మధ్యతరగతి కస్టమర్ల డ్రీమ్ కార్.. కేవలం రూ.6.25 లక్షల బడ్జెట్‌లో 33కిమీ మైలేజ్ ఇచ్చే కారు

భారతదేశంలో ఒక సామాన్య మధ్యతరగతి కుటుంబం కొత్త కారు కొనాలనుకుంటే మొదట చూసేది బడ్జెట్, ఆ తర్వాత మైలేజ్. ఈ రెండు విషయాల్లోనూ కస్టమర్ల నమ్మకాన్ని గెలుచుకుని, దేశీయ సీఎన్‌జీ మార్కెట్లో రారాజుగా నిలిచింది మారుతి సుజుకి డిజైర్ (Maruti Suzuki Dzire). మన దేశంలో బడ్జెట్ ఫ్రెండ్లీ కార్లను అందించడంలో మారుతి సంస్థకు తిరుగులేదు.

అందులోనూ గత ఏడాది కాలంగా డిజైర్ సీఎన్‌జీ మోడల్ సాధిస్తున్న అమ్మకాలు ఆటోమొబైల్ రంగాన్ని సైతం ఆశ్చర్యపరుస్తున్నాయి. కేవలం పెట్రోల్ ధరల భారంతో ఇబ్బందిపడే మిడిల్ క్లాస్ వర్గాలను టార్గెట్ చేస్తూ, అత్యుత్తమ మైలేజ్ ఫీచర్లతో ఈ కారు మార్కెట్ ను శాసిస్తోంది. ఏకంగా టాప్-10 కార్ల లిస్టులో ఇది టాప్ పొజిషన్‌లో దూసుకుపోతోంది.

డిజైర్ కారు ఇంత పెద్ద సక్సెస్ కావడానికి ప్రధాన కారణం దాని మైలేజ్ సామర్థ్యం. ఈ కారు కేజీ సీఎన్‌జీకి ఏకంగా 33.73 కిలోమీటర్ల మైలేజీని ఇస్తుంది. దీనివల్ల ప్రతీనెల ఆఫీసులకు వెళ్లేవారికి, లాంగ్ జర్నీలు చేసే కుటుంబాలకు ఇంధన ఖర్చులు సగానికి సగం తగ్గిపోతాయి. విక్రయాల పరంగా చూస్తే, కేవలం జూన్ నెలలోనే రికార్డు స్థాయిలో 17,899 డిజైర్ కార్లు అమ్ముడయ్యాయి.

ఇక గత ఆర్థిక సంవత్సరంలో ఒక్క డిజైర్ సీఎన్‌జీ వేరియంట్లే 1,35,330 యూనిట్లు అమ్ముడవడం విశేషం. అంటే ప్రతి నెలా సగటున 11,277 మందికి పైగా కస్టమర్లు ఈ కారును కొనుగోలు చేస్తున్నారు. ఫ్యామిలీస్ మాత్రమే కాకుండా ఓలా, ఉబర్ వంటి కమర్షియల్ టాక్సీ రంగంలోనూ ఈ కారుకు తిరుగులేని డిమాండ్ ఉంది.

ధరల విషయానికి వస్తే.. సరికొత్త డిజైర్ బేస్ మోడల్ ప్రారంభ ఎక్స్-షోరూమ్ ధర రూ.6,25,600 గా ఉండగా, మధ్యతరగతికి ఫేవరెట్ అయిన సీఎన్‌జీ వేరియంట్ ప్రారంభ ఎక్స్-షోరూమ్ ధర రూ.8,03,100 గా ఉంది. కొత్త డిజైర్ కారులో సరికొత్త స్విఫ్ట్ హ్యాచ్‌బ్యాక్ నుండి తీసుకున్న 1.2-లీటర్, త్రీ-సిలిండర్ నేచురల్లీ ఆస్పిరేటెడ్ పెట్రోల్ ఇంజన్‌ను అమర్చారు.

