మనసు మార్చుకుని కరెంట్ కార్ల వెంటపడుతున్న భారతీయులు..10 నెలల్లోనే 41 వేల ఎలక్ట్రిక్ ఎస్‌యూవీలు కొనేశారు

భారతదేశ ఆటోమొబైల్ రంగం ఇప్పుడు ఒక చారిత్రాత్మక మలుపులో ఉంది. ఒకప్పుడు ఎలక్ట్రిక్ వాహనం (EV) అంటే కేవలం టాటా మోటార్స్ మాత్రమే గుర్తుకు వచ్చే పరిస్థితి ఉండేది. కానీ ఇప్పుడు సీన్ పూర్తిగా మారుతోంది. దేశీయ దిగ్గజం మహీంద్రా (Mahindra & Mahindra) తన సరికొత్త బోర్న్ ఎలక్ట్రిక్ (Born Electric) శ్రేణి వాహనాలతో మార్కెట్లోకి తుపానులా దూసుకొచ్చింది. కేవలం 10 నెలల వ్యవధిలోనే 41,000 ఎలక్ట్రిక్ ఎస్‌యూవీలను విక్రయించి, అమ్మకాల్లో సరికొత్త రికార్డులను సృష్టిస్తోంది. ఈ అనూహ్య వృద్ధి ఇప్పటివరకు ఇవి మార్కెట్‌లో రారాజుగా వెలుగుతున్న టాటా మోటార్స్‌కు ఒక రకమైన రెడ్ అలర్ట్ అని విశ్లేషకులు హెచ్చరిస్తున్నారు.

మహీంద్రా సంస్థ తన ఇన్వెస్టర్ల మీటింగ్‌లో (ఫిబ్రవరి 11, 2026) ప్రకటించిన వివరాల ప్రకారం.. 2025 మార్చిలో డెలివరీలు ప్రారంభించినప్పటి నుండి జనవరి 2026 వరకు ఈ భారీ మైలురాయిని అందుకుంది. విశేషమేమిటంటే, ఈ తక్కువ కాలంలోనే మహీంద్రా కస్టమర్లు తమ వాహనాలతో ఏకంగా 32 కోట్ల కిలోమీటర్ల ప్రయాణాన్ని పూర్తి చేశారు. ఇది మహీంద్రా వాహనాలపై ప్రజలకు ఉన్న నమ్మకాన్ని మరియు ఆ వాహనాల క్వాలిటీని చాటిచెబుతోంది. ఈ అద్భుత విజయంలో మహీంద్రా మూడు ప్రధాన అస్త్రాలు-BE 6, XEV 9e, XEV 9S-కీలక పాత్ర పోషించాయి.

యువత మనసు దోచిన పవర్ ఫుల్ ఎస్‌యూవీ మహీంద్రా BE 6
మహీంద్రా బోర్న్ ఎలక్ట్రిక్ శ్రేణిలో అత్యంత ప్రాచుర్యం పొందిన మోడల్ BE 6. ఇది కేవలం ప్రయాణ సాధనం మాత్రమే కాదు, ఒక టెక్నాలజీ అద్భుతం. దీని ధర రూ.18.90 లక్షల నుంచి రూ.27.65 లక్షల వరకు ఉండటం వల్ల మధ్యతరగతి, ప్రీమియం వినియోగదారులను సమానంగా ఆకర్షిస్తోంది. ఇందులో 59 kWh, 79 kWh అనే రెండు బ్యాటరీ ఆప్షన్లు ఉన్నాయి.

కేవలం ఒక్కసారి ఛార్జ్ చేస్తే ఇది ఏకంగా 683 కిలోమీటర్ల (MIDC క్లెయిమ్డ్) భారీ రేంజ్‌ను అందిస్తుంది. దీనివల్ల రేంజ్ ఆందోళన లేకుండా సుదీర్ఘ ప్రయాణాలు చేసే వీలు కలుగుతుంది. అంతేకాకుండా కేవలం 6.7 సెకన్లలోనే సున్నా నుండి 100 కి.మీ వేగాన్ని అందుకోవడం దీని ప్రత్యేకత. స్పోర్టీ లుక్ కోరుకునే వారి కోసం ఫార్ములా-ఇ థీమ్‌తో వచ్చిన BE 06 FE ఎడిషన్ మార్కెట్లో హాట్ కేకులా అమ్ముడవుతోంది.

