ఇదేందయ్యా ఇదీ.. ఒక్క నెలలోనే తలకిందులైన లెక్కలు.. క్రెటాను వెనక్కి నెట్టిన స్కార్పియో!

భారత ఆటోమొబైల్ రంగంలో ఎస్‌యూవీల (SUV) హవా నడుస్తోంది. అయితే మే 2026 నెల సేల్స్ గణాంకాలు అందరినీ ఆశ్చర్యానికి గురిచేస్తున్నాయి. దేశంలో అత్యధికంగా అమ్ముడయ్యే ఎస్‌యూవీల జాబితాలో ఎప్పుడూ టాప్‌లో ఉండే హ్యుందాయ్ క్రెటా (Hyundai Creta) ఈసారి ఘోరంగా వెనకబడిపోయింది.

ఎవ్వరూ ఊహించని విధంగా మారుతి సుజుకికి చెందిన స్టైలిష్ క్రాస్ఓవర్ మారుతి ఫ్రాంక్స్ (Maruti Fronx) మే నెలలో దేశంలోనే నంబర్ 1 ఎస్‌యూవీగా నిలిచి అందరికీ పెద్ద సర్ప్రైజ్ ఇచ్చింది. ఇదే సమయంలో ఎస్‌యూవీ కింగ్ అనిపించుకునే క్రెటా అమ్మకాలు భారీగా పడిపోయి, టాప్-10 కార్ల లిస్టులో ఏకంగా చివరి స్థానానికి (10వ ప్లేస్) పడిపోయింది.

క్రెటాను దాటేసిన మహీంద్రా స్కార్పియో
ఈ సేల్స్ రిపోర్టులో మరో పెద్ద హైలైట్ ఏంటంటే.. దేశీయ దిగ్గజం మహీంద్రాకు చెందిన పవర్‌ఫుల్ ఎస్‌యూవీ మహీంద్రా స్కార్పియో (Mahindra Scorpio) చాలా కాలం తర్వాత హ్యుందాయ్ క్రెటాను అమ్మకాల్లో వెనక్కి నెట్టేసింది. మే నెలలో మొత్తం ఎస్‌యూవీల రేసులో స్కార్పియో నాల్గవ స్థానాన్ని కైవసం చేసుకోగా, క్రెటా ఐదో స్థానానికి పరిమితమైంది. గత నెలలో మహీంద్రా సంస్థ 15,774 స్కార్పియో యూనిట్లను విక్రయించగా, హ్యుందాయ్ కేవలం 15,235 క్రెటా కార్లను మాత్రమే అమ్మగలిగింది. ఈ రెండు మోడళ్ల మధ్య కేవలం 539 యూనిట్ల స్వల్ప తేడా మాత్రమే ఉంది.

ఒక్క నెలలోనే రివర్స్ అయిన రేటింగ్స్
నిజానికి సరిగ్గా ఒక్క నెల క్రితం, అంటే ఏప్రిల్ నెలలో పరిస్థితి దీనికి పూర్తిగా భిన్నంగా ఉంది. ఏప్రిల్‌లో హ్యుందాయ్ కంపెనీ 15,291 క్రెటా కార్లను అమ్మగా, మహీంద్రా స్కార్పియో సేల్స్ 14,719 యూనిట్లుగా ఉన్నాయి. అంటే ఏప్రిల్‌లో క్రెటా పైచేయి సాధించింది.

కానీ మే నెల వచ్చేసరికి మహీంద్రా ఆ గ్యాప్‌ను భర్తీ చేయడమే కాకుండా, క్రెటా కంటే ఎక్కువ కార్లను అమ్మి తన సత్తా చాటుకుంది. మహీంద్రా స్కార్పియో సిరీస్ కార్లకు మార్కెట్లో ఎంత విపరీతమైన క్రేజ్, నిరంతర డిమాండ్ ఉందో ఈ గణాంకాలు నిరూపిస్తున్నాయి.

