చరిత్ర సృష్టించబోతున్న మహీంద్రా.. 650 కిమీల మైలేజీతో ప్రపంచం మెచ్చే ఎలక్ట్రిక్ కారు వచ్చేస్తోంది

భారతీయ ఆటోమొబైల్ దిగ్గజం మహీంద్రా అండ్ మహీంద్రా ఎలక్ట్రిక్ వాహనాల మార్కెట్లో మరో భారీ విప్లవానికి తెరలేపింది. తన ప్రతిష్టాత్మక బోర్న్ ఎలక్ట్రిక్ (Born Electric) సిరీస్‌లో భాగంగా సరికొత్త ఎలక్ట్రిక్ ఎస్‌యూవీని 2027లో మార్కెట్లోకి తీసుకురానున్నట్లు అధికారికంగా ప్రకటించింది. మోడల్ పేరును కంపెనీ ఇంకా గోప్యంగా ఉంచినప్పటికీ, ఇది గతంలో ప్రదర్శించిన BE.07 కాన్సెప్ట్ ప్రొడక్షన్ వెర్షన్ అని స్పష్టమవుతోంది. వాస్తవానికి ఈ కారు 2026లోనే రావాల్సి ఉన్నప్పటికీ, సాంకేతిక కారణాల వల్ల లాంచ్ టైమ్‌లైన్‌లో స్వల్ప మార్పులు జరిగాయి. ఈ కారు మార్కెట్లోకి వస్తే టాటా హారియర్ ఈవీ (Tata Harrier EV, విన్‌ఫాస్ట్ వీఎఫ్7 వంటి అంతర్జాతీయ మోడళ్లకు నిద్రలేకుండా చేయడం ఖాయం.

మహీంద్రా రూపొందించిన అత్యాధునిక ఇంగ్లో (INGLO) ఆర్కిటెక్చర్ ఆధారంగా ఈ BE.07 ఎస్‌యూవీని నిర్మిస్తున్నారు. దీని కొలతలు చూస్తుంటే ఇది ఒక భారీ మాన్స్టర్ లాగా కనిపిస్తుంది. దాదాపు 4,565 మిమీ పొడవు, 1,900 మిమీ వెడల్పు, 1,660 మిమీ ఎత్తుతో రోడ్డుపై గంభీరంగా ఉండబోతోంది. కాన్సెప్ట్ మోడల్ లో చూపించిన విధంగానే ఇందులో సి-షేప్ హెడ్ లైట్లు, టెయిల్ లైట్లు, ఫ్లష్ డోర్ హ్యాండిల్స్ వంటి ఫ్యూచరిస్టిక్ ఫీచర్లు ఉండబోతున్నాయి. దీని భారీ వీల్ ఆర్చీలు కారుకు ఒక అగ్రెసివ్ లుక్‌ను ఇస్తాయి. మహీంద్రా తన కాన్సెప్ట్ డిజైన్లను దాదాపు 90 శాతం వరకు ప్రొడక్షన్ మోడల్ లోకి మారుస్తుందనే నమ్మకం ఉండటంతో, కస్టమర్లు ఈ కారు కోసం ఆసక్తిగా ఎదురుచూస్తున్నారు.

ఇక లోపల ఇంటీరియర్ గురించి చెప్పాలంటే, ఇది కేవలం కారు కాదు.. ఒక లగ్జరీ గది అని చెప్పవచ్చు. డ్యాష్‌బోర్డ్ మొత్తం విస్తరించి ఉండే ట్రిపుల్-స్క్రీన్ సెటప్ దీని ప్రత్యేకత. అంటే డ్రైవర్ కోసం ఒకటి, ఇన్ఫోటైన్‌మెంట్ కోసం ఒకటి మరియు పక్కన కూర్చునే ప్యాసింజర్ కోసం ప్రత్యేకంగా మరో స్క్రీన్ ఉండబోతోంది. అంతేకాకుండా ప్రీమియం సౌండ్ సిస్టమ్, డ్యూయల్ జోన్ క్లైమేట్ కంట్రోల్, లెథెరెట్ అప్హోల్స్టరీ, వెంటిలేటెడ్ సీట్లు, ఆకాశాన్ని చూస్తూ ప్రయాణించేలా భారీ పనోరమిక్ సన్‌రూఫ్ వంటి అధునాతన సౌకర్యాలు ఇందులో ఉండబోతున్నాయి. బటన్ల కంటే ఎక్కువగా టచ్, హాప్టిక్ ఫీడ్‌బ్యాక్ టెక్నాలజీకి ఈ కారులో ప్రాధాన్యత ఇచ్చారు.

ఇంజిన్, బ్యాటరీ సామర్థ్యం విషయానికి వస్తే.. మహీంద్రా ఈ విషయంలో ఎక్కడా తగ్గడం లేదు. ఇందులో 60kWh నుంచి 80kWh మధ్య ఉండే భారీ బ్యాటరీ ప్యాక్‌లను వాడే అవకాశం ఉంది. ఇది దాదాపు 228bhp నుంచి 282bhp వరకు శక్తిని ఉత్పత్తి చేస్తూ, 380Nm టార్క్‌ను అందిస్తుంది. మైలేజీ లేదా రేంజ్ విషయానికి వస్తే, చిన్న బ్యాటరీ ప్యాక్‌తో 550 కిలోమీటర్లు, పెద్ద బ్యాటరీ ప్యాక్‌తో ఏకంగా 650 కిలోమీటర్ల కంటే ఎక్కువ రేంజ్ వస్తుందని అంచనా. అంతేకాకుండా కేవలం నిమిషాల్లో ఛార్జింగ్ అయ్యేలా 180 కిలోవాట్ డిసి ఫాస్ట్ ఛార్జింగ్‌ను కూడా ఇది సపోర్ట్ చేస్తుంది. దీనివల్ల ప్రయాణీకులకు రేంజ్ ఆందోళన (Range Anxiety) అస్సలు ఉండదు.

మహీంద్రా ఇప్పటికే ఎలక్ట్రిక్ వాహనాల అమ్మకాల్లో జోరు మీదుంది. ప్రస్తుతం నెలకు 4,000 నుంచి 6,000 యూనిట్ల ఈవీలను అమ్ముతూ టాటా మోటార్స్ కు గట్టి పోటీ ఇస్తోంది. తాజాగా వచ్చిన ఎక్స్ఈవీ 9ఈ (XEV 9e), బీఈ 6 (BE 6) మోడళ్లు యువతను బాగా ఆకట్టుకుంటున్నాయి. వీటి సరసన BE.07 చేరితే మహీంద్రా ఈవీ మార్కెట్లో రారాజుగా మారడం ఖాయం. కేవలం ఎలక్ట్రిక్ కార్లే కాకుండా, మహీంద్రా తన ఐకానిక్ స్కార్పియో-ఎన్ (Scorpio N) లో ఫేస్‌లిఫ్ట్ వెర్షన్ ను కూడా సిద్ధం చేస్తోంది. అలాగే స్కార్పియో ఆధారిత పికప్ ట్రక్కును కూడా తెస్తోంది. మొత్తానికి 2027 నాటికి మహీంద్రా గ్యారేజ్ నుంచి ఒక అద్భుతమైన ఎలక్ట్రిక్ విప్లవం రాబోతోంది.