మీరు ఇప్పుడు బుక్‌ చేస్తే డెలివరీకి 1 సంవత్సరం పడుతుంది.. అంతగా ఈ కారులో ఏముందో? షోరూమ్‌ల వద్ద బారులు

మహీంద్రా (Mahindra) భారత మార్కెట్లో తన పాపులర్ SUV 700ను తాజాగా అప్‌డేట్ చేసి XUV7XO అనే కొత్త పేరుతో విడుదల చేసిన సంగతి తెలిసిందే. గత జనవరిలో లాంచ్ అయిన ఈ SUVకు కొత్త పేరు మాత్రమే కాకుండా, ఆకర్షణీయమైన డిజైన్ మార్పులు, ఆధునిక ఫీచర్లు కూడా జోడించడంతో మార్కెట్లో భారీ క్రేజ్ ఏర్పడింది. ఈ నేపథ్యంలో తాజాగా బయటకు వచ్చిన వెయిటింగ్ పీరియడ్ వివరాలు చాలా మంది కొనుగోలుదారులను ఆశ్చర్యానికి గురిచేస్తున్నాయి. ఈ SUV బుకింగ్‌లు డిసెంబర్ 15, 2025 నుంచి ప్రారంభం కాగా, డెలివరీలు జనవరి 14 నుంచి మొదలయ్యాయి. అయితే డిమాండ్ ఊహించిన దానికంటే ఎక్కువగా ఉండటంతో, వేరియంట్‌ను బట్టి వెయిటింగ్ పీరియడ్ భారీగా పెరిగింది. ముఖ్యంగా ఎంట్రీ లెవల్, మిడ్ వేరియంట్‌లకు వినియోగదారుల నుంచి భారీ స్పందన లభిస్తోంది.

వివరాల్లోకి వెళ్తే, AX వేరియంట్ విషయంలో పరిస్థితి మరింత షాకింగ్‌గా ఉంది. ఈ వేరియంట్‌లోని మాన్యువల్ ఫ్రంట్-వీల్ డ్రైవ్ మోడల్‌కు దాదాపు 12 నెలల వెయిటింగ్ పీరియడ్ ఉండగా, అదే విధంగా డీజిల్ మాన్యువల్ వేరియంట్‌కూ ఒక సంవత్సరం వరకు ఎదురు చూడాల్సిన పరిస్థితి ఏర్పడింది. అంటే, ఈ వేరియంట్‌ను ఇప్పుడు బుక్ చేస్తే డెలివరీ కోసం చాలా కాలం వేచిచూడాల్సి ఉంటుంది.

ఇక AS3 వేరియంట్ విషయానికి వస్తే, ఇది పెట్రోల్, డీజిల్ ఇంజిన్ ఎంపికలతో పాటు మాన్యువల్, ఆటోమేటిక్ ట్రాన్స్‌మిషన్‌లలో అందుబాటులో ఉంది. ఫ్రంట్-వీల్ డ్రైవ్ ఆప్షన్‌తో వచ్చే ఈ వేరియంట్‌లకు మొత్తం నాలుగు మోడళ్లున్నాయి. వీటన్నింటికీ సగటున ఐదు నెలల వెయిటింగ్ పీరియడ్ ఉండటం గమనార్హం. అంటే AX వేరియంట్‌తో పోలిస్తే కొంత తక్కువ అయినప్పటికీ, ఇంకా ఇది కూడా తక్కువ సమయం కాదనే చెప్పాలి.

