పొట్టి కారే కానీ చాలా గట్టిదండి బాబూ.. లైట్ తీసుకున్న వాళ్లే ఇప్పుడు ఎగబడి కొంటున్నారు

భారతీయ ఎలక్ట్రిక్ కార్ల మార్కెట్లో గత కొన్ని సంవత్సరాలుగా గణనీయమైన మార్పులు చోటుచేసుకుంటున్నాయి. ఈ మార్పుల్లో కీలక పాత్ర పోషిస్తున్న సంస్థల్లో ఒకటి MG Motor India. టాటా మోటార్స్, మహీంద్రా వంటి దిగ్గజ సంస్థలకు గట్టి పోటీ ఇస్తూ, ఎలక్ట్రిక్ సెగ్మెంట్‌లో తనదైన ముద్ర వేస్తోంది. ముఖ్యంగా నగర వినియోగదారుల అవసరాలను అర్థం చేసుకుని రూపొందించిన మోడళ్లతో కంపెనీ ముందుకు దూసుకుపోతోంది. ఆ సంస్థకు చెందిన ఎంజీ కామెట్ ఈవీ (MG Comet EV) భారతీయుల కారు అంటే పెద్దదిగా ఉండాలి అనే సాంప్రదాయ భావనను పూర్తిగా మార్చేసింది. చిన్న పరిమాణం ఉన్నప్పటికీ, లోపలి భాగంలో సమర్థవంతమైన వినియోగాన్ని కలిగి ఉండటం దీని ప్రత్యేకత.

తక్కువ ధరలో ఎలక్ట్రిక్ వాహనం అందించాలనే లక్ష్యంతో వచ్చిన ఈ మోడల్, సాధారణ కుటుంబాలకు కూడా EVలను చేరువ చేసింది. ఒకప్పుడు బడ్జెట్ కారుగా పరిచయమైన Tata Nano ఆశించిన స్థాయిలో విజయం సాధించలేకపోయినా, కామెట్ EV మాత్రం నగర జీవనశైలికి సరిపోయే విధంగా రూపుదిద్దుకుని వేగంగా ఆదరణ పొందింది. ముఖ్యంగా యువత, ఉద్యోగినులు, మహిళా డ్రైవర్లలో దీనికి ప్రత్యేక క్రేజ్ ఏర్పడింది.

ముఖ్యంగా ఎంజీ కామెట్ ఈవీ విషయంలో జనవరి 2026 అమ్మకాల నివేదిక దీని డిమాండ్‌ను చూపుతోంది. గత నెలలో