మైలేజ్ ఎక్కువ.. బడ్జెట్ తక్కువ.. మధ్య తరగతి వాడి కల నెరవేరుస్తున్న కార్లు ఇవే

మన దేశంలో మధ్యతరగతి కుటుంబాల సొంత కారు కలని నిజం చేయడంలో మారుతి సుజుకి (Maruti Suzuki) ఎప్పుడూ ముందే ఉంటుంది. ముఖ్యంగా తక్కువ బడ్జెట్, భారీ మైలేజ్ ఇచ్చే కార్లకు మన దేశంలో డిమాండ్ ఎప్పటికీ తగ్గదు. తాజాగా విడుదలైన మే 2026 కార్ల సేల్స్ నివేదిక ప్రకారం.. దేశంలోనే అత్యంత చౌకైన మారుతి సుజుకి ఆల్టో K10, ఎస్-ప్రెస్సో కార్లు మార్కెట్లో సరికొత్త రికార్డులతో దూసుకుపోయాయి.

ఈ రెండు చిన్న కార్లను గత నెలలో వేలాది మంది కస్టమర్లు ఎగబడి కొనుగోలు చేశారు. రూ.3.50 లక్షల బడ్జెట్ ధర, లీటరుకు దాదాపు 34 కిలోమీటర్ల వరకు మైలేజ్ ఇచ్చే ఈ రెండు కార్ల సేల్స్ రిపోర్ట్, వాటి ఫీచర్లు, ధరల పూర్తి వివరాలను తెలుసుకుందాం.

మారుతి సుజుకికి చెందిన ఎంట్రీ లెవెల్ కార్లయిన ఆల్టో K10 (Alto K10), ఎస్-ప్రెస్సో (S-Presso) లు మే 2026 నెలలో అమ్మకాల్లో సరికొత్త రికార్డు సృష్టించాయి. ఈ రెండు మోడల్స్ కలిసి గత నెలలో ఏకంగా 16,275 యూనిట్ల విక్రయాలను నమోదు చేశాయి. గతేడాది మే 2025 నెలలో ఈ రెండు కార్ల అమ్మకాలు కేవలం 6,776 యూనిట్లుగా మాత్రమే ఉండేవి.

గతేడాదితో పోల్చి చూస్తే ఈసారి చిన్న కార్ల విక్రయాలు ఏకంగా రెండింతల కంటే ఎక్కువ పెరగడం విశేషం. కేవలం ఏప్రిల్ నెలలోనే మారుతి సుజుకి మొత్తం 1.90 లక్షల కార్లను విక్రయించి 40 శాతం వార్షిక వృద్ధిని సాధించగా.. మే నెలలోనూ అదే జోరును కంటిన్యూ చేసింది. మిడిల్ క్లాస్ కుటుంబాల మొదటి ఛాయిస్ ఎప్పుడూ ఆల్టో కారే అని చెప్పాలి. లేటెస్ట్ ఆల్టో K10 మోడల్‌లో కంపెనీ సరికొత్త మోడ్రన్ ఫీచర్లను అందిస్తోంది.

ఇందులో 7-ఇంచుల స్మార్ట్‌ప్లే స్టూడియో టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ స్పీడోమీటర్, స్టీరింగ్ మౌంటెడ్ కంట్రోల్స్, కీ‌లెస్ ఎంట్రీ వంటి ఆప్షన్లు ఉన్నాయి. ప్రయాణికుల సేఫ్టీ కోసం మారుతి సుజుకి ఈ చిన్న కారులో కూడా స్టాండర్డ్‌గా 6-ఎయిర్‌బ్యాగ్స్, ఈబీడీతో కూడిన ఏబీఎస్ (ABS), రివర్స్ పార్కింగ్ సెన్సార్స్ వంటి పవర్‌ఫుల్ సేఫ్టీ ఫీచర్లను ఇస్తోంది.

ఆల్టో K10 కారులో 1.0-లీటర్ నెక్స్ట్-జెన్ కె-సిరీస్ డ్యూయల్ జెట్ పెట్రోల్ ఇంజన్‌ను వాడారు. ఇది 66.6 bhp పవర్, 89 Nm టార్క్‌ను ప్రొడ్యూస్ చేస్తుంది. ఈ కారు 5-స్పీడ్ మాన్యువల్, ఏఎమ్‌టీ (ఆటోమేటిక్) గేర్‌బాక్స్ ఆప్షన్లలో లభిస్తుంది.

మైలేజ్ పరంగా చూస్తే పెట్రోల్ వేరియంట్ లీటరుకు 24.39 కిలోమీటర్ల యావరేజ్ ఇవ్వగా.. సీఎన్‌జీ (CNG) వేరియంట్ అయితే ఏకంగా కేజీకి 33.85 కిలోమీటర్ల మైలేజ్ ఇస్తూ కస్టమర్ల జేబుకు భారం తగ్గించేస్తోంది. దీని ఎక్స్-షోరూమ్ ధర కేవలం రూ. 3.99 లక్షల నుంచి ప్రారంభమై టాప్ మోడల్ రూ. 5.96 లక్షల వరకు ఉంటుంది.

మారుతి సుజుకి నుంచి వచ్చిన మరో బడ్జెట్ కారు ఎస్-ప్రెస్సో (S-Presso). ఇది తన ఎక్కువ గ్రౌండ్ క్లియరెన్స్, మస్కులర్ డిజైన్ కారణంగా కస్టమర్లకు ఒక చిన్న మినీ ఎస్‌యూవీ (Mini SUV) కారులో కూర్చున్న ఫీలింగ్‌ను ఇస్తుంది. ఈ కారు ఇంటీరియర్ కూడా చాలా విభిన్నంగా ఉంటుంది.

సెంటర్ కన్సోల్‌లో అమర్చిన డిజిటల్ ఇన్‌స్ట్రుమెంట్ క్లస్టర్ దీనికి ప్రత్యేక లుక్‌ను తీసుకువచ్చింది. ఫీచర్ల పరంగా ఇందులో కూడా టచ్‌స్క్రీన్ ఇన్ఫోటైన్‌మెంట్, పవర్ విండోస్, ఎలక్ట్రికల్లీ అడ్జస్టబుల్ ఓఆర్వీఎమ్ (ORVM) వంటి సౌకర్యాలు ఉన్నాయి.

ఎస్-ప్రెస్సో కారులో కూడా ఆల్టో తరహాలోనే 1.0-లీటర్ పెట్రోల్ ఇంజన్‌ను అందించారు. ఇది కూడా 66.6 bhp పవర్, 89 Nm టార్క్‌ను జనరేట్ చేస్తుంది. సిటీలో ట్రాఫిక్ మధ్య ఈ కారును నడపడం చాలా సులభం. ఇక మైలేజ్ విషయానికి వస్తే పెట్రోల్ మోడల్ లీటరుకు 24.12 నుండి 25.30 కిలోమీటర్ల మైలేజ్ ఇస్తుంది.

సీఎన్‌జీ వేరియంట్ అయితే కేజీకి 32.73 కిలోమీటర్ల మైలేజ్ ఇస్తుంది. మార్కెట్లో దీని ప్రారంభ ఎక్స్-షోరూమ్ ధర కేవలం రూ. 3.50 లక్షలుగా మాత్రమే ఉంది, అలాగే టాప్ వేరియంట్ ధర రూ.5.25 లక్షల వరకు ఉంటుంది.