లగ్జరీ, ఫ్యామిలీ ప్యాకేజీ XEV 9e, XEV 9S
మహీంద్రా ప్రీమియం విభాగంలో ప్రవేశపెట్టిన XEV 9e కూపే స్టైల్ డిజైన్‌తో వాహన ప్రియులను మంత్రముగ్ధులను చేస్తోంది. రూ.21.90 లక్షల ప్రారంభ ధరతో లభించే ఈ కారులో మెర్సిడెస్ వంటి ట్రిపుల్ స్క్రీన్ డాష్‌బోర్డ్ (మొత్తం 36.9 అంగుళాలు) ప్రధాన ఆకర్షణ. ఇది ఇంటర్నేషనల్ లెవల్ ఫీచర్లతో భారతదేశపు గ్రీన్ కార్ ఆఫ్ ది ఇయర్ (ICOTY 2026) గా ఎంపికైంది.

మరోవైపు, పెద్ద కుటుంబాల కోసం మహీంద్రా XEV 9S అనే 7-సీటర్ ఎలక్ట్రిక్ ఎస్‌యూవీని తీసుకొచ్చింది. రూ. 19.95 లక్షల ధరతో ప్రారంభమయ్యే ఈ మోడల్, స్పేస్, కంఫర్ట్ పరంగా ఎక్కడా తగ్గదు. 16 స్పీకర్ల హర్మాన్ కార్డాన్ ఆడియో సిస్టమ్, పనోరమిక్ మూన్‌రూఫ్, 180 kW ఫాస్ట్ ఛార్జింగ్ వంటి సౌకర్యాలు దీనిని ఒక కంప్లీట్ ఫ్యామిలీ ఇవిగా మార్చాయి.

చకచకా సాగుతున్న చాకన్ ప్లాంట్ పనులు
డిమాండ్ విపరీతంగా పెరగడంతో మహీంద్రా తన ఉత్పత్తి వేగాన్ని కూడా పెంచింది. పూణే సమీపంలోని చాకన్ (Chakan) ప్లాంట్‌లో ప్రస్తుతం నెలకు 4,000 నుంచి 5,000 వాహనాలు తయారవుతుండగా, మార్చి 2026 నాటికి దీనిని 8,000 యూనిట్లకు పెంచాలని లక్ష్యంగా పెట్టుకుంది. ఈ ప్లాంట్ యొక్క గరిష్ట సామర్థ్యం నెలకు 10,000 యూనిట్లు.

పెరుగుతున్న బుకింగ్స్ దృష్ట్యా, కంపెనీ ఈ ప్లాంట్ కోసం అదనంగా రూ.4,500 కోట్లను కేటాయించింది. భవిష్యత్తులో అంటే 2027 నాటికి సంవత్సరానికి 90,000 ఈవీలను ఉత్పత్తి చేయాలనేది మహీంద్రా ప్లాన్. అంతేకాకుండా, మహారాష్ట్రలోని నాగ్‌పూర్‌లో మరో భారీ ఇంటిగ్రేటెడ్ ప్లాంట్ కోసం రూ. 15,000 కోట్ల పెట్టుబడిని కూడా ప్రకటించింది.

టాటా వర్సెస్ మహీంద్రా
టాటా మోటార్స్ ఇప్పటికీ తన 43% మార్కెట్ వాటాతో అగ్రస్థానంలో కొనసాగుతోంది. ముఖ్యంగా హారియర్ ఇవి, సఫారీ ఇవి మరియు సరికొత్త పంచ్ ఇవి మోడల్స్‌తో టాటా గట్టిగానే ప్రతిఘటిస్తోంది. అయితే, మహీంద్రా గ్లోబల్ డిజైన్, అడ్వాన్స్‌డ్ INGLO ప్లాట్‌ఫామ్ కారణంగా కస్టమర్లు ఇప్పుడు మహీంద్రా వైపు మొగ్గు చూపుతున్నారు.

కేవలం ఏడాది లోపే మహీంద్రా తన మార్కెట్ వాటాను 7% నుంచి ఏకంగా 20% కి పెంచుకోవడం గమనార్హం. రాబోయే కాలంలో థార్.ఇ (Thar.e), బోలెరో.ఇ (Bolero.e) వంటి లెజెండరీ బ్రాండ్లు ఎలక్ట్రిక్ అవతార్‌లో వస్తే, ఈ పోటీ మరింత తీవ్రం కానుంది. పెట్రోల్, డీజిల్ ధరల భారం నుంచి బయటపడాలనుకునే భారతీయులకు ఇప్పుడు మహీంద్రా రూపంలో ఒక పవర్ఫుల్ ప్రత్యామ్నాయం దొరికింది. ఈ రెండు దేశీయ దిగ్గజాల మధ్య జరుగుతున్న పోటీ వల్ల అంతిమంగా లబ్ధి పొందేది మాత్రం సామాన్య వాహన కొనుగోలుదారులే.