వేర్వేరు సెగ్మెంట్లు.. అయినా గట్టి పోటీ
నిజానికి మహీంద్రా స్కార్పియో, హ్యుందాయ్ క్రెటా కార్లు నేరుగా ఒకదానితో ఒకటి పోటీ పడే మోడల్స్ కావు. ఎందుకంటే స్కార్పియో అనేది పెద్ద సైజ్ ఉన్న 3-రో (త్రీ-రో) ఎస్‌యూవీ. ఇది 6, 7 సీటింగ్ ఆప్షన్లలో లభిస్తుంది. పైగా ఇది రగ్గడ్ బాడీ-ఆన్-ఫ్రేమ్ నిర్మాణంతో వస్తుంది.

మరోవైపు క్రెటా అనేది 5-సీటర్ మిడ్-సైజ్ ఎస్‌యూవీ. ఇది సిటీ డ్రైవింగ్‌కు, ఫ్యామిలీలకు లగ్జరీ ఫీచర్లతో బెంచ్‌మార్క్‌గా నిలిచింది. సెగ్మెంట్లు వేరైనప్పటికీ, అమ్మకాల సంఖ్యలో క్రెటాను స్కార్పియో దాటడం మహీంద్రా సాధించిన ఒక పెద్ద రికార్డుగా టెక్ నిపుణులు భావిస్తున్నారు. ప్రస్తుతం మహీంద్రా తన స్కార్పియో సిరీస్‌లో స్కార్పియో ఎన్ (Scorpio N), స్కార్పియో క్లాసిక్ (Scorpio Classic) అనే రెండు మోడళ్లను అమ్ముతోంది.

మహీంద్రా స్కార్పియో ఇంజిన్లు.. ధరల వివరాలు
మహీంద్రా స్కార్పియో ఎన్ మోడల్‌లో 2.0 లీటర్ టర్బో-పెట్రోల్, 2.2 లీటర్ డీజిల్ ఇంజిన్ ఆప్షన్లు ఉన్నాయి. వీటిలో మాన్యువల్, ఆటోమేటిక్ గేర్‌బాక్స్‌లతో పాటు కొన్ని వేరియంట్లలో 4-వీల్ డ్రైవ్ (4WD) సదుపాయం కూడా ఉంది. దీని ఎక్స్-షోరూమ్ ధర రూ.13.49 లక్షల నుంచి రూ.24.95 లక్షల మధ్య ఉంది.

ఇక పాత లుక్‌తో అలరించే స్కార్పియో క్లాసిక్‌లో 2.2 లీటర్ డీజిల్ ఇంజిన్‌తో పాటు కేవలం 6-స్పీడ్ మాన్యువల్ గేర్‌బాక్స్ మాత్రమే వస్తుంది. దీని ఎక్స్-షోరూమ్ ధరలు రూ.12.99 లక్షల నుంచి రూ.16.99 లక్షల వరకు ఉన్నాయి.

హ్యుందాయ్ క్రెటా వేరియంట్లు.. ధరల వివరాలు
పోటీని తట్టుకోవడానికి హ్యుందాయ్ క్రెటా ప్రస్తుతం పెట్రోల్, టర్బో-పెట్రోల్, డీజిల్ ఇంజిన్లతో పాటు సరికొత్తగా క్రెటా ఎలక్ట్రిక్ (Creta EV) వెర్షన్‌లో కూడా లభిస్తోంది. క్రెటా ఈవీ ఒకసారి ఫుల్ ఛార్జ్ చేస్తే 473 కిలోమీటర్ల వరకు ప్రయాణిస్తుందని కంపెనీ చెబుతోంది.

నార్మల్ పెట్రోల్/డీజిల్ క్రెటా మోడళ్ల ఎక్స్-షోరూమ్ ధరలు రూ.10.90 లక్షల నుంచి రూ.20.11 లక్షల వరకు ఉండగా, సరికొత్త క్రెటా ఎలక్ట్రిక్ వేరియంట్ల ధరలు రూ.18.02 లక్షల నుంచి ప్రారంభమై రూ.24.70 లక్షల వరకు ఉన్నాయి. రేట్లు, వేరియంట్లు ఇన్ని ఉన్నప్పటికీ మే నెలలో క్రెటా వెనకబడటం ఆటోమొబైల్ రంగాన్ని ఆశ్చర్యపరిచింది.