ఈ పవర్‌ఫుల్ ఇంజన్ గరిష్టంగా 80 బ్రేక్ హార్స్ పవర్ (bhp), 112 న్యూటన్ మీటర్ల (Nm) టార్క్‌ను అందిస్తుంది. దీనికి 5-స్పీడ్ మాన్యువల్, ఆటోమేటిక్ (AMT) గేర్‌బాక్స్ ఆప్షన్లను ఇచ్చారు. కస్టమర్ల ఛాయిస్ ని బట్టి ఎల్‌ఎక్స్‌ఐ (LXi), విఎక్స్‌ఐ (VXi), జెడ్‌ఎక్స్‌ఐ (ZXi), జెడ్‌ఎక్స్‌ఐ ప్లస్ (ZXi Plus) అనే నాలుగు విభిన్న వేరియంట్లలో ఈ కారు లభిస్తోంది.

లుక్స్ పరంగా కొత్త డిజైర్ మునుపటి కంటే చాలా స్టైలిష్‌గా, ప్రీమియంగా మారింది. దీని ముందు భాగంలో అగ్రెసివ్ బంపర్, సరికొత్త ఎల్‌ఈడీ హెడ్‌లైట్స్, హారిజాంటల్ డీఆర్‌ఎల్స్ మరియు వెడల్పైన గ్రిల్‌ను అమర్చారు. కారు లోపల బేజ్, బ్లాక్ కలర్ కాంబినేషన్‌తో పాటు డాష్‌బోర్డ్‌పై చెక్క ముక్కల వంటి ఫినిషింగ్ ఇచ్చారు.

ఆపిల్ కార్ ప్లే, ఆండ్రాయిడ్ ఆటోను వైర్‌లెస్‌గా సపోర్ట్ చేసే 9-ఇంచుల పెద్ద టచ్‌స్క్రీన్, క్రూయిజ్ కంట్రోల్, వెనుక సీట్ల కోసం ప్రత్యేక ఏసీ వెంట్స్ ఉన్నాయి. అంతేకాదు ఈ సెగ్మెంట్‌లో మొట్టమొదటిసారిగా సింగిల్-పాన్ సన్‌రూఫ్ లాంటి లగ్జరీ ఫీచర్‌ను కూడా మిడిల్ క్లాస్ బడ్జెట్ కారులో అందించడం విశేషం.

ఒకప్పుడు మారుతి కార్లలో సేఫ్టీ అస్సలు ఉండదు అన్న అపోహ ఉండేది. కానీ కొత్త డిజైర్ ఆ అపోహను పూర్తిగా చెరిపేసింది. భద్రతా ప్రమాణాల్లో ఈ కారు సరికొత్త విప్లవాన్ని తెచ్చింది. అంతర్జాతీయ గ్లోబల్ ఎన్‌క్యాప్ (Global NCAP), దేశీయ భారత్ ఎన్‌క్యాప్ (Bharat NCAP) క్రాష్ టెస్టుల్లో ఈ కారు అత్యుత్తమమైన 5-స్టార్ సేఫ్టీ రేటింగ్‌ను సాధించింది.

మారుతి సుజుకి చరిత్రలోనే ఈ ఘనత సాధించిన మొట్టమొదటి కారు ఇదే. కస్టమర్ల రక్షణ కోసం ఇందులో బేసిక్ మోడల్ నుంచే 6 ఎయిర్‌బ్యాగ్‌లను స్టాండర్డ్‌గా ఇస్తున్నారు. వీటితో పాటు ఎలక్ట్రానిక్ స్టెబిలిటీ కంట్రోల్ (ESC), రియర్ పార్కింగ్ సెన్సార్లు, కారును అన్ని వైపులా చూస్తూ సురక్షితంగా పార్క్ చేసుకోవడానికి వీలుగా 360-డిగ్రీ కెమెరా వంటి టాప్-క్లాస్ సేఫ్టీ ఫీచర్లు ఇందులో ఉన్నాయి.