ఇంజనీర్లు, డాక్టర్లు నో అంటున్నారా? 34 కి.మీ. మైలేజీతో అత్యంత చౌకైన కారును ఎందుకు దూరం పెడుతున్నారు?

మారుతి సుజుకి వ్యాగన్‌ఆర్ (Maruti suzuki WagonR) అనేది భారతదేశంలో సంవత్సరాలుగా నమ్మకాన్ని సంపాదించుకున్న ఫ్యామిలీ కారు. దీని టాల్‌బాయ్ డిజైన్ వల్ల కారులోకి ఎక్కడం-దిగడం చాలా సులభం, ముఖ్యంగా వయసైనవాళ్లు, పిల్లలున్న కుటుంబాలకు ఇది పెద్ద ప్లస్. లోపల కూర్చుంటే హెడ్‌రూమ్, లెగ్‌రూమ్ చాలా బాగుంటాయి, అందుకే చిన్న కారు అయినా కూడా స్పేస్ తక్కువగా అనిపించదు. తక్కువ బడ్జెట్‌లో నమ్మకమైన, స్పేస్ ఉన్న, మైలేజ్ బాగా ఇచ్చే కారు కావాలంటే మారుతి సుజుకి వ్యాగన్‌ఆర్ ఇప్పటికీ ఒక సేఫ్, స్మార్ట్ ఛాయిస్ అని చెప్పొచ్చు. అయితే గత నెలలో ఈ కారు కాస్త ఒడిదుడుకులను ఎదుర్కొంది. డిసెంబర్ 2025లో మారుతి సుజుకి వ్యాగన్ ఆర్ అమ్మకాలు తగ్గాయి.

డిసెంబర్ 2025లో మారుతి సుజుకి వ్యాగన్ ఆర్ అమ్మకాలు గణనీయంగా తగ్గినట్టు గణాంకాలు స్పష్టంగా చూపిస్తున్నాయి. ఆ నెలలో కంపెనీ మొత్తం 14,575 వ్యాగన్ ఆర్ కార్లను మాత్రమే విక్రయించగలిగింది. అయితే, గత ఏడాది ఇదే కాలంలో అంటే డిసెంబర్ 2024లో 17,303 యూనిట్లు అమ్ముడవ్వడం గమనార్హం. దీనిని పోల్చిచూస్తే, సంవత్సరానికోసారి ప్రాతిపదికన మారుతి సుజుకి వ్యాగన్ ఆర్ అమ్మకాలు 2,728 యూనిట్ల మేర తగ్గినట్టు తెలుస్తోంది.

శాతం పరంగా ఇది సుమారు 15.77 శాతం తగ్గుదల. నెలవారీ అమ్మకాలు పరిశీలిస్తే, నవంబర్ 2025లో 14,619 వ్యాగన్ ఆర్ కార్లు విక్రయించబడగా, డిసెంబర్‌లో ఈ సంఖ్య 14,575కి తగ్గింది. అంటే కేవలం 44 యూనిట్ల మాత్రమే తగ్గుదల చోటుచేసుకుంది. శాతం పరంగా చూస్తే ఇది 0.30 శాతం తగ్గుదల మాత్రమే కావడంతో, నెలవారీగా పెద్ద ప్రభావం ఉన్నట్టు అనిపించదు. ఈ తగ్గుదల చాలా స్వల్పమైనదిగా పరిగణించవచ్చు.

అయితే, నెలవారీగా తగ్గుదల స్వల్పంగా ఉన్నప్పటికీ, వార్షిక ప్రాతిపదికన వ్యాగన్ ఆర్ అమ్మకాల్లో చోటుచేసుకున్న భారీ తగ్గుదల ఆందోళన కలిగించే అంశంగా మారింది. భారత మార్కెట్లో ఎన్నో ఏళ్లుగా నమ్మకమైన ఫ్యామిలీ కారుగా పేరున్న వ్యాగన్ ఆర్‌కు, మారుతున్న వినియోగదారుల అభిరుచులు, పెరుగుతున్న పోటీ, కొత్త మోడళ్ల ప్రభావం అమ్మకాలపై పడినట్టు కనిపిస్తోంది. మొత్తంగా నెలవారీ, ఏడాది ప్రాతిపదికన తగ్గుదలను ఎదుర్కొన్నదని స్పష్టంగా చెప్పొచ్చు.

