ఏనుగు సైజున్న మారుతి కారు ఒక్కసారిగా కుప్పకూలింది.. మరో మోడల్ మాత్రం ఆకాశాన్ని తాకుతోంది!

మారుతి సుజుకి (Maruti Suzuki) భారత మార్కెట్లో అత్యంత విజయవంతమైన మోడళ్లలో ఏర్టిగా ఒక ప్రత్యేక స్థానాన్ని సంపాదించుకుంది. దేశంలో అత్యధికంగా అమ్ముడయ్యే 7-సీటర్ MPVగా ఎర్టిగా పేరు తెచ్చుకోవడానికి కారణం దాని ప్రాక్టికల్ డిజైన్, మంచి మైలేజ్, తక్కువ మెయింటెనెన్స్ ఖర్చులు, మధ్యతరగతి కుటుంబాలకు అందుబాటులో ఉండే ధర. పెద్ద కుటుంబాల ప్రయాణ అవసరాలను సులభంగా తీర్చగలిగే ఈ కారు, ఇండియన్ మార్కెట్లో "ఫ్యామిలీ కార్"గా బలమైన గుర్తింపును పొందింది. ఈ విజయాన్ని ఆధారంగా చేసుకుని మారుతి సుజుకి కొన్నేళ్ల క్రితం అదే ప్లాట్‌ఫారమ్‌పై మరింత ప్రీమియం టచ్‌తో ఒక కొత్త వేరియంట్‌ను ప్రవేశపెట్టింది. అదే మారుతి సుజుకి ఎక్స్‌ఎల్6 (Maruti Suzuki XL6).

ఎర్టిగా కంటే కొంచెం ఎక్కువ స్టైలిష్ లుక్, క్రాస్ ఓవర్ డిజైన్, ముఖ్యంగా రెండవ వరుసలో కెప్టెన్ సీట్లతో ఇది మరింత ప్రీమియం అనుభూతిని ఇవ్వడానికి రూపొందించబడింది. ఇన్నోవా లాంటి కంఫర్ట్ ఫీల్‌ను కొంతవరకు బడ్జెట్ సెగ్మెంట్‌లో అందించాలన్న ఆలోచనతో వచ్చిన ఈ MPV ప్రారంభంలో మంచి ఆసక్తిని రేకెత్తించింది. కానీ మార్కెట్ వాస్తవం మాత్రం వేరుగా ఉంది. ప్రీమియం ఫీచర్లు ఉన్నప్పటికీ, XL6 అమ్మకాలు ఎర్టిగా స్థాయికి చేరుకోలేకపోయాయి.

తాజా గణాంకాల ప్రకారం ఏప్రిల్ నెలలో XL6 మొత్తం 3,527 యూనిట్లు మాత్రమే విక్రయించబడింది. ఇది ఎర్టిగా లాంటి మాస్-మార్కెట్ MPVతో పోలిస్తే చాలా తక్కువ స్థాయి డిమాండ్‌ను సూచిస్తోంది. అంతేకాదు, గత ఏడాది ఇదే నెలలో నమోదైన 4,140 యూనిట్ల అమ్మకాలతో పోలిస్తే ఈసారి అమ్మకాలు 14.81 శాతం తగ్గడం గమనార్హం. ప్రీమియం లుక్, కెప్టెన్ సీట్లు, అదనపు కంఫర్ట్ వంటి అంశాలు ఉన్నప్పటికీ, XL6 మార్కెట్‌ను ఆకర్షించలేకపోయింది.

Maruti Suzuki XL6 తన సెగ్మెంట్‌లో మంచి పనితీరు, మైలేజ్ కోసం రూపొందించబడిన ప్రత్యేక మల్టీ పర్పస్ వెహికల్‌గా నిలుస్తోంది. ఈ MPVలో 1.5 లీటర్ పెట్రోల్ ఇంజన్‌ను అందించారు, ఇది 5-స్పీడ్ మాన్యువల్ గేర్‌బాక్స్ లేదా టార్క్ కన్వర్టర్ ఆటోమేటిక్ ట్రాన్స్‌మిషన్‌తో జతచేయబడుతుంది. ఈ ఇంజన్ 6000 rpm వద్ద గరిష్టంగా 103 హార్స్‌పవర్ శక్తిని, అలాగే 4400 rpm వద్ద 136.8 Nm టార్క్‌ను ఉత్పత్తి చేస్తుంది.

ఇందులో ఉపయోగించిన డ్యూయల్ జెట్ టెక్నాలజీ ఇంధన దహనాన్ని మరింత సమర్థవంతంగా మార్చి పనితీరును మెరుగుపరుస్తుంది. అలాగే స్టార్ట్-స్టాప్ టెక్నాలజీ కారణంగా ట్రాఫిక్ సిగ్నల్స్ వద్ద లేదా ఆగిన సమయంలో ఇంజన్ ఆటోమేటిక్‌గా ఆఫ్ అయి, అవసరమైనప్పుడు మళ్లీ స్టార్ట్ అవుతుంది. ఇది ఇంధన వినియోగాన్ని తగ్గించడంలో కీలక పాత్ర పోషిస్తుంది. పెట్రోల్ వెర్షన్‌తో పాటు CNG ఆప్షన్‌లో కూడా అందిస్తోంది.

దీంతో వినియోగదారులు తమ అవసరానికి అనుగుణంగా ఇంధన ఎంపికను చేసుకునే అవకాశం ఉంటుంది. మైలేజ్ విషయంలో కూడా ఈ MPV మంచి పనితీరును చూపిస్తోంది. మాన్యువల్ వెర్షన్ సుమారు 20.97 kmpl వరకు మైలేజ్ ఇవ్వగలదని, ఆటోమేటిక్ వెర్షన్ సుమారు 20.27 kmpl వరకు అందించగలదని కంపెనీ పేర్కొంటోంది. ఇక CNG వెర్షన్ విషయానికి వస్తే, ఇది సుమారు 26.32 kmpl వరకు మైలేజ్ అందించగలదని సమాచారం.

మైలేజ్ పరంగా మాత్రమే కాకుండా, ఫీచర్ల పరంగా కూడా ఒక ప్రీమియం అనుభూతిని అందించేలా డిజైన్ చేయబడింది. క్యాబిన్‌లో 7.0 అంగుళాల టచ్‌స్క్రీన్ డిస్‌ప్లేతో కూడిన కొత్త స్మార్ట్‌ప్లే ఇన్ఫోటైన్‌మెంట్ సిస్టమ్‌,ఆటోమేటిక్ క్లైమేట్ కంట్రోల్, సుజుకి కనెక్ట్ టెక్నాలజీ ద్వారా జియో-ఫెన్సింగ్ అలర్ట్‌లు, రిమోట్ యాక్సెస్, వెహికల్ ట్రాకింగ్ వంటి అనేక కనెక్టెడ్ కార్ ఫీచర్లు అందుబాటులో ఉన్నాయి.