మారుతిని టెన్షన్ పెడుతున్న కారు.. రూ. 4.70 లక్షలు, 32.85 కి.మీ మైలేజ్ ఉండి కూడా..!

భారతదేశంలో ఒక సామాన్యుడు కొత్త కారు కొనాలని భావించినప్పుడు, మొదట గుర్తుకు వచ్చేది మారుతి సుజుకి (Maruti Suzuki). తక్కువ నిర్వహణ ఖర్చు, విస్తృతమైన సర్వీస్ నెట్‌వర్క్, స్పేర్ పార్ట్స్ సులభంగా లభించడం వంటి కారణాలతో ఈ బ్రాండ్‌పై వినియోగదారులకు ఎంతో నమ్మకం ఏర్పడింది. ముఖ్యంగా ఎంట్రీ-లెవల్ కార్ల విభాగంలో మారుతి దశాబ్దాలుగా ఆధిపత్యం చాటుతూ వచ్చింది. అయితే, గత కొన్నేళ్లుగా పరిస్థితి పూర్తిగా మారిపోయినట్లు కనిపిస్తోంది. ఒకప్పుడు భారీగా అమ్ముడయ్యే చిన్న కార్లకు ఇప్పుడు మార్కెట్లో అంతగా ఆదరణ కనిపించడం లేదు. ఆల్టో కె10, ఎస్‌ ప్రెస్సో, ఇగ్నీస్ వంటి మోడళ్లన్నీ అమ్మకాల పరంగా కష్టకాలాన్ని ఎదుర్కొంటున్నాయి. ఒకప్పుడు మిడిల్ క్లాస్ ఫేవరెట్‌గా ఉన్న ఈ కార్లు, ఇప్పుడు వినియోగదారుల దృష్టిలో కొంత వెనుకబడ్డాయి.

ఇందులో ముఖ్యంగా ఇగ్నిస్ పరిస్థితి మరింత దారుణంగా మారింది. తగినంత డిమాండ్ లేకపోవడంతో కంపెనీ ఈ మోడల్ ఉత్పత్తిని నిలిపివేయాల్సిన పరిస్థితి ఏర్పడింది. ఇది ఎంట్రీ-లెవల్, ప్రీమియం హ్యాచ్‌బ్యాక్ సెగ్మెంట్‌లో మారుతున్న ట్రెండ్‌ను స్పష్టంగా చూపిస్తోంది. ఇప్పుడు వినియోగదారులు చిన్న కార్ల కంటే కాంపాక్ట్ SUVల వైపు ఎక్కువగా మొగ్గు చూపుతున్నారు. ఇక సెలెరియో విషయానికి వస్తే, పరిస్థితి అంతకంటే మెరుగ్గా లేదు.

2025-26 ఆర్థిక సంవత్సరంలో ఈ కారుకు సంబంధించిన అమ్మకాలు గణనీయంగా పడిపోయాయి. మొత్తం ఏడాదిలో కేవలం 18,005 యూనిట్లు మాత్రమే విక్రయమయ్యాయి. కానీ దీనికి ముందు ఏడాది అయిన 2024-25లో ఇదే మోడల్ 33,025 యూనిట్లను విక్రయించింది. ఈ రెండు సంఖ్యలను పోల్చితే, అమ్మకాలలో భారీ తగ్గుదల స్పష్టంగా కనిపిస్తుంది. దాదాపు 45 శాతం మేరకు తగ్గడం, ఈ సెగ్మెంట్‌పై వినియోగదారుల ఆసక్తి ఎంతగా తగ్గిందో తెలియజేస్తోంది.