మారుతి సుజుకి వ్యాగన్ ఆర్ మైలేజ్ విషయంలో ఇప్పటికీ తన బలాన్ని నిలుపుకుంటోంది. 1.0 లీటర్ పెట్రోల్ ఇంజిన్‌తో వచ్చే మాన్యువల్ వేరియంట్లు లీటరుకు 24.35 కిలోమీటర్ల మైలేజీని అందిస్తాయి. ఇదే ఇంజిన్‌తో ఆటోమేటిక్ గేర్‌బాక్స్ ఉన్న వేరియంట్లు మరింత మెరుగ్గా లీటరుకు 25.19 కిలోమీటర్ల వరకు మైలేజీ ఇవ్వగలవు. నగరంలో రోజూ ప్రయాణించే వినియోగదారులకు ఇది పెద్ద ప్లస్ పాయింట్‌గా చెప్పుకోవచ్చు.

ఇక కొంచెం ఎక్కువ పవర్ కోరుకునే వారికి అందుబాటులో ఉన్న 1.2 లీటర్ పెట్రోల్ ఇంజిన్ కూడా మంచి ఇంధన సామర్థ్యాన్ని చూపిస్తుంది. ఈ ఇంజిన్‌తో మాన్యువల్ వేరియంట్లు లీటరుకు 23.56 కిలోమీటర్ల మైలేజీని ఇస్తే, ఆటోమేటిక్ వేరియంట్లు లీటరుకు 24.43 కిలోమీటర్ల వరకు మైలేజీని అందిస్తాయి. పవర్, మైలేజ్ మధ్య మంచి బ్యాలెన్స్ కోరుకునే వారికి ఇది సరైన ఎంపికగా కనిపిస్తుంది.

ఇంధన ఖర్చును మరింత తగ్గించాలని భావించే వినియోగదారుల కోసం వ్యాగన్ ఆర్‌లో 1.0 లీటర్ CNG ఇంజిన్ ఎంపిక కూడా ఉంది. ఈ వేరియంట్ మాన్యువల్ గేర్‌బాక్స్‌తో మాత్రమే అందుబాటులో ఉండగా, కిలో CNGకి 33.47 కిలోమీటర్ల మైలేజీని అందించగలదు. అయితే, CNG ఇంజిన్‌తో ఆటోమేటిక్ గేర్‌బాక్స్ ఆప్షన్ లేదన్న విషయం గమనించాల్సిందే. డ్రైవింగ్ పరిస్థితులు, ట్రాఫిక్, డ్రైవింగ్ స్టైల్‌ను బట్టి ఇవి కొంత తేడా ఉండొచ్చని కూడా గుర్తుంచుకోవాలి.

మొత్తంగా చూస్తే, మైలేజ్ విషయంలో మారుతి సుజుకి వ్యాగన్ ఆర్ తన సెగ్మెంట్‌లో ఇప్పటికీ బలమైన స్థానంలోనే ఉందని చెప్పొచ్చు. మారుతి సుజుకి అధికారిక వెబ్‌సైట్ ప్రకారం, ఎంట్రీ లెవల్ వేరియంట్ ధర కేవలం రూ.4.99 లక్షలు. అదే సమయంలో, టాప్ వేరియంట్ మారుతి సుజుకి వ్యాగన్ ఆర్ ధర కూడా కేవలం రూ.6.95 లక్షలు. ఇవన్నీ ఎక్స్-షోరూమ్ ధరలు.