షాక్‌కి గురిచేసిన మహీంద్రా కార్లు! మధ్యాహ్నం వరకే 93689 బుకింగ్స్.. రూ.20 వేల కోట్లు వసూలు

భారతీయ ఆటోమొబైల్ మార్కెట్‌లో మహీంద్రా మరోసారి తన సత్తాను చాటుకుంది. భారీ అంచనాల మధ్య విడుదలైన మహీంద్రా XEV 9S మరియు XUV 7XO SUVలు కస్టమర్ల నుంచి అద్భుతమైన స్పందనను పొందాయి. ఈ రెండు వాహనాల కోసం బుకింగ్‌లను ప్రారంభించిన కొద్ది గంటల్లోనే రికార్డు స్థాయిలో ఆర్డర్లు రావడం ఇప్పుడు ఇండస్ట్రీలో హాట్ టాపిక్‌గా మారింది. జనవరి 14, 2026 మధ్యాహ్నం 2 గంటల వరకు గణాంకాల ప్రకారం, ఈ రెండు SUVలకు కలిపి మొత్తం 93,689 బుకింగ్‌లు నమోదయ్యాయని మహీంద్రా అధికారికంగా వెల్లడించింది. ఎక్స్-షోరూమ్ ధరలను ఆధారంగా తీసుకుంటే, ఈ బుకింగ్‌ల విలువ రూ. 20,500 కోట్లకు పైగా ఉంటుందని కంపెనీ ఒక ప్రకటనలో స్పష్టం చేసింది.

ఈ విజయం వెనుక మహీంద్రా అనుసరిస్తున్న వ్యూహం ఉంది. నూతన ఆవిష్కరణలతో ముందుకు సాగడం, కాలానుగుణంగా కస్టమర్ల అభిరుచులను అర్థం చేసుకుని SUVలను డిజైన్ చేయడం మహీంద్రా బలం. బలమైన నిర్మాణం, ఆకర్షణీయమైన డిజైన్, ఆధునిక టెక్నాలజీతో వాహనాలను అందించడం వల్లే భారతీయ SUV మార్కెట్‌లో మహీంద్రా రారాజుగా కొనసాగుతోంది. ఈ రోజు దేశవ్యాప్తంగా కార్ ప్రేమికులు ఎక్కువగా మాట్లాడుకుంటున్న SUVలు ఏవంటే, అందులో మహీంద్రా పేరు తప్పనిసరిగా వినిపిస్తోంది.

XEV 9S, XUV 7XO SUVలతో మహీంద్రా తన మార్కెట్ నాయకత్వాన్ని మరింత బలంగా చాటుకుంది. ఈ రెండు మోడళ్ల ద్వారా కస్టమర్లకు ఎలక్ట్రిక్, డీజిల్, పెట్రోల్ పవర్‌ట్రెయిన్‌లలో విస్తృతమైన ఎంపికలను అందించడం మహీంద్రా ప్రధాన బలంగా మారింది. ఒక్కో కస్టమర్ వినియోగ అవసరం ఒక్కోలా ఉంటుందన్న విషయాన్ని దృష్టిలో పెట్టుకుని, పనితీరు, ఖర్చు, పర్యావరణ అనుకూలత వంటి అంశాలకు అనుగుణంగా ఈ వాహనాలను రూపొందించింది.

డెలివరీల విషయానికి వస్తే, కొత్త మహీంద్రా XEV 9S డెలివరీలు జనవరి 26, 2026 నుండి ప్రారంభం కానున్నాయి. ఇక XUV 7XO డెలివరీలు నేటి నుంచే ప్రారంభమయ్యాయి. ఇప్పటికే భారీ సంఖ్యలో బుకింగ్‌లు రావడంతో, రాబోయే రోజుల్లో రోడ్లపై ఈ SUVలు ఎక్కువగా కనిపించే అవకాశం ఉందని ఆటోమొబైల్ వర్గాలు భావిస్తున్నాయి. మొత్తంగా, ఈ కొత్త లాంచ్‌లతో మహీంద్రా తన బ్రాండ్ శక్తిని, కస్టమర్ల నమ్మకాన్ని మరోసారి నిరూపించుకుంది.

మహీంద్రా XEV 9S పూర్తి స్థాయి ఎలక్ట్రిక్ 7-సీటర్ SUVగా రూపుదిద్దుకుంది. ధరలు రూ. 19.95 లక్షల (ఎక్స్-షోరూమ్) నుండి ప్రారంభమవుతాయి, ఇది ఈ సెగ్మెంట్‌లో ఆకర్షణీయమైన ఆఫర్‌గా నిలుస్తోంది. పనితీరు విషయానికి వస్తే, XEV 9S ఒకసారి పూర్తిగా ఛార్జ్ చేస్తే 500 కిలోమీటర్ల వరకు రేంజ్ అందిస్తుంది. శక్తివంతమైన ఎలక్ట్రిక్ మోటార్ ద్వారా ఇది 210 kW పవర్, 380 Nm టార్క్ను ఉత్పత్తి చేస్తుంది.

కేవలం 7.0 సెకన్లలో 0 నుంచి 100 కిమీ/గం వేగాన్ని చేరుకోవడం దీని స్పోర్టీ స్వభావాన్ని స్పష్టంగా చూపిస్తుంది. గరిష్టంగా గంటకు 202 కిమీ వేగంతో ప్రయాణించే సామర్థ్యం ఇందులో ఉంది. మొత్తం క్యాబిన్ పరంగా చూస్తే, ఈ SUV గరిష్టంగా 4,076 లీటర్ల వరకు అంతర్గత స్థలాన్ని అందిస్తుంది. బూట్ స్పేస్ 527 లీటర్ల వరకు ఉండగా, ముందు భాగంలో 150 లీటర్ల స్టోరేజ్ స్పేస్ అందుబాటులో ఉంది.

కొత్త మహీంద్రా XUV 7XO SUV ధరలు రూ. 13.66 లక్షల(ఎక్స్-షోరూమ్) నుండి ప్రారంభమవుతాయి. ఇది పెట్రోల్, డీజిల్ ఇంజిన్ ఎంపికలతో వస్తూ కస్టమర్లను లక్ష్యంగా చేసుకుంది. పెట్రోల్ వేరియంట్‌లో ఈ SUVకి 2.0-లీటర్ టర్బో పెట్రోల్ ఇంజిన్ అందించారు. ఇది 200 PS శక్తి మరియు 380 Nm గరిష్ట టార్క్ను ఉత్పత్తి చేస్తుంది. ఈ ఇంజిన్‌తో పాటు 6-స్పీడ్ మాన్యువల్, 6-స్పీడ్ ఆటోమేటిక్ గేర్‌బాక్స్ ఎంపికలు లభిస్తాయి.

డీజిల్ ఇష్టపడే కస్టమర్ల కోసం 2.2-లీటర్ డీజిల్ ఇంజిన్ను అందించారు. ఈ ఇంజిన్ 185 PS పవర్, 450 Nm టార్క్ను ఉత్పత్తి చేస్తుంది. ఇది కూడా 6-స్పీడ్ మాన్యువల్ అలాగే 6-స్పీడ్ ఆటోమేటిక్ గేర్‌బాక్స్తో లభిస్తుంది. అధిక టార్క్ కారణంగా ఈ డీజిల్ వేరియంట్ హైవే డ్రైవింగ్‌కు, అలాగే లోడ్‌తో ప్రయాణాలకు మరింత అనువుగా ఉంటుంది.