ఈ ఒక్క కారు కోసం సేల్స్ కౌంటర్ల వద్ద కస్టమర్ల తాకిడి.. స్టాక్ వచ్చినా సరిపోవడం లేదు

డిసెంబర్ 2025 నెలలో మహీంద్రా (mahindra) భారత ఆటోమొబైల్ మార్కెట్‌లో తన ఆధిపత్యాన్ని మరోసారి స్పష్టంగా చాటుకుంది. ఆ ఒక్క నెలలోనే మహీంద్రా మొత్తం 50,946 కార్లను విక్రయించి గణనీయమైన ఫలితాన్ని సాధించింది. గత సంవత్సరం ఇదే కాలమైన డిసెంబర్ 2024తో పోలిస్తే ఇది దాదాపు 23 శాతం వృద్ధిగా నమోదు కావడం విశేషం. మార్కెట్‌లో పోటీ తీవ్రంగా ఉన్నప్పటికీ, మహీంద్రా బ్రాండ్‌పై వినియోగదారుల నమ్మకం ఎంత బలంగా ఉందో ఈ గణాంకాలు స్పష్టంగా చూపిస్తున్నాయి. అయితే, నవంబర్ 2025తో పోలిస్తే డిసెంబర్ నెలలో అమ్మకాల పరంగా సుమారు 10 శాతం క్షీణత కనిపించింది. ఫెస్టివ్ సీజన్ ముగియడం, సంవత్సరాంతంలో కొంతమంది కొనుగోలుదారులు నిర్ణయాలను వాయిదా వేసుకోవడం వంటి కారణాలు దీనికి కారణమై ఉండొచ్చు.

అయినప్పటికీ, ఈ తగ్గుదల మహీంద్రా మొత్తం ప్రదర్శనపై పెద్దగా ప్రభావం చూపలేదని చెప్పాలి. ఎందుకంటే, డిసెంబర్ నెల ముగిసే సమయానికి మహీంద్రా 2025 సంవత్సరాన్ని భారతదేశంలో రెండవ అతిపెద్ద కార్ల తయారీ సంస్థగా ఉంది. గత నెలలో మహీంద్రా అమ్మకాలలో అసలు హీరోగా నిలిచింది స్కార్పియో. మరోసారి ఈ SUV జాబితాలో అగ్రస్థానాన్ని దక్కించుకుంది. డిసెంబర్ 2025లో స్కార్పియో మొత్తం 15,885 యూనిట్లు అమ్ముడవ్వడం ద్వారా తన డిమాండ్‌ను నిరూపించింది.

ఇది డిసెంబర్ 2024తో పోలిస్తే సుమారు 30 శాతం వృద్ధి. సంవత్సరాలు గడుస్తున్నా, కొత్త మోడళ్ల పోటీ ఉన్నప్పటికీ స్కార్పియో క్రేజ్ మాత్రం తగ్గడం లేదు. ఆసక్తికరమైన విషయం ఏమిటంటే, డిసెంబర్ నెలలో మహీంద్రా మొత్తం అమ్మకాలలో స్కార్పియో ఒక్కటే సుమారు 12.6 శాతం వాటాను కలిగి ఉంది. అంతేకాదు, డిసెంబర్ 2024తో పాటు నవంబర్ 2025తో పోల్చినా స్కార్పియో అమ్మకాలు సుమారు 2 శాతం పెరగడం గమనించదగిన అంశం.

స్కార్పియో తర్వాత మహీంద్రా అమ్మకాల జాబితాలో రెండవ స్థానంలో నిలిచిన బొలెరో మరోసారి మార్కెట్ బలాన్ని నిరూపించింది. డిసెంబర్ నెలలో ఈ SUV మొత్తం 10,611 యూనిట్ల అమ్మకాలను నమోదు చేయడం విశేషం. గత సంవత్సరం ఇదే కాలమైన డిసెంబర్ 2024తో పోలిస్తే బొలెరో అమ్మకాలు ఏకంగా 79 శాతం వృద్ధిని సాధించడం గమనార్హం. నవంబర్ 2025తో పోలిస్తే కూడా ఒక శాతం మేర పెరుగుదల నమోదు కావడం విశేషం.

ఇక మహీంద్రా సబ్-కాంపాక్ట్ SUV సెగ్మెంట్‌లో ఉన్న XUV 3XO కూడా డిసెంబర్ నెలలో మంచి ప్రదర్శన చూపింది. ఈ మోడల్ మొత్తం 9,422 యూనిట్ల అమ్మకాలతో 35 శాతం వార్షిక వృద్ధిని నమోదు చేసింది. అయితే, నవంబర్ 2025తో పోలిస్తే XUV 3XO అమ్మకాలు సుమారు 11 శాతం తగ్గడం కూడా గమనించదగిన అంశం. ఫెస్టివ్ సీజన్ ముగిసిన తరువాత డిమాండ్ కొంత తగ్గడం ఇందుకు కారణంగా భావిస్తున్నారు.

ఈ జాబితాలో నాల్గవ స్థానంలో నిలిచింది మహీంద్రా థార్. డిసెంబర్‌లో థార్ మొత్తం 9,339 యూనిట్లను విక్రయించి తన అడ్వెంచర్ SUV ఇమేజ్‌ను మరింత బలపరిచింది. మహీంద్రా తాజా మోడళ్ల విషయానికి వస్తే, కొత్తగా పరిచయమైన XUV 7XO డిసెంబర్ నెలలో 971 యూనిట్ల అమ్మకాలను నమోదు చేసింది. అదే సమయంలో, పాత తరం మోడల్ అయిన XUV700 కూడా గత నెలలో 453 యూనిట్లను విక్రయించింది.

ఎలక్ట్రిక్ వాహనాల విభాగంలో కూడా మహీంద్రా వేగంగా ముందుకుసాగుతోంది. ఈ సెగ్మెంట్‌లో XEV 9e డిసెంబర్ నెలలో 2,154 యూనిట్లను విక్రయించి, గత ఏడాది నవంబర్‌తో పోలిస్తే 51 శాతం వృద్ధిని నమోదు చేసింది. ఇది మహీంద్రా EV స్ట్రాటజీకి బలమైన సంకేతంగా చెప్పవచ్చు. మరోవైపు BE 6 కూడా నవంబర్ 2025తో పోలిస్తే 1,481 యూనిట్ల అమ్మకాలతో తన ఉనికిని చాటుకుంది.