అదేవిధంగా, ఫీచర్ల పరంగా మరింత మెరుగ్గా ఉండే AX5 వేరియంట్ కూడా మార్కెట్లో మంచి డిమాండ్‌ను సంపాదించుకుంది. ఈ వేరియంట్‌లో మొత్తం నాలుగు మోడళ్లున్నాయి. ఇక్కడ కూడా అన్ని వేరియంట్‌లకు దాదాపు ఐదు నెలల వరకు వెయిటింగ్ పీరియడ్ ఉండటం విశేషం. ఆధునిక టెక్నాలజీ, సేఫ్టీ ఫీచర్లు, పవర్‌ఫుల్ ఇంజిన్ ఆప్షన్‌లు ఉండటంతో ఈ వేరియంట్‌ను ఎక్కువ మంది ఎంపిక చేస్తున్నారు.

ముఖ్యంగా పెట్రోల్ మోడళ్లకు డిమాండ్ ఎక్కువగా ఉన్నప్పటికీ, సరఫరా మెరుగ్గా ఉండటంతో పెట్రోల్ మాన్యువల్ ఫ్రంట్-వీల్ డ్రైవ్ అలాగే పెట్రోల్ ఆటోమేటిక్ ఫ్రంట్-వీల్ డ్రైవ్ కార్లకు కేవలం ఒక నెల వెయిటింగ్ పీరియడ్ మాత్రమే ఉండటం వినియోగదారులకు ఊరటనిస్తోంది. అంటే పెట్రోల్ వేరియంట్‌ను ఎంచుకుంటే తక్కువ సమయంలోనే డెలివరీ పొందే అవకాశం ఉంది. అయితే డీజిల్ వేరియంట్‌ల విషయంలో పరిస్థితి కొంచెం భిన్నంగా ఉంది.

ఆల్-వీల్ డ్రైవ్ సిస్టమ్‌తో మాత్రమే లభించే డీజిల్ మాన్యువల్, డీజిల్ ఆటోమేటిక్ వేరియంట్‌లకు సుమారు 1.5 నెలల వెయిటింగ్ పీరియడ్ ఉంది. AWD సిస్టమ్ కావాలనుకునే వారికి ఇది తప్పనిసరి ఎంపిక కావడంతో, ఈ వేరియంట్‌లకు డిమాండ్ స్థిరంగా కొనసాగుతోంది. టాప్ ఎండ్‌గా భావించే AX7 Tech వేరియంట్ విషయానికి వస్తే, ఇక్కడ కూడా వెయిటింగ్ పీరియడ్ కొంత కంట్రోల్‌లోనే ఉంది.

ఈ వేరియంట్‌లోని పెట్రోల్ ఆటోమేటిక్ ఫ్రంట్-వీల్ డ్రైవ్, డీజిల్ మాన్యువల్ ఫ్రంట్-వీల్ డ్రైవ్, అలాగే డీజిల్ ఆటోమేటిక్ మోడళ్లకు సగటున ఒక నెల వెయిటింగ్ పీరియడ్ మాత్రమే ఉండటం గమనార్హం. టెక్నాలజీ, ప్రీమియం ఫీచర్లతో నిండిన ఈ వేరియంట్‌ను త్వరగా పొందగలగడం అనేకమందిని ఆకర్షిస్తోంది. ఇంజన్ ఆప్షన్‌ల పరంగా చూస్తే, మహీంద్రా XUV7XOను చాలా పవర్‌ఫుల్‌గా రూపొందించింది.

మొత్తం మీద చూస్తే, మహీంద్రా XUV7XOకు వచ్చిన స్పందన, వేరియంట్ వారీగా ఉన్న వెయిటింగ్ పీరియడ్‌లు చూస్తే ఈ SUV మార్కెట్లో ఎంతటి హాట్ ఫేవరెట్‌గా మారిందో స్పష్టంగా అర్థమవుతోంది. కొనుగోలు చేయాలనుకునే వారు తమ అవసరాలకు సరిపోయే ఇంజన్, డ్రైవ్ సిస్టమ్‌ను ఎంచుకుని, వెయిటింగ్ పీరియడ్‌ను ముందుగానే దృష్టిలో పెట్టుకొని నిర్ణయం తీసుకుంటే మరింత మంచిదని చెప్పొచ్చు.