డ్రైవర్లకు గుడ్‌న్యూస్ చెప్పిన మహీంద్రా ఉడో.. బైక్ ధరకే కొనచ్చు! 1 లక్ష కి.మీ ఉచిత సర్వీస్, 6 ఏళ్ల వారంటీ!

మహీంద్రా లాస్ట్ మైల్ మొబిలిటీ లిమిటెడ్ భారత మార్కెట్‌లో తన తాజా ఎలక్ట్రిక్ త్రీ-వీలర్ మహీంద్రా ఉడో (Mahindra UDO) ను అధికారికంగా విడుదల చేసింది. 2018 ఆటో ఎక్స్‌పోలో రెండు సీట్ల త్రీ-వీలర్ కాన్సెప్ట్‌గా మొదటిసారి దర్శనమిచ్చిన ఈ వాహనం, ఎన్నో ఏళ్ల నిరీక్షణ తర్వాత ఇప్పుడు వాణిజ్య వినియోగానికి సిద్ధంగా మార్కెట్‌లోకి అడుగుపెట్టింది. అప్పట్లో కాన్సెప్ట్‌గా మాత్రమే కనిపించిన ఉడో, ఇప్పుడు పూర్తిగా అభివృద్ధి చెంది ఎలక్ట్రిక్ ఆటోగా మారింది. పట్టణ రవాణా అవసరాలకు అనుగుణంగా డిజైన్ చేసిన మహీంద్రా ఉడో, L5M కేటగిరీలోకి వస్తుంది. ఇరుకైన రోడ్లు, ట్రాఫిక్‌తో నిండిన నగర వీధులు, చిన్న పట్టణాల్లోని రోజువారీ కమ్యూటింగ్ అవసరాలను సులభంగా తీర్చేలా ఈ వాహనాన్ని రూపకల్పన చేశారు.

ఎలక్ట్రిక్ వాహనం కావడంతో, ఇది సున్నా ఉద్గారాలను విడుదల చేస్తుంది, తక్కువ ఆపరేటింగ్ ఖర్చులతో పాటు నిశ్శబ్దంగా ప్రయాణించే అనుభూతిని కూడా అందిస్తుంది. దీంతో డ్రైవర్‌కే కాదు, ప్రయాణికులకూ ఇది మరింత సౌకర్యవంతమైన ఎంపికగా నిలుస్తుంది. ధర విషయానికి వస్తే, మహీంద్రా ఉడో ఎలక్ట్రిక్ త్రీ-వీలర్‌ను కంపెనీ రూ. 3,84,299 (ఎక్స్-షోరూమ్) ధరకు మార్కెట్‌లోకి విడుదల చేసింది.

అయితే, కస్టమర్లను ఆకర్షించేందుకు, ఎలక్ట్రిక్ మొబిలిటీని మరింత ప్రోత్సహించేందుకు, పరిమిత కాలానికి ప్రత్యేక ఆఫర్‌ను కూడా ప్రకటించింది. ఈ ఆఫర్ కింద, ఉడోను కేవలం రూ. 3,58,999 ప్రారంభ ధరకు సొంతం చేసుకునే అవకాశం కల్పిస్తోంది. డ్రైవర్‌తో పాటు ప్రయాణీకులకు కూడా అత్యుత్తమ సౌకర్యాన్ని అందించాలనే ఉద్దేశంతో మహీంద్రా ఉడోను చాలా జాగ్రత్తగా డిజైన్ చేసింది.

సాధారణ ఎలక్ట్రిక్ ఆటోలతో పోలిస్తే, ఇందులో డ్రైవర్ కోసం ప్రత్యేకంగా రూపొందించిన పైలట్ సీటు ఉంటుంది. ఇది ఇతర వాహనాల సీట్ల కంటే దాదాపు 20 శాతం ఎక్కువ మందంగా ఉండటం వల్ల, ఎక్కువ గంటలు వాహనం నడిపినా అలసట తగ్గుతుంది. అలాగే ప్రయాణీకుల విభాగంలో విశాలమైన హెడ్‌రూమ్, లెగ్‌రూమ్ అందించడం ద్వారా సాఫీగా, హాయిగా ప్రయాణించే అనుభూతిని కలిగిస్తుంది.

ఉడోలో 11.7 kWh సామర్థ్యం కలిగిన IP67 రేటింగ్ లిథియం-అయాన్ బ్యాటరీ ప్యాక్‌ను అమర్చారు. ఇది ధూళి, నీటి ప్రభావాలకు బలంగా ఉండేలా రూపొందించబడింది. వాస్తవ డ్రైవింగ్ పరిస్థితుల్లో ఒక్కసారి పూర్తిగా ఛార్జ్ చేస్తే సుమారు 200 కిలోమీటర్ల వరకు ప్రయాణించగలదని కంపెనీ చెబుతోంది. ఈ ఎలక్ట్రిక్ ఆటోలో అమర్చిన మోటార్ 10 kW (13.41 bhp) శక్తిని, 52 Nm టార్క్‌ను ఉత్పత్తి చేస్తూ మంచి పికప్ అందిస్తుంది.

గరిష్టంగా గంటకు 55 కి.మీ వేగంతో ప్రయాణించగలదు. డ్రైవింగ్ అనుభూతిని మరింత మెరుగుపరచేందుకు మహీంద్రా ఉడోలో రేంజ్, రైడ్, రేస్ అనే మూడు డ్రైవింగ్ మోడ్‌లను అందించింది. అవసరానికి అనుగుణంగా మోడ్‌ను ఎంచుకోవడం ద్వారా బ్యాటరీ సామర్థ్యాన్ని లేదా పనితీరును మెరుగ్గా ఉపయోగించుకోవచ్చు. అంతేకాదు, రివర్స్ థ్రోటిల్, రీజెనరేటివ్ బ్రేకింగ్, హిల్ హోల్డ్ అసిస్ట్, క్రీప్ ఫంక్షన్ వంటి ఆధునిక ఫీచర్లు కూడా ఇందులో ఉన్నాయి.

మహీంద్రా కస్టమర్లకు నమ్మకం కలిగించే విధంగా అమ్మకాల తర్వాత సేవలను అందిస్తోంది. ఉడో ఎలక్ట్రిక్ ఆటోకు కంపెనీ 6 సంవత్సరాలు లేదా 1.5 లక్షల కిలోమీటర్ల వారంటీతో పాటు 1 లక్ష కిలోమీటర్ల వరకు ఉచిత సర్వీసింగ్ హామీ ఇస్తోంది. అంతేకాదు, UDAY NXT పథకం ద్వారా రూ.20 లక్షల ప్రమాద బీమా, ఆర్థిక సలహా వంటి అదనపు ప్రయోజనాలు కూడా లభిస్తాయి.

మహీంద్రా ఉడోను తెలంగాణలోని జహీరాబాద్ ప్లాంట్‌లో తయారు చేస్తున్నారు. ఇక్కడ రూ.218 కోట్ల పెట్టుబడితో ఆధునిక ఆటోమేటెడ్ బ్యాటరీ లైన్లు, పెయింట్ షాప్ ఏర్పాటు చేశారు. ఈ ప్లాంట్ వార్షికంగా 1.60 లక్షల యూనిట్లు ఉత్పత్తి చేసే సామర్థ్యం కలిగి ఉండగా, ప్రస్తుతం 90,000 యూనిట్ల సామర్థ్యంతో ఉత్పత్తి సజావుగా సాగుతోంది.