బుకింగ్స్ 4 వేలు.. ప్రొడక్షన్ 2 వేలు.. ఈ కారు కావాలంటే కచ్చితంగా క్యూలో నిలబడాల్సిందే

దేశంలో పెట్రోల్, డీజిల్ ధరలు రోజురోజుకూ పెరిగిపోతున్నాయి. కేవలం గత 11 రోజుల్లోనే లీటర్ పెట్రోల్, డీజిల్ ధరలు సుమారు 8 రూపాయల వరకు పెరగడంతో సామాన్యుడి జేబుకు చిల్లు పడుతోంది. ఈ నేపథ్యంలో వాహనదారుల చూపు ప్రత్యామ్నాయ ఇంధనాల వైపు మళ్లుతోంది. ముఖ్యంగా సీఎన్‌జీ, ఎలక్ట్రిక్ (ఈవీ) కార్లకు మార్కెట్లో గిరాకీ ఒక్కసారిగా పెరిగింది. పెరిగిన ఇంధన ధరల భారాన్ని తగ్గించుకోవడానికి చాలా మంది కస్టమర్లు ఇప్పుడిప్పుడే ఎలక్ట్రిక్ వాహనాల కొనుగోలుకు మొగ్గు చూపుతున్నారు.

ఇలాంటి తరుణంలో ప్రముఖ ఆటోమొబైల్ దిగ్గజం మారుతి సుజుకికి చెందిన ఎలక్ట్రిక్ కారు మార్కెట్లో సంచలనం సృష్టిస్తోంది. మారుతి సుజుకి అందిస్తున్న సరికొత్త ఇ-విటారా (e Vitara) మోడల్‌కు మే 2026 నెలలో ఏకంగా 4,000 కంటే ఎక్కువ బుకింగ్స్ వచ్చాయని కంపెనీ అధికారికంగా ప్రకటించింది.

అయితే, ప్రస్తుతం కంపెనీ ప్రొడక్షన్ కెపాసిటీ నెలకు కేవలం 2,000 యూనిట్లు మాత్రమే ఉండటం గమనార్హం. అంతేకాకుండా ఈ తయారు చేసిన కార్లలో ఎక్కువ భాగాన్ని మారుతి సంస్థ ఇతర దేశాలకు ఎగుమతి (ఎక్స్‌పోర్ట్) చేస్తోంది. దీనివల్ల దేశీయంగా కారు కోసం వెయిటింగ్ టైం పెరిగే అవకాశం ఉంది.

ఈ అద్భుతమైన బుకింగ్స్ వల్లే ఎలక్ట్రిక్ ఫోర్-వీలర్ విభాగంలో మారుతి సుజుకి మార్కెట్ వాటా ఒక్కసారిగా 6 శాతానికి చేరుకుంది. ఈ అరుదైన మైలురాయితో మారుతి సంస్థ విన్‌ఫాస్ట్, హ్యుందాయ్ వంటి ప్రముఖ అంతర్జాతీయ బ్రాండ్లను కూడా వెనక్కి నెట్టేసింది. అంతకుముందు ఏప్రిల్ నెలలో కూడా ఈ కారు 1,223 యూనిట్లు అమ్ముడైంది.

మారుతి బ్రాండ్ పై ఉన్న నమ్మకం, అలాగే ఇ-విటారాలో ఉన్న రేంజ్, అద్భుతమైన ఫీచర్ల వల్లే కస్టమర్లు ఈ కారును కొనేందుకు ఎగబడుతున్నారు. రాబోయే రోజుల్లో మారుతి మరిన్ని ఎలక్ట్రిక్ కార్లను తీసుకువస్తే టాటా మోటార్స్, మహీంద్రా, ఎంజీ మోటార్స్ వంటి ఈవీ లీడర్లకు గట్టి పోటీ ఎదురుకానుంది.

