దేశంలోనే జనాలు ఎక్కువగా బుక్ చేసుకుంటున్న కారు ఇదే.. వెయిటింగ్ పీరియడ్ ఎంతో తెలుసా?

ఇటీవల భారత మార్కెట్లోకి అడుగుపెట్టిన కొత్త మారుతి సుజుకి ఇ-విటారా (Maruti Suzuki e Vitara) ఎలక్ట్రిక్ SUV మంచి చర్చనీయాంశంగా మారింది. ఎలక్ట్రిక్ సెగ్మెంట్‌లో మారుతి సుజుకి తీసుకున్న ఈ పెద్ద అడుగు కంపెనీకి మాత్రమే కాకుండా, మొత్తం మార్కెట్‌కే ఒక కొత్త దిశను చూపిస్తోంది. ఆధునిక డిజైన్, హైటెక్ ఫీచర్లు, నమ్మకమైన బ్రాండ్ ఇమేజ్ కలిపి ఈ ఇ-విటారాపై వినియోగదారుల్లో భారీ ఆసక్తి కనిపిస్తోంది. ముఖ్యంగా సరసమైన ధర శ్రేణిలో ఎలక్ట్రిక్ SUV అందుబాటులోకి రావడం చాలా మందికి ఆకర్షణీయంగా మారింది. అయితే, ఈ డిమాండ్ కారణంగా ఇప్పుడు వెయిటింగ్ పీరియడ్ కూడా పెరిగింది.

ప్రస్తుతం ఈ ఎలక్ట్రిక్ SUV డెలివరీ పొందాలంటే సుమారు 6 నుండి 8 వారాల వరకు, అంటే దాదాపు ఒకన్నర నుంచి రెండు నెలల వరకు వేచి ఉండాల్సి వస్తోంది. కొత్తగా లాంచ్ అయిన మోడల్ కావడంతో పాటు, ఎలక్ట్రిక్ వాహనాలపై పెరుగుతున్న ఆసక్తి ఈ వెయిటింగ్ పీరియడ్‌కు ప్రధాన కారణంగా భావిస్తున్నారు. డీలర్‌షిప్ వర్గాల సమాచారం ప్రకారం, ముఖ్యంగా ఎంట్రీ-లెవల్ వేరియంట్‌కు మంచి స్పందన లభిస్తోంది.

తక్కువ ధరలో ఎలక్ట్రిక్ SUV అనుభవాన్ని పొందాలనుకునే వినియోగదారులు ఈ వేరియంట్‌ను ఎక్కువగా ఎంపిక చేస్తున్నారని తెలుస్తోంది. ఈ విషయాన్ని ప్రముఖ ఆటోమొబైల్ వేదిక డెల్టా ఆటోకార్ తన నివేదికలో వెల్లడించింది. డిమాండ్ పెరుగుతున్న నేపథ్యంలో వెయిటింగ్ పీరియడ్ కొంత ఎక్కువగా ఉన్నప్పటికీ, వినియోగదారుల ఆసక్తి మాత్రం తగ్గడం లేదు. రాబోయే నెలల్లో ఉత్పత్తి సామర్థ్యాన్ని పెంచితే, డెలివరీ సమయాలు తగ్గే అవకాశం కూడా ఉంది.

భారత ఎలక్ట్రిక్ మార్కెట్లో కొత్త అధ్యాయాన్ని ప్రారంభించిన ఇ-విటారా ధరల విషయంలో కూడా చాలా ఆకర్షణీయంగా నిలుస్తోంది. ఈ ఎలక్ట్రిక్ SUV స్టాండర్డ్ మోడల్ ధరలు కనిష్టంగా రూ.15.99 లక్షల నుంచి ప్రారంభమై గరిష్టంగా రూ.20.01 లక్షల వరకు (ఎక్స్-షోరూమ్) ఉంటాయి. ఈ ధర శ్రేణి చూస్తే, ప్రీమియం ఫీచర్లతో కూడిన ఎలక్ట్రిక్ SUV కోసం ఇది పోటీదారులకు గట్టి సవాల్‌గా మారే అవకాశం ఉంది.

ప్రత్యేకంగా చెప్పాలంటే, ఈ మోడల్ BAS (Battery-as-a-Service) పథకం కింద కూడా అందుబాటులో ఉంది. ఈ స్కీమ్ ద్వారా వాహనం ప్రారంభ ధరను తగ్గించారు. BAS ఆప్షన్ ఎంచుకుంటే, ప్రారంభ ధర రూ.10.99 లక్షల నుంచే లభిస్తుంది. అయితే, వినియోగదారులు ప్రతి కిలోమీటర్‌కు రూ.3.99 అద్దె రుసుము చెల్లించాల్సి ఉంటుంది. దీని వల్ల ప్రారంభ ఖర్చు తక్కువగా ఉండటం, ఎలక్ట్రిక్ వాహనాన్ని కొనాలనుకునే వారికి పెద్ద ప్లస్ పాయింట్‌గా మారింది.

డిజైన్ విషయానికి వస్తే, ఇ-విటారా ఒక ఆధునిక, ఆకర్షణీయమైన రూపాన్ని కలిగి ఉంది. ముందుభాగంలో ప్రీమియం LED హెడ్‌లైట్లు, శార్ప్ LED DRLలు దానికి ఫ్యూచరిస్టిక్ లుక్ ఇస్తాయి. అదనంగా LED ఫాగ్ లైట్లు, స్టైలిష్ LED టెయిల్ లైట్లు వెనుక భాగాన్ని మరింత ప్రీమియంగా చూపిస్తాయి. 19-అంగుళాల అల్లాయ్ వీల్స్ ఈ SUVకి బలమైన రోడ్ ప్రెజెన్స్‌ను అందిస్తాయి.

ఈ ఎలక్ట్రిక్ SUV రెండు బ్యాటరీ ఆప్షన్లతో 49 kWh, 61 kWh బ్యాటరీ ప్యాక్‌లతో వస్తుంది. పూర్తి ఛార్జ్‌పై ఈ SUV సుమారు 440 కిలోమీటర్ల నుంచి గరిష్టంగా 543 కిలోమీటర్ల వరకు రేంజ్‌ను అందించగలదు. అంటే, రోజువారీ నగర ప్రయాణాలకే కాకుండా, లాంగ్ డ్రైవ్స్‌కి కూడా ఇది సరిపడే సామర్థ్యాన్ని కలిగి ఉంది. పనితీరు విషయానికి వస్తే, గరిష్ట వేగం గంటకు 150 కి.మీ. వరకు ఉంటుంది.