నంబర్ వన్ స్టానం నుంచి 10వ ప్లేస్‎కు.. ఐదుగురు కూర్చున్నా ఇంకా చోటు ఉన్నా..ఈ కారును కొనే నాథుడే లేడు

భారతీయ ఆటోమొబైల్ దిగ్గజం మారుతి సుజుకికి తన అత్యంత ప్రజాదరణ పొందిన మోడళ్లలో ఒకటైన ఫ్రాంక్స్ (Fronx) విషయంలో ఇప్పుడు కొత్త తలపోటు మొదలైంది. ఐదుగురు కూర్చున్నా ఇంకా చోటు ఉంది అనిపించేంత విశాలమైన క్యాబిన్, అదిరిపోయే స్టైలిష్ లుక్‌తో దూసుకుపోతున్న ఈ కారు అమ్మకాలు ఒక్కసారిగా తగ్గడం మార్కెట్ వర్గాలను ఆశ్చర్యానికి గురిచేస్తోంది. ఒకప్పుడు దేశంలోనే నంబర్ వన్ స్థానంలో నిలిచిన ఈ క్రాస్ఓవర్ ఎస్‌యూవీ, ఇప్పుడు టాప్-10 జాబితాలో చిట్టచివరి స్థానానికి పడిపోవడంతో మారుతి సుజుకి యాజమాన్యం అప్రమత్తమైంది.

అమ్మకాల్లో భారీ తగ్గుదల
2023 ఆటో ఎక్స్‌పోలో గ్రాండ్ గా ఎంట్రీ ఇచ్చిన ఫ్రాంక్స్, తన అద్భుతమైన డిజైన్‌తో అప్పట్లో అందరినీ మాయ చేసింది. ముఖ్యంగా 2025 ఫిబ్రవరి నెలలో ఈ కారు అమ్మకాలు పీక్ స్టేజ్‌కు చేరుకున్నాయి. ఆ నెలలో ఏకంగా 21,461 యూనిట్లు అమ్ముడై దేశంలోనే అత్యధికంగా అమ్ముడైన కారుగా ఫ్రాంక్స్ రికార్డు సృష్టించింది. కానీ, సరిగ్గా ఏడాది తర్వాత అంటే 2026 ఫిబ్రవరి నెల నాటికి పరిస్థితి తలకిందులైంది.

గత నెలలో కేవలం 13,898 ఫ్రాంక్స్ కార్లు మాత్రమే అమ్ముడయ్యాయి. అంటే గత ఏడాదితో పోలిస్తే అమ్మకాలు దాదాపు 35 శాతం మేర క్షీణించాయి. జనవరి 2026లో కూడా కేవలం 13,353 కార్లు మాత్రమే అమ్ముడవడం చూస్తుంటే, నెలనెలా ఈ కారు డిమాండ్ తగ్గుతూ వస్తోందని స్పష్టమవుతోంది.

ఎక్కడ లోపం జరిగింది?
ఫ్రాంక్స్ కారు క్వాలిటీలో గానీ, పెర్ఫార్మెన్స్‌లో గానీ ఎలాంటి లోపం లేకపోయినా.. పోటీ పెరగడం, కస్టమర్ల అభిరుచులు మారడం దీనికి ప్రధాన కారణాలుగా కనిపిస్తున్నాయి. మారుతి సుజుకి తన లగ్జరీ విభాగం నెక్సా (NEXA) షోరూమ్‌ల ద్వారా ఈ కారును విక్రయిస్తోంది.

బాలెనో హ్యాచ్‌బ్యాక్, బ్రెజ్జా ఎస్‌యూవీల మధ్య ఒక పర్ఫెక్ట్ ఛాయిస్‌గా ఫ్రాంక్స్ నిలిచింది. దీని ధర రూ.6.85 లక్షల నుంచి రూ. 11.98 లక్షల (ఎక్స్-షోరూమ్) వరకు ఉంది. 1.2 లీటర్ పెట్రోల్, 1.0 లీటర్ టర్బో పెట్రోల్ ఇంజిన్ ఆప్షన్లతో లభిస్తున్న ఈ కారు, అద్భుతమైన డ్రైవింగ్ ఎక్స్‌పీరియన్స్‌ను ఇస్తుంది. అయినప్పటికీ, మార్కెట్లో కొత్తగా వస్తున్న కాంపాక్ట్ ఎస్‌యూవీలు దీనికి గట్టి పోటీని ఇస్తున్నాయి.

తిరిగి పుంజుకునే ఛాన్స్ ఉందా?
అమ్మకాలు తగ్గినంత మాత్రాన ఫ్రాంక్స్ పని అయిపోయినట్టు కాదని ఆటోమొబైల్ నిపుణులు అభిప్రాయపడుతున్నారు. మారుతి సుజుకి ఈ మోడల్‌లో త్వరలో ఏదైనా కొత్త అప్‌డేట్‌ను గానీ లేదా ఫేస్‌లిఫ్ట్ వెర్షన్‌ను గానీ ప్రవేశపెడితే తిరిగి అమ్మకాలు పుంజుకునే అవకాశం ఉంది.

ఇప్పటికే 2025 డిసెంబర్‌లో 20 వేల మార్కును దాటిన చరిత్ర దీనికి ఉంది. కాబట్టి చిన్నపాటి మార్పులు, మెరుగైన ఆఫర్లతో మళ్లీ కస్టమర్లను ఆకట్టుకోవచ్చని కంపెనీ భావిస్తోంది. తక్కువ ధరలో ఎక్కువ ఫీచర్లు కోరుకునే మధ్యతరగతి ప్రజలకు ఫ్రాంక్స్ ఎప్పటికీ ఒక మంచి ఆప్షనే. మరి మారుతి తన ఈ సింహాసనాన్ని కాపాడుకోవడానికి ఎలాంటి ఎత్తుగడలు వేస్తుందో వేచి చూడాలి. పోటీని ఎలా తట్టుకోవాలో, కొత్త అప్డేట్స్ ఏమైనా వస్తాయో చూడాలి.