ప్రస్తుతం మారుతి సుజుకి వద్ద ఈవీ విభాగంలో కేవలం ఇ-విటారా ఒక్కటే అందుబాటులో ఉంది. అయినప్పటికీ ఇది మార్కెట్లో గట్టి పోటీ ఇస్తోంది. ప్రస్తుతం మహీంద్రా వద్ద 3 ఈవీ మోడళ్లు, ఎంజీ వద్ద 4, టాటా మోటార్స్ వద్ద ఏకంగా 6 ఈవీ మోడళ్లు అందుబాటులో ఉన్నాయి. అయినప్పటికీ మారుతి ఇ-విటారా రేట్లు మరియు ఫీచర్ల పరంగా అందరినీ ఆకట్టుకుంటోంది.

ఈ కారు బేస్ వేరియంట్ డెల్టా 49kWh బ్యాటరీ ప్యాక్‌తో వస్తుంది. దీని రెగ్యులర్ ధర 15.99 లక్షల రూపాయలు కాగా, బాస్ (BaaS) విధానంలో 10.99 లక్షల రూపాయలకే సొంతం చేసుకోవచ్చు. దీనిలో 10.25 ఇంచుల డిజిటల్ డ్రైవర్ డిస్‌ప్లే, 7 ఎయిర్‌బ్యాగ్‌లు, వైర్‌లెస్ ఆండ్రాయిడ్ ఆటో, ఆటోమేటిక్ క్లైమేట్ కంట్రోల్ వంటి ఆధునిక ఫీచర్లు ఉన్నాయి.

ఇక దీనికంటే పై వేరియంట్ అయిన జీటా (Zeta) మోడల్ 61kWh బ్యాటరీ ప్యాక్‌తో వస్తుంది. దీని రెగ్యులర్ ధర 17.49 లక్షల రూపాయలు కాగా, బాస్ విధానంలో 11.99 లక్షల రూపాయలకే లభిస్తుంది. డెల్టా వేరియంట్‌లోని ఫీచర్లతో పాటు ఇందులో వైర్‌లెస్ ఫోన్ ఛార్జర్, రియర్ పార్కింగ్ కెమెరా వంటి అదనపు సదుపాయాలు ఉంటాయి.

ఇక అన్నింటికంటే టాప్ వేరియంట్ అయిన ఆల్ఫా (Alpha) మోడల్ 61kWh బ్యాటరీ ప్యాక్‌తో వస్తుంది. దీని రెగ్యులర్ ధర 19.79 లక్షల రూపాయలు కాగా, బాస్ స్కీమ్ కింద 14.29 లక్షల రూపాయలకే పొందవచ్చు. ఇందులో లెవెల్ 2 ఏడీఏఎస్ (ADAS), 360-డిగ్రీల కెమెరా, వెంటిలేటెడ్ సీట్లు, సన్‌రూఫ్, ఇన్‌ఫినిటీ సౌండ్ సిస్టమ్ వంటి లగ్జరీ ఫీచర్లు ఉన్నాయి.

కస్టమర్ల బడ్జెట్, అవసరాలను బట్టి సరైన వేరియంట్‌ను ఎంచుకోవడం మంచిది. ఒకవేళ మీ బడ్జెట్ ఎక్కువగా ఉండి, అన్ని రకాల అత్యాధునిక ఫీచర్లు కావాలనుకుంటే ఆల్ఫా వేరియంట్ అద్భుతమైన ఆప్షన్ అవుతుంది. ఇది సింగిల్ ఛార్జ్‌పై 543 కిలోమీటర్ల రేంజ్ ఇస్తుందని కంపెనీ చెబుతోంది, అంటే నిజ జీవితంలో సులభంగా 400 కిలోమీటర్ల కంటే ఎక్కువ మైలేజ్ ఇస్తుంది. ఒకవేళ బడ్జెట్ తక్కువగా ఉండి, కేవలం సిటీ పరిధిలోనే తిరగాలనుకుంటే డెల్టా లేదా జీటా వేరియంట్లు కూడా మంచి వాల్యూ ఫర్ మనీ ఆప్షన్లుగా నిలుస్తాయి.