543 కిమీ రేంజ్, సోఫా లాంటి సీట్లు.. మారుతి సుజుకి నుంచి త్వరలో సరికొత్త 7 సీటర్ ఎలక్ట్రిక్ ఎంపీవీ

భారత మార్కెట్లో ఎలక్ట్రిక్ కార్ల(electric cars) హవా రోజురోజుకీ పెరుగుతోంది. ఈ నేపథ్యంలో దేశంలోనే అతిపెద్ద కార్ల తయారీ సంస్థ మారుతి సుజుకి(maruti suzuki) ఇప్పుడు ఫ్యామిలీల కోసం ప్రత్యేకంగా భారీ 7 సీటర్ ఎలక్ట్రిక్ ఎంపీవీని తీసుకురావడానికి సిద్ధమవుతోంది. సోఫా లాంటి సీట్లు, 500కి పైగా రేంజ్, లగ్జరీ ఫీచర్లతో ఈ కారు మధ్యతరగతి కుటుంబాలను టార్గెట్ చేస్తోంది.

మారుతి సుజుకి ఇప్పుడు ఎలక్ట్రిక్ వాహనాల(electric vehicles) మార్కెట్లో విప్లవం సృష్టించేందుకు సిద్ధమైంది. ఇప్పటికే తన అగ్రశ్రేణి మోడళ్లు అయిన బ్రెజ్జా, ఫ్రాంక్స్(fronx), బాలెనోలను అప్‌డేట్ చేస్తున్న కంపెనీ, ఇప్పుడు ఫ్యామిలీ మ్యాన్ కోసం ఒక అదిరిపోయే 7 సీటర్ ఎలక్ట్రిక్ ఎంపీవీని (MPV) సిద్ధం చేస్తోంది. ప్రస్తుతం ఈ కారు వైఎంసీ (YMC) అనే కోడ్ నేమ్‌తో తయారవుతోంది.

ఈ కొత్త ఎలక్ట్రిక్ ఎంపీవీని మారుతి సుజుకి తన రాబోయే ఈ-విటారా(e vitara) ఎస్‌యూవీ ఆధారంగా నిర్మిస్తోంది. దీనికోసం సుజుకి, టయోటా సంయుక్తంగా కలిసి ప్రత్యేకంగా హార్టెక్-ఈ (Heartect-e) అనే స్కేట్‌బోర్డ్ ఆర్కిటెక్చర్‌ను అభివృద్ధి చేశాయి. ఈ ప్లాట్‌ఫారమ్ వల్ల కారు లోపల స్థలం చాలా ఎక్కువగా ఉంటుంది. సుమారు 4.5 మీటర్ల పొడవు ఉండే ఈ కారులో పెద్ద బ్యాటరీ ప్యాక్ అమర్చేందుకు వీలుంటుంది.

మారుతి వైఎంసీ(maruti ymc) మోడల్‌లో రెండు రకాల బ్యాటరీ ఆప్షన్లు ఉండవచ్చని సమాచారం. 49 కిలోవాట్, 61.1 కిలోవాట్ బ్యాటరీ ప్యాక్ లతో ఇది రానుంది. ఇందులో పెద్ద బ్యాటరీని వాడితే ఒక్కసారి ఫుల్ ఛార్జ్ చేస్తే ఏకంగా 543 కిలోమీటర్ల రేంజ్ ఇస్తుందని కంపెనీ ధీమాగా ఉంది. అంటే లాంగ్ ట్రిప్పులకు వెళ్లే వారికి ఛార్జింగ్ టెన్షన్ అస్సలు ఉండదు.

ఈ కారులో ప్రయాణీకులకు విమానంలోని బిజినెస్ క్లాస్ లాంటి అనుభూతిని అందించాలని మారుతి(maruti) లక్ష్యంగా పెట్టుకుంది. అందుకే ఇందులో సోఫా లాంటి మెత్తని సీట్లను అందిస్తోంది. వీటితో పాటు భారీ టచ్‌స్క్రీన్ ఇన్ఫోటైన్‌మెంట్, డిజిటల్ ఇన్‌స్ట్రుమెంట్ క్లస్టర్, వైర్‌లెస్ ఛార్జింగ్, 360-డిగ్రీ కెమెరా, లెవల్-2 ఏడీఏఎస్ (ADAS) వంటి సేఫ్టీ ఫీచర్లు కూడా ఉండనున్నాయి. పనోరమిక్ సన్‌రూఫ్, వెంటిలేటెడ్ సీట్లు ఈ కారుకు అదనపు ఆకర్షణగా నిలవనున్నాయి.

ప్రస్తుతం మార్కెట్లో ఉన్న కియా కేరెన్స్ ఈవీ(kia carens) మారుతి వైఎంసీ గట్టి పోటీ ఇవ్వనుంది. మారుతి తన అద్భుతమైన సర్వీస్ నెట్‌వర్క్, తక్కువ ధరతో ఈ సెగ్మెంట్‌లో రారాజుగా నిలవాలని చూస్తోంది. అడవిలో పులిలా దూసుకువచ్చే ఈ కారు ధర కూడా పోటీదారుల కంటే తక్కువగానే ఉండే అవకాశం ఉందని విశ్లేషకులు భావిస్తున్నారు.

కేవలం 7 సీటర్ మాత్రమే కాదు, మారుతి సుజుకి వై43 (Y43) అనే కోడ్ నేమ్‌తో ఒక చిన్న మైక్రో ఎస్‌యూవీని కూడా సిద్ధం చేస్తోంది. ఇది 2027లో మార్కెట్లోకి రానుంది. టాటా పంచ్(tata punch), హ్యుందాయ్ ఎక్స్టర్(hyundai exter) వంటి కార్లకు పోటీగా ఇది నిలవనుంది. ఇది పెట్రోల్, సీఎన్‌జీ వేరియంట్లలో లభించనుంది.

మొత్తానికి మారుతి సుజుకి రాబోయే రెండేళ్లలో వరుస లాంచ్ లతో రోడ్లపై సందడి చేయబోతోంది. మన దేశంలో ఎలక్ట్రిక్ కార్ల వాడకాన్ని పెంచడంలో ఈ వైఎంసీ కీలక పాత్ర పోషించనుంది.