 4 ఎయిర్‌బ్యాగ్‌లు, మడతపెట్టుకోగలిగే సీట్లు దీని ప్రత్యేకత. లీటరుకు సుమారు 19-20 కిమీ మైలేజీని ఇస్తుంది. ఇందులోని సీట్లను మనకు కావాల్సినట్లు మార్చుకోవచ్చు. వెనుక సీట్లు తీసేస్తే ఏకంగా 625 లీటర్ల బూట్ స్పేస్ లభిస్తుంది.

4. కియా కారెన్స్ (Kia Carens):
కుటుంబ రక్షణ ముఖ్యం అనుకునే వారికి కియా కారెన్స్ ఒక వరప్రసాదం. బేస్ వేరియంట్ సుమారు రూ. 10.51 లక్షల నుండి ప్రారంభమవుతుంది. 6 ఎయిర్‌బ్యాగ్‌లు, ఆల్-వీల్ డిస్క్ బ్రేక్స్ వంటి సేఫ్టీ ఫీచర్లు బేస్ మోడల్ నుండే వస్తాయి. పెట్రోల్ మోడల్ 18 కిమీ వరకు మైలేజీని అందిస్తుంది. రెండవ వరుసలో 'వన్ టచ్ ఎలక్ట్రిక్ టంబుల్' సీట్లు ఉంటాయి, దీనివల్ల మూడవ వరుసలోకి వెళ్లడం చాలా ఈజీ.

రూ. 15 లక్షల బడ్జెట్‌లో అదిరిపోయే మైలేజీ ఇచ్చే మారుతీ అర్టిగా, కియా కారెన్స్, టయోటా రుమియన్ లలో ఏదో ఒకటి మీ బడ్జెట్ కు తగ్గట్లు ఎంచుకోవచ్చు.