బైక్ లాగా మైలేజ్ ఇచ్చే కారు.. దేశంలో చాలా మంది కొనేశారు.. ఇప్పుడు కొనే వాళ్లకు రూ.30,000 తగ్గిస్తారు

కొత్త కారు కొనుగోలు చేయాలని ప్లాన్ చేస్తున్న మధ్యతరగతి వాహనదారులకు దేశీయ ఆటోమొబైల్ దిగ్గజం మారుతి సుజుకి (Maruti Suzuki) సూపర్ న్యూస్ చెప్పింది. జూన్ 2026 నాటికి తన విభిన్న మోడళ్లపై బంపర్ డిస్కౌంట్ ఆఫర్లను కంపెనీ ప్రకటించింది. ఇందులో భాగంగానే, మార్కెట్లో అత్యంత ఆదరణ పొందిన ప్రీమియం హ్యాచ్‌బ్యాక్ మోడల్ మారుతి సుజుకి బాలెనో (Maruti Suzuki Baleno) పై భారీ తగ్గింపును అందిస్తోంది. మధ్యతరగతి బడ్జెట్‌కు సరిపోయేలా ఈ కారు ధర ఉండటంతో పాటు ఇప్పుడు ఆఫర్లు కూడా తోడవడంతో షోరూమ్‌ల వద్ద కస్టమర్ల రద్దీ పెరుగుతోంది.

రూ.30,000 వరకు ఆదా
ప్రస్తుత జూన్ ఆఫర్లలో భాగంగా కొత్తగా మారుతి బాలెనో కారును కొనుగోలు చేసే కస్టమర్లు గరిష్టంగా రూ.30,000 వరకు ఆదా చేసుకోవచ్చు. ఈ ఆఫర్ కింద కంపెనీ అందిస్తున్న కస్టమర్ క్యాష్ డిస్కౌంట్‌తో పాటు ఎక్స్ఛేంజ్ బోనస్, కార్పొరేట్ బెనిఫిట్స్ వంటి ఇతర ప్రయోజనాలు కూడా కలిసి ఉన్నాయి.

అయితే, ఈ డిస్కౌంట్ వివరాలు వివిధ నగరాలు, డీలర్‌షిప్‌లు, కారు వేరియంట్‌లను బట్టి స్వల్పంగా మారే అవకాశం ఉందని, పూర్తి వివరాల కోసం కస్టమర్లు తమ సమీప మారుతి నెక్సా (NEXA) షోరూమ్‌ను సంప్రదించాలని మార్కెట్ వర్గాలు చెబుతున్నాయి.

సేల్స్ మార్కెట్లో బాలెనో సరికొత్త రికార్డు
మారుతి సుజుకి బాలెనో అమ్మకాల గణాంకాలను పరిశీలిస్తే దీని క్రేజ్ ఏంటో స్పష్టంగా అర్థమవుతుంది. గత నెల, అంటే మే 2026 లో దేశవ్యాప్తంగా మొత్తం 18,396 బాలెనో కార్లు అమ్ముడయ్యాయి.

గత ఏడాది మే 2025 లో జరిగిన 11,618 కార్ల అమ్మకాలతో పోలిస్తే.. ఈసారి ఏకంగా 58 శాతం వార్షిక వృద్ధి నమోదైంది. గత నెలలో మారుతి సుజుకి కంపెనీ పరంగా అత్యధికంగా అమ్ముడైన మోడళ్ల జాబితాలో బాలెనో నాలుగో స్థానాన్ని కైవసం చేసుకుని బెస్ట్ సెల్లింగ్ కార్లలో ఒకటిగా నిలిచింది.

పవర్‌ఫుల్ ఇంజన్ ఆప్షన్లు
సాంకేతిక పరంగా మారుతి బాలెనోలో పవర్‌ఫుల్ 1.2-లీటర్ పెట్రోల్ ఇంజన్ అమర్చబడి ఉంది. ఇది గరిష్టంగా 90 బీహెచ్‌పీ (bhp) పవర్‌ను, 113 ఎన్ఎమ్ (Nm) పీక్ టార్క్‌ను ఉత్పత్తి చేసే సామర్థ్యాన్ని కలిగి ఉంటుంది. ఈ కారు అటు మాన్యువల్, ఇటు ఆటోమేటిక్ గేర్‌బాక్స్ ఆప్షన్లలో లభిస్తుంది.

పెట్రోల్ వేరియంట్‌తో పాటు మైలేజ్ ప్రియుల కోసం కంపెనీ ఇందులో ఫ్యాక్టరీ ఫిట్టెడ్ సీఎన్జీ (CNG) పవర్‌ట్రెయిన్ ఆప్షన్‌ను కూడా అందిస్తోంది. ప్రస్తుతం భారత మార్కెట్లో బాలెనో మొత్తం 4 వేరియంట్లలో, 6 ఆకర్షణీయమైన కలర్ ఆప్షన్లలో కొనుగోలుకు సిద్ధంగా ఉంది.

ఫీచర్లు, సేఫ్టీలో అదుర్స్
ఫీచర్ల విషయానికి వస్తే మారుతి కంపెనీ ఎక్కడా రాజీ పడలేదు. ఇందులో 9-ఇంచుల భారీ టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ స్మార్ట్‌ఫోన్ ఛార్జర్, క్రూజ్ కంట్రోల్, ఆటోమేటిక్ క్లైమేట్ కంట్రోల్, ఆపిల్ కార్‌ప్లే, ఆండ్రాయిడ్ ఆటో కనెక్టివిటీ వంటి లేటెస్ట్ ఫీచర్లు ఉన్నాయి.

వీటికి తోడు ఎల్‌ఈడీ ప్రొజెక్టర్ హెడ్‌లైట్లు కారుకు ప్రీమియం లుక్‌ను ఇస్తాయి. ముఖ్యంగా సేఫ్టీ పరంగా ఈ కారులో 6 ఎయిర్‌బ్యాగ్‌లు, 360-డిగ్రీ కెమెరా వంటి అడ్వాన్స్‌డ్ సేఫ్టీ ఫీచర్లు ఉండటం గమనార్హం.

బడ్జెట్ ధర, అదిరిపోయే మైలేజ్
భారత మార్కెట్లో మారుతి బాలెనో ఎక్స్-షోరూమ్ ధర రూ.5.63 లక్షల నుంచి ప్రారంభమై టాప్ ఎండ్ మోడల్ ధర రూ.8.96 లక్షల వరకు ఉంటుంది. మైలేజ్ పరంగా చూస్తే, ఈ కారు పెట్రోల్ వేరియంట్ లీటరుకు 20 నుండి 22 కిలోమీటర్ల వరకు మైలేజ్ ఇస్తుంది.

అదే సిఎన్జీ (CNG) మోడ్‌లో ప్రయాణిస్తే ఏకంగా 30 కిలోమీటర్ల వరకు మైలేజ్ ఇస్తుందని కంపెనీ క్లెయిమ్ చేస్తోంది. తక్కువ బడ్జెట్, ఎక్కువ మైలేజ్, అదిరిపోయే లగ్జరీ ఫీచర్లు ఉన్న కారు కోసం చూసేవారికి బాలెనో ఒక బెస్ట్ ఆప్షన్ అని చెప్పవచ్చు.