వద్దన్నా ఎగబడి కొంటున్నారు..మారుతి ఈవీకి విదేశాల్లో పట్టాభిషేకం..మన దేశంలో ఎప్పుడు వస్తుందో ఏమో?

మారుతి సుజుకి తన మొట్టమొదటి ఎలక్ట్రిక్ ఎస్‌యూవీ ఇ-విటారా(e-Vitara)తో భారత ఆటోమొబైల్ రంగంలో కొత్త చరిత్ర సృష్టించేందుకు సిద్ధమైంది. ఇప్పటికే యూరప్ మార్కెట్లలో మేడ్ ఇన్ ఇండియా ట్యాగ్‌తో సంచలనం సృష్టిస్తున్న ఈ కారు, అతి త్వరలో మన దేశీ రోడ్లపై కూడా సందడి చేయబోతోంది. గుజరాత్‌లోని హన్సల్‌పూర్ ప్లాంట్ నుంచి ఎగుమతి అవుతున్న ఈ కారు, గ్లోబల్ మార్కెట్‌లో మారుతి సత్తాను చాటిచెబుతోంది.

ఎగుమతుల్లో మారుతి సరికొత్త రికార్డు
మారుతి సుజుకి తన తొలి ఎలక్ట్రిక్ కారును విదేశాల్లోనే ముందుగా పరిచయం చేయడం అందరినీ ఆశ్చర్యపరిచింది. 2025 ఆగస్టు నుంచి ప్రారంభమైన ఎగుమతులలో ఇప్పటివరకు 13,000 కంటే ఎక్కువ యూనిట్లు 29 దేశాలకు చేరుకున్నాయి.

2025 క్యాలెండర్ ఇయర్‌లో మారుతి మొత్తం 3.95 లక్షల వాహనాలను ఎగుమతి చేసి, గత ఏడాదితో పోలిస్తే 21 శాతం వృద్ధిని నమోదు చేసింది. ఇది భారత తయారీ రంగం సాధించిన భారీ విజయంగా నిపుణులు అభివర్ణిస్తున్నారు.

బ్యాటరీ ప్యాక్, అదిరిపోయే రేంజ్: ఇ-విటారాలో వినియోగదారుల అవసరాలకు తగ్గట్టుగా రెండు రకాల బ్యాటరీ ఆప్షన్లను అందిస్తున్నారు.
49kWh బ్యాటరీ: ఇది దాదాపు 344 కిలోమీటర్ల (WLTP) రేంజ్ ఇస్తుంది. ఇది సిటీ డ్రైవింగ్‌కు పర్ఫెక్ట్‌గా ఉంటుంది.

61kWh బ్యాటరీ: హైవే రైడ్స్ ఇష్టపడే వారి కోసం ఈ ప్యాక్ అత్యుత్తమ ఎంపిక. ఇది ఒక్కసారి ఫుల్ ఛార్జ్ చేస్తే 543 కిలోమీటర్ల (ARAI) భారీ రేంజ్‌ను వాగ్దానం చేస్తోంది. అంటే మీరు ఒక్కసారి ఛార్జ్ చేస్తే హైదరాబాద్ నుండి తిరుపతికి నిశ్చింతగా వెళ్లిపోవచ్చు. ఈ బ్యాటరీలో ఆల్ వీల్ డ్రైవ్(AWD) సదుపాయం కూడా ఉంది.

సేఫ్టీలో 5-స్టార్ రేటింగ్: మారుతి కార్లంటే భద్రత తక్కువ అనే ముద్రను చెరిపేస్తూ, ఇ-విటారా భారత్ NCAP క్రాష్ టెస్ట్‌లో 5-స్టార్ రేటింగ్ సాధించింది. ఇందులో 7 ఎయిర్‌బ్యాగ్‌లు, లెవల్ 2 ADAS (Advanced Driver Assistance Systems), 360-డిగ్రీ కెమెరా, ఎలక్ట్రానిక్ పార్కింగ్ బ్రేక్ వంటి అత్యాధునిక సేఫ్టీ ఫీచర్లు ఉన్నాయి. మారుతి నుంచి వస్తున్న అత్యంత సురక్షితమైన కార్లలో ఇది ఒకటిగా నిలవనుంది.

ఫీచర్లు, లగ్జరీ ఇంటీరియర్స్: లోపల అడుగుపెడితే ఇది మారుతి కారేనా అనిపించేలా ప్రీమియం లుక్ ఉంటుంది. 10.25-అంగుళాల డ్యూయల్ స్క్రీన్ డిస్‌ప్లే, వైర్‌లెస్ ఛార్జింగ్, పనోరమిక్ సన్‌రూఫ్, వెంటిలేటెడ్ సీట్లు, ఇన్ఫినిటీ సౌండ్ సిస్టమ్ వంటి ఫీచర్లు కస్టమర్లకు లగ్జరీ అనుభూతిని ఇస్తాయి. ఇది డెల్టా (Delta), జీటా (Zeta), ఆల్ఫా (Alpha) అనే మూడు వేరియంట్లలో అందుబాటులోకి రానుంది.

ఇండియాలో ధర, లాంచ్ డేట్: మారుతి ఇ-విటారా జనవరి 15, 2026 న భారత మార్కెట్లో అధికారికంగా విడుదలయ్యే అవకాశం ఉంది. దీని ఎక్స్-షోరూమ్ ధర రూ.17 లక్షల నుంచి రూ.22.5 లక్షల మధ్య ఉండే అవకాశం ఉంది. ఇది టాటా నెక్సాన్ ఈవీ, మహీంద్రా BE 6, హ్యుందాయ్ క్రెటా ఎలక్ట్రిక్ వంటి కార్లకు గట్టి పోటీ ఇవ్వనుంది. మారుతి తన ప్రీమియం నెట్‌వర్క్ నెక్సా(Nexa) ద్వారా ఈ కార్లను విక్రయించనుంది.