ఈ పరిణామాలు చూస్తే, భారతీయ ఆటోమొబైల్ మార్కెట్‌లో వినియోగదారుల అభిరుచులు వేగంగా మారుతున్నాయని అర్థమవుతోంది. చిన్న కార్ల నుంచి ఎక్కువ స్పేస్, హై గ్రౌండ్ క్లియరెన్స్, SUV లుక్ ఉన్న వాహనాల వైపు ప్రజలు ఆకర్షితులవుతున్నారు. ఈ మార్పులకు అనుగుణంగా కంపెనీలు వ్యూహాలను మార్చుకోవాల్సిన అవసరం కనిపిస్తోంది. మారుతి వంటి దిగ్గజ సంస్థ కూడా ఈ సవాళ్లను ఎదుర్కొంటూ, కొత్త మోడళ్లతో మార్కెట్లో తిరిగి బలంగా నిలబడే ప్రయత్నం చేస్తోంది.

మారుతి సెలెరియో LXI, VXI, ZXI, ZXI+ వంటి నాలుగు వేరియంట్లలో లభిస్తుండటం వల్ల కస్టమర్లు తమ బడ్జెట్, అవసరాలకు అనుగుణంగా ఎంపిక చేసుకునే అవకాశం ఉంటుంది. ధర విషయంలో కూడా ఇది ఆకర్షణీయంగా ఉంది. ప్రస్తుత ఎక్స్-షోరూమ్ ధర రూ. 4.70 లక్షల నుంచి రూ. 6.73 లక్షల మధ్య ఉండటంతో, బేస్ వేరియంట్ రూ. 5 లక్షల లోపే దొరకడం ఈ కారును మరింత అందుబాటులోకి తీసుకొస్తోంది.

సెలెరియో ఒక చిన్న కుటుంబానికి సరిపోయే విధంగా డిజైన్ చేయబడింది. 5 మంది సౌకర్యంగా కూర్చునేలా ఇంటీరియర్ స్పేస్ ఉండటం, రోజువారీ ప్రయాణాలకు సరిపడే కంఫర్ట్ ఇవ్వడం దీని ప్రత్యేకత. నగర ప్రయాణాల్లో సులభంగా నడపగలగడం, తక్కువ నిర్వహణ ఖర్చు కలిపి ఇది ఒక ప్రాక్టికల్ ఛాయిస్‌గా నిలుస్తోంది. ఇంజిన్ విషయానికి వస్తే, ఇందులో 1.0-లీటర్ K-సిరీస్ పెట్రోల్ ఇంజన్ అమర్చబడింది.

ఈ ఇంజన్ 66 bhp పవర్, 92 Nm పీక్ టార్క్‌ను ఉత్పత్తి చేయగలదు. 5-స్పీడ్ మాన్యువల్ ట్రాన్స్‌మిషన్‌తో పాటు AMT ఆప్షన్ కూడా అందుబాటులో ఉండటం, డ్రైవింగ్‌ను మరింత సులభతరం చేస్తుంది. ట్రాఫిక్ ఎక్కువగా ఉండే నగరాల్లో AMT వేరియంట్ వినియోగదారులకు మంచి సౌలభ్యం కలిగిస్తుంది. ఇదే కాకుండా, సెలెరియోను CNG బై-ఫ్యూయల్ ఆప్షన్‌లో కూడా అందించడం ఒక పెద్ద ప్లస్ పాయింట్.

పెట్రోల్‌తో పాటు కంప్రెస్డ్ నేచురల్ గ్యాస్‌పై కూడా నడిచే ఈ వేరియంట్, కొంత పనితీరు తగ్గినా, మైలేజీ విషయంలో మాత్రం అద్భుతమైన ఫలితాలను ఇస్తుంది. CNG వేరియంట్ ప్రతి కిలోకు 32.85 కిలోమీటర్ల వరకు మైలేజీ ఇస్తుంది. పెట్రోల్ వేరియంట్లలో కూడా మైలేజీ పరంగా సెలెరియో ముందంజలోనే ఉంది. మాన్యువల్ వేరియంట్ లీటరుకు 24.8 కిలోమీటర్ల వరకు, AMT వేరియంట్ లీటరుకు 25.75 కిలోమీటర్ల వరకు మైలేజీ ఇస్తుంది.