వ్యాగన్ఆర్, స్విఫ్ట్ కాదు.. ఏకంగా 617 శాతం సేల్స్ గ్రోత్‌తో దుమ్మురేపిన మారుతి కారు

భారత ఆటోమొబైల్ మార్కెట్లో చిన్న హాచ్‌బ్యాక్ కార్ల విక్రయాల తాజా నివేదిక విడుదలైంది. ఎప్పటిలాగే దేశంలో అత్యధికంగా అమ్ముడవుతున్న కార్ల జాబితాలో మారుతి సుజుకి తన తిరుగులేని టాప్-4 స్థానాలను కైవసం చేసుకుని రికార్డు క్రియేట్ చేసింది. ఈ సేల్స్ లిస్ట్‌లో మారుతి వ్యాగన్ఆర్ మొదటి స్థానంలో నిలవగా, ఆ తర్వాత వరుసగా బలెనో, స్విఫ్ట్, ఆల్టో కార్లు నిలిచాయి. ఇవన్నీ కూడా నెలవారీగా పది వేలకు పైగా యూనిట్ల అమ్మకాలతో దూసుకుపోయాయి. అయితే ఈ మొత్తం నివేదికలో అందరినీ ఆశ్చర్యపరిచే ఒక సరికొత్త ట్రెండ్ వెలుగులోకి వచ్చింది.

సాధారణంగా ఎక్కువ మంది కొనే వ్యాగన్ఆర్ లేదా బలెనో కార్లకు వార్షిక వృద్ధి రేటు (YoY Growth) భారీగా ఉంటుందని అందరూ భావిస్తారు. కానీ ఈసారి సీన్ పూర్తిగా రివర్స్ అయింది. గత ఏడాది ఏప్రిల్ నెలతో పోలిస్తే.. ఈ ఏడాది ఏప్రిల్ 2026 లో ఊహించని విధంగా అత్యధిక శాతం వృద్ధిని నమోదు చేసిన మోడల్స్ పూర్తిగా వేరే ఉన్నాయి. ముఖ్యంగా మారుతి ఎస్-ప్రెస్సో, సిట్రోయెన్ సి3, ఎంజీ కామెట్ ఈవీ కార్ల అమ్మకాలు భారీగా పెరిగి మార్కెట్ విశ్లేషకులను సైతం ఆశ్చర్యంలో ముంచెత్తాయి.

ఈ జాబితాలో మొదటి స్థానంలో నిలిచిన మారుతి ఎస్-ప్రెస్సో (Maruti S-Presso) ఏకంగా 617.63 శాతం వార్షిక వృద్ధిని సాధించి రికార్డు సృష్టించింది. గత ఏడాది ఏప్రిల్‌లో ఈ కారు కేవలం 726 యూనిట్లు మాత్రమే అమ్ముడవగా, ఈ ఏడాది ఏప్రిల్‌లో ఏకంగా 5,210 యూనిట్లు అమ్ముడయ్యాయి. అంటే దాదాపు 4,484 కార్లు అదనంగా విక్రయించబడ్డాయి. మైక్రో ఎస్‌యూవీ లుక్ మరియు బడ్జెట్ ధరలో లభించడం వల్లే ఈ కారుకు ఒక్కసారిగా ఇంతటి డిమాండ్ పెరిగిందని స్పష్టమవుతోంది.

దీని తర్వాత ఫ్రెంచ్ కార్ బ్రాండ్ సిట్రోయెన్ సి3 (Citroen C3) కూడా అందరినీ షాక్‌కు గురిచేస్తూ 382.73 శాతం వృద్ధిని నమోదు చేసింది. గత ఏడాది కేవలం 110 యూనిట్లు అమ్ముడైన ఈ కారు, ఈసారి 531 యూనిట్ల విక్రయాలతో పుంజుకుంది. అలాగే చిన్న ఎలక్ట్రిక్ కారు అయిన ఎంజీ కామెట్ ఈవీ (MG Comet EV) 214.66 శాతం వృద్ధితో తన జోరును చాటుకుంది. గత ఏడాది 191 యూనిట్లు అమ్ముడైన చోట, ఈసారి 601 యూనిట్లతో సిటీ రైడర్లను ఆకట్టుకుంది.

ఇక ఎప్పటికీ ఎవర్ గ్రీన్ మోడల్ అయిన మారుతి ఆల్టో కూడా 93.65 శాతం వృద్ధితో తన సత్తా చాటింది. ఈ ఏడాది ఏప్రిల్‌లో ఆల్టో 10,856 యూనిట్ల అమ్మకాలతో టాప్ పొజిషన్‌లో నిలిచింది. హ్యుందాయ్ ఐ20 కారు 5,624 యూనిట్ల అమ్మకాలతో 59.55 శాతం వృద్ధిని సాధించగా, మారుతి సెలెరియో 55.77 శాతం వృద్ధితో 2,296 యూనిట్లు అమ్ముడైంది.

మరోవైపు ఓవరాల్ అమ్మకాల్లో మొదటి స్థానంలో ఉన్న మారుతి వ్యాగన్ఆర్ కారు ఏప్రిల్‌లో 18,648 యూనిట్లు అమ్ముడై 39.03 శాతం వార్షిక వృద్ధిని నమోదు చేసింది. దీని తర్వాత మారుతి బలెనో 18,306 యూనిట్లతో 38.89 శాతం వృద్ధిని, కొత్త అవతారంలో వచ్చిన మారుతి స్విఫ్ట్ 17,829 యూనిట్ల అమ్మకాలతో 22.18 శాతం వార్షిక వృద్ధిని సాధించాయి. టాటా ఆల్ట్రోజ్ కారు కూడా 19.06 శాతం మెరుగైన గ్రోత్‌తో 2,586 యూనిట్ల విక్రయాలను సాధించింది.

అయితే కొన్ని పాపులర్ కార్ల అమ్మకాలు మాత్రం ఈసారి దారుణంగా పడిపోయాయి. టయోటా గ్లాంజా 18.68 శాతం నష్టంతో 3,360 యూనిట్లకు పరిమితమవగా, రెనాల్ట్ క్విడ్ కారు 31.09 శాతం పడిపోయి కేవలం 410 యూనిట్లు మాత్రమే అమ్ముడైంది. టాటా టియాగో కారు కూడా 33.7 శాతం డిగ్రోత్‌తో 5,488 యూనిట్లకు పడిపోయింది. అన్నింటికంటే ఘోరంగా మారుతి ఇగ్నిస్ కారు అమ్మకాలు సున్నా (0 Units)కి పడిపోయి 100 శాతం డిగ్రోత్‌ను నమోదు చేయగా, సిట్రోయెన్ ఈసీ3 ఎలక్ట్రిక్ కారు కేవలం 13 యూనిట్ల అమ్మకాలతో భారీ పతనాన్ని చూసింది.