మారుతి స్విఫ్ట్ కార్ లవర్స్‌కు బంపర్ ఆఫర్.. మీ కారుకు రూ.1.16 లక్షల బడ్జెట్‌లోనే స్పోర్టీ లుక్

ప్రపంచవ్యాప్తంగా అత్యధికంగా అమ్ముడవుతున్న హ్యాచ్‌బ్యాక్ కార్లలో సుజుకి స్విఫ్ట్ ఎప్పుడూ ముందంజలో ఉంటుంది. ఈ కారుకు మార్కెట్లో ఉన్న విపరీతమైన క్రేజ్‌ను దృష్టిలో ఉంచుకుని కంపెనీ సరికొత్త అప్‌గ్రేడ్ ప్యాకేజీని ప్రకటించింది. సాధారణ స్విఫ్ట్ కారును ఎంతో పవర్‌ఫుల్ గా కనిపించే స్విఫ్ట్ స్పోర్ట్ మోడల్ తరహాలోకి మార్చేందుకు ఒక అఫీషియల్ ఫ్యాక్టరీ-బ్యాక్డ్ బాడీకిట్ (Factory-Backed Bodykit)ను మార్కెట్లోకి తీసుకువచ్చింది. ఈ సరికొత్త కిట్ కారు పాత లుక్‌ను పూర్తిగా మార్చేసి అల్ట్రా స్పోర్టీగా చూపిస్తుంది.

ఎవిన్ భాగస్వామ్యంతో సరికొత్త డిజైన్
సుజుకి సంస్థ ఈ సరికొత్త అప్‌గ్రేడ్ ప్యాకేజీని జపాన్‌కు చెందిన ప్రముఖ యాక్ససరీస్ తయారీ సంస్థ ఎవిన్‎తో కలిసి సంయుక్తంగా రూపొందించింది. ఈ బాడీకిట్ మొత్తం చూడటానికి ఈ ఏడాది ఏప్రిల్‌లో ప్రదర్శించిన స్విఫ్ట్ ఎరో కాన్సెప్ట్ (Swift Aero Concept) తరహాలోనే ఉంటుంది. ఈ ఎరో కాన్సెప్ట్ కారు గతేడాది జనవరి 2025లో వచ్చిన స్విఫ్ట్ ఛాంపియన్స్ కాన్సెప్ట్ ఆధారంగా డిజైన్ చేయబడింది. కారును బయటి నుంచి మోడిఫై చేయాలనుకునే వారికి ఈ అఫీషియల్ కిట్ ఒక పర్ఫెక్ట్ ఆప్షన్.

నలుమూలలా స్పోర్టీ మేకోవర్
ఈ సరికొత్త బాడీకిట్ ప్రత్యేకత ఏమిటంటే.. దీనిని కారు కొనేటప్పుడు ఫ్యాక్టరీలోనే అమర్చరు, బదులుగా షోరూమ్ లో డీలర్ స్థాయిలోనే (Dealer Level) ఫిట్ చేస్తారు. దీనిని సుజుకి సెలెక్ట్ పల్స్ అధికారిక క్యాటలాగ్‌లో చేర్చారు. ఈ బాడీకిట్ భాగాలను కారు ముందు, పక్కన, వెనుక భాగాల లుక్‌ను విపరీతంగా మెరుగుపరిచేలా డిజైన్ చేశారు. కారు ముందు భాగం కోసం ఒక అద్భుతమైన ఫ్రంట్ స్ప్లిటర్ (Front Splitter) లభిస్తుంది. అలాగే సైడ్ ప్రొఫైల్‌ను మరింత పవర్‌ఫుల్‌గా చూపించడానికి సైడ్ స్కర్ట్స్ సెట్‌ను, వెనుక భాగం కోసం ప్రత్యేక బంపర్ ఎక్స్‌టెన్షన్‌ను అందించారు.

అదనపు ప్రీమియం యాక్ససరీస్
ఈ మూడు ప్రధాన భాగాలతో పాటు కస్టమర్లు తమకు నచ్చినట్లుగా కారును మరింత కస్టమైజ్ చేసుకోవడానికి సుజుకి పలు ఆప్షనల్ యాక్ససరీలను కూడా ఆఫర్ చేస్తోంది. ఇందులో ఆకర్షణీయమైన బ్లాక్ గ్రిల్ గార్నిష్, పూర్తి నలుపు రంగుతో కూడిన బ్లాక్-అవుట్ అల్లాయ్ వీల్స్ (Black-out Alloy Wheels) ఉన్నాయి. ఇవే కాకుండా డోర్ హ్యాండిల్ ప్రొటెక్టర్లు, ఓఆర్‌విఎమ్‌లపై కార్బన్ ఫినిషింగ్, హుడ్ డెకాల్స్, ప్రత్యేకమైన SWIFT బ్యాజింగ్‌తో కూడిన ఫ్యూయల్ లిడ్ కవర్, లోపల అమర్చుకోవడానికి స్టెయిన్‌లెస్ స్టీల్ పెడల్స్ వంటి ప్రీమియం యాక్ససరీలు లభిస్తాయి.

బాడీకిట్ ధరల పూర్తి వివరాలు
ఎవిన్ సంస్థ రూపొందించిన ఈ స్విఫ్ట్ స్పోర్ట్ బాడీకిట్ అతిపెద్ద ప్లస్ పాయింట్ ఏంటంటే, దీనిని కొత్త కారు కొనేవారే కాకుండా, ఇప్పటికే స్విఫ్ట్ కారు వాడుతున్న పాత ఓనర్లు కూడా తమ కార్లకు అమర్చుకోవచ్చు. ధరల విషయానికి వస్తే.. మెయిన్ ఫ్రంట్, సైడ్, రేర్ ప్యాకేజీ మొత్తం ధర జపాన్ కరెన్సీలో JPY 198,000 గా ఉంది, అంటే మన భారత కరెన్సీలో సుమారు రూ. 1.16 లక్షలు అవుతుంది.

ఒకవేళ విడివిడిగా కొనాలనుకుంటే.. ఫ్రంట్ స్ప్లిటర్, రేర్ బంపర్ ఎక్స్‌టెన్షన్ ధర ఒక్కొక్కటి JPY 63,800 (సుమారు రూ.37,000) గా ఉంది. సైడ్ స్కర్ట్స్ ధర JPY 70,400 (సుమారు రూ. 41,000), బ్లాక్ గ్రిల్ గార్నిష్ ధర JPY 22,000 (సుమారు రూ. 13,000) గా నిర్ణయించారు. ఇతర ఆప్షనల్ యాక్ససరీల మొత్తం సెట్ ధర JPY 96,932 (సుమారు రూ. 57,000) గా ఉంది. తమ స్విఫ్ట్ కారుకు సరికొత్త రేసింగ్ లుక్ ఇవ్వాలనుకునే వారికి ఈ కిట్ బెస్ట్ ఛాయిస్.