ఈ కారుకు భారీ హైప్ ఇచ్చారు.. కానీ కొన్నది ముగ్గురే! తొలి ఫ్లెక్స్-ఫ్యూయల్ కారుని కొనేవాళ్లు కనిపించలేదు!

దేశంలో ప్రత్యామ్నాయ ఇంధన వినియోగాన్ని ప్రోత్సహించేందుకు కీలక అడుగులు వేస్తున్న మారుతి సుజుకి ఇటీవల భారతదేశపు తొలి బయోఫ్యూయల్ ప్యాసింజర్ కారు వ్యాగన్ఆర్ ఫ్లెక్స్-ఫ్యూయల్ (wagonr flex fuel) ను మార్కెట్లోకి తీసుకొచ్చింది. పెట్రోల్‌తో పాటు అధిక శాతం ఇథనాల్ మిశ్రమ ఇంధనంపై కూడా నడిచేలా రూపొందించిన ఈ కారు పర్యావరణ పరిరక్షణతో పాటు ఇంధన దిగుమతులపై ఆధారపడటాన్ని తగ్గించే లక్ష్యంతో అభివృద్ధి చేయబడింది. అయితే ఈ వినూత్న సాంకేతికతపై కంపెనీ పెట్టుకున్న అంచనాలకు భిన్నంగా, మార్కెట్ నుంచి ఆశించిన స్థాయిలో స్పందన లభించలేదు. మారుతి సుజుకి విడుదల చేసిన జూన్ 2026 అమ్మకాల గణాంకాల ప్రకారం, దేశవ్యాప్తంగా ఈ ఫ్లెక్స్-ఫ్యూయల్ వ్యాగన్ఆర్ కేవలం 3 యూనిట్లు మాత్రమే అమ్ముడయ్యాయి.

ప్రపంచంలో ఇప్పటికే బ్రెజిల్ వంటి దేశాల్లో ఫ్లెక్స్-ఫ్యూయల్ వాహనాలు విస్తృతంగా వినియోగంలో ఉన్నప్పటికీ, భారత మార్కెట్ మాత్రం ఈ సాంకేతికతను ఇంకా పూర్తిగా స్వీకరించడానికి సిద్ధంగా లేదని ఈ సంఖ్యలు సూచిస్తున్నాయి. కొత్త టెక్నాలజీలను అంగీకరించే విషయంలో భారతీయ వినియోగదారులు సాధారణంగా కొంత సమయం తీసుకుంటారనే విషయం మరోసారి స్పష్టమైంది. ఈ తక్కువ అమ్మకాల వెనుక ప్రధాన కారణాల్లో ఒకటి ఇథనాల్ ఇంధనంపై ప్రజల్లో ఉన్న అవగాహన లోపమే.

ఇటీవల సోషల్ మీడియాలో E20 ఇంధనం, ఫ్లెక్స్-ఫ్యూయల్ టెక్నాలజీ గురించి అనేక తప్పుడు వార్తలు, అసత్య ప్రచారాలు విస్తృతంగా వైరల్ అయ్యాయి. అధిక శాతం ఇథనాల్ కలిగిన ఇంధనం వాడితే ఇంజిన్ త్వరగా దెబ్బతింటుందని, వాహనం పనితీరు తగ్గిపోతుందని, నిర్వహణ ఖర్చులు పెరుగుతాయని కొందరు ప్రచారం చేయడంతో చాలా మంది కొనుగోలుదారులు సందిగ్ధంలో పడిపోయారు. ఈ అపోహలు మార్కెట్లో కొత్త టెక్నాలజీపై నమ్మకాన్ని దెబ్బతీశాయని విశ్లేషకులు భావిస్తున్నారు.

వాస్తవానికి ఫ్లెక్స్-ఫ్యూయల్ వాహనాలను ఇథనాల్ మిశ్రమ ఇంధనాన్ని దృష్టిలో పెట్టుకుని ప్రత్యేకంగా రూపొందిస్తారు. ఇంధన వ్యవస్థ, ఇంజిన్ భాగాలు, ఎలక్ట్రానిక్ కంట్రోల్ సిస్టమ్ వంటి అంశాల్లో అవసరమైన మార్పులు చేసి, అధిక ఇథనాల్ శాతం ఉన్న ఇంధనాన్ని సురక్షితంగా వినియోగించేలా తయారు చేస్తారు. అయినప్పటికీ ఈ విషయంపై సరైన అవగాహన ప్రజల్లో ఇంకా పూర్తిగా పెరగకపోవడం వల్ల కొనుగోలుదారులు వెనుకంజ వేస్తున్నారు.

మారుతి సుజుకి వ్యాగన్ఆర్ ఫ్లెక్స్-ఫ్యూయల్ ప్రారంభ ఎక్స్-షోరూమ్ ధరను కంపెనీ రూ. 7,23,900గా నిర్ణయించింది. సాధారణ పెట్రోల్ వేరియంట్‌తో పోలిస్తే ఈ మోడల్ కోసం కొనుగోలుదారులు సుమారు రూ. 86,000 అదనంగా చెల్లించాల్సి ఉంటుంది. ఇది E20 ఇంధనం నుంచి E85 వరకు ఉన్న ఇథనాల్-పెట్రోల్ మిశ్రమాలతో పాటు, 100 శాతం స్వచ్ఛమైన ఇథనాల్ (E100)పైనా ఎలాంటి ఇబ్బంది లేకుండా పనిచేసేలా దీనిని అభివృద్ధి చేశారు.

ఇంధనంలో ఇథనాల్ శాతం ఎంత ఉన్నా, దానికి అనుగుణంగా ఇంజన్ పనితీరును సర్దుబాటు చేసుకునే సామర్థ్యం ఈ ఫ్లెక్స్-ఫ్యూయల్ టెక్నాలజీకి ఉంది. ఈ కొత్త మోడల్‌కు మారుతి సుజుకి ఇప్పటికే విశ్వసనీయతను నిరూపించుకున్న 1.2-లీటర్, నాలుగు సిలిండర్ల K12N నాచురల్లీ ఆస్పిరేటెడ్ పెట్రోల్ ఇంజన్ ను ఉపయోగించింది. ఈ ఇంజన్‌కు 5-స్పీడ్ మాన్యువల్ గేర్‌బాక్స్‌ను జత చేశారు.

అయితే ఇది సాధారణ K12N ఇంజన్ కాదు. అధిక శాతం ఇథనాల్ కలిగిన ఇంధనాన్ని సురక్షితంగా ఉపయోగించేందుకు ఇంజన్‌లో పలు కీలక యాంత్రిక మార్పులు చేశారు. ఇథనాల్ ప్రభావాన్ని తట్టుకునేలా ప్రత్యేక మెటీరియల్స్‌తో ఇంధన వ్యవస్థను బలోపేతం చేయడంతో పాటు, ఫ్యూయల్ ఇంజెక్టర్లు, ఫ్యూయల్ పంప్, ఇంజన్ మేనేజ్‌మెంట్ సిస్టమ్, ఎలక్ట్రానిక్ కంట్రోల్ యూనిట్ (ECU) వంటి భాగాలను కూడా ఫ్లెక్స్-ఫ్యూయల్ అవసరాలకు అనుగుణంగా అప్‌గ్రేడ్ చేశారు.