జూన్ 5న దేశంలోనే మొట్టమొదటి ఫ్లెక్స్-ఫ్యూయల్ కారు.. పెట్రోల్, డీజిల్‌లకు వీడ్కోలు చెప్పండి!

ఇటీవలి కాలంలో పెట్రోల్, డీజిల్ ధరలు ఒక్కసారిగా పెరగడంతో సాధారణ ప్రజలపై ఆర్థిక భారం గణనీయంగా పెరిగింది. ముఖ్యంగా ప్రతిరోజూ వాహనాలను ఉపయోగించే ఉద్యోగులు, చిన్న వ్యాపారులు, కుటుంబాలు ఇప్పుడు ఇంధన ఖర్చులతో ఇబ్బందులు ఎదుర్కొంటున్నారు. ఒకప్పుడు నెలవారీ బడ్జెట్‌లో చిన్న భాగంగా ఉండే ఇంధన ఖర్చులు, ఇప్పుడు చాలా కుటుంబాలకు పెద్ద భారంగా మారుతున్నాయి. ఇదే సమయంలో ప్రపంచవ్యాప్తంగా పర్యావరణ కాలుష్యం, కార్బన్ ఉద్గారాలు, దిగుమతి ఇంధనాలపై ఆధారపడటం వంటి సమస్యలు కూడా దేశాలను ప్రత్యామ్నాయ ఇంధనాల వైపు మళ్లేలా చేస్తున్నాయి. భారతదేశం కూడా ఇప్పుడు ఈ మార్పు దిశగా వేగంగా అడుగులు వేస్తోంది. ఎలక్ట్రిక్ వాహనాలతో పాటు బయో ఫ్యూయల్స్, ఇథనాల్ వంటి పర్యావరణ అనుకూల ఇంధనాలపై కేంద్ర ప్రభుత్వం ప్రత్యేక దృష్టి పెట్టింది.

ముఖ్యంగా రైతులకు అదనపు ఆదాయం కల్పించడం, ఇంధన దిగుమతులపై ఆధారపడకపోవడం, కాలుష్యాన్ని తగ్గించడం వంటి లక్ష్యాలతో ఫ్లెక్స్ ఫ్యూయల్ టెక్నాలజీపై ప్రభుత్వం ఆసక్తి చూపుతోంది. ఈ నేపథ్యంలో కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీ చేసిన ప్రకటన ఇప్పుడు చర్చనీయాంశమైంది. పర్యావరణ దినోత్సవం సందర్భంగా ఈ ఏడాది ఢిల్లీలో నిర్వహించే ప్రత్యేక కార్యక్రమంలో మారుతి సుజుకి ఫ్లెక్స్ ఫ్యూయల్ వాహనాన్ని ప్రదర్శించనున్నట్లు ఆయన వెల్లడించినట్లు సమాచారం.

జూన్ 5, 2026న జరగబోయే ఈ కార్యక్రమంలో ఇది వెలుగులోకి రానుందని తెలుస్తుంది. ఈ విషయాన్ని ఎక్స్ ఖాతాలో పీటీఐ పోస్ట్ చేసింది. ఈ ప్రకటనను బట్టి చూస్తే, Maruti Suzuki ఇప్పుడు భారత మార్కెట్ కోసం మరింత ఆధునిక ఫ్లెక్స్ ఫ్యూయల్ టెక్నాలజీపై పని చేస్తున్నట్లు స్పష్టమవుతోంది. ముఖ్యంగా E100 అంటే 100 శాతం ఇథనాల్‌తో కూడా నడిచే వాహనాన్ని కంపెనీ ఆవిష్కరించే అవకాశం ఉందని అంచనాలు వ్యక్తమవుతున్నాయి.

ప్రస్తుతం భారతదేశంలో ఎక్కువ వాహనాలు E20 వరకు ఇథనాల్ మిశ్రమంతో నడిచేలా తయారవుతున్నప్పటికీ, E100 స్థాయి టెక్నాలజీ దేశ ఆటోమొబైల్ రంగంలో పెద్ద మార్పుకు నాంది కావచ్చు. ఫ్లెక్స్ ఫ్యూయల్ వాహనాల ప్రత్యేకత ఏమిటంటే ఇవి పెట్రోల్‌తో పాటు అధిక ఇథనాల్ మిశ్రమాలను కూడా ఉపయోగించగలవు. దీనివల్ల ఇంధన ఖర్చులు తగ్గే అవకాశం ఉండటమే కాకుండా, కార్బన్ ఉద్గారాలు కూడా గణనీయంగా తగ్గుతాయి.

ప్రస్తుతం భారతదేశంలో ఒక్క ఫ్లెక్స్ ఫ్యూయల్ 4-వీలర్ వాహనం కూడా అమ్మకానికి అందుబాటులో లేదు. అయితే ఈ పరిస్థితి త్వరలో మారే అవకాశం కనిపిస్తోంది. మారుతి సుజుకి త్వరలో భారత మార్కెట్ కోసం E100 (100% ఇథనాల్) వరకు నడిచే ఫ్లెక్స్ ఫ్యూయల్ కారును తీసుకురానుందని సమాచారం. ప్రత్యేక ఇంధన వ్యవస్థతో రానున్న ఈ మోడల్ దేశంలోనే తొలి E100 ఫ్లెక్స్ ఫ్యూయల్ 4W వాహనంగా నిలిచే అవకాశం ఉంది.

ఇప్పటికే ప్రపంచంలోని కొన్ని దేశాల్లో ఫ్లెక్స్ ఫ్యూయల్ టెక్నాలజీ విజయవంతంగా ఉపయోగంలో ఉంది. ముఖ్యంగా బ్రెజిల్ వంటి దేశాల్లో అధిక ఇథనాల్ మిశ్రమాలతో నడిచే వాహనాలు సాధారణంగా కనిపిస్తాయి. ఇప్పుడు భారత్ కూడా అదే దిశగా అడుగులు వేస్తోంది. కేంద్ర ప్రభుత్వం కూడా ఇథనాల్ వినియోగాన్ని ప్రోత్సహించడంతో ఆటోమొబైల్ కంపెనీలు కొత్త టెక్నాలజీలపై దృష్టి పెడుతున్నాయి.

గత సంవత్సరం Japan Mobility Show 2025లో Suzuki మారుతి సుజుకి ఫ్రాంక్స్ ఫ్లెక్స్ ఫ్యూయల్ వెర్షన్‌ను ప్రదర్శించింది. అయితే ఆ మోడల్ E85 వరకు మాత్రమే ఇంధన మిశ్రమాలను ఉపయోగించగలదు. ఇప్పుడు భారత్‌లో మరింత అడ్వాన్స్‌డ్ E100 సామర్థ్యం గల కొత్త ఫ్లెక్స్ ఫ్యూయల్ వాహనాన్ని కంపెనీ పరిచయం చేసే అవకాశాలు కనిపిస్తున్నాయి. ఈ కారు గురించిన పూర్తి వివరాలు త్వరలో వెల్లడి కానున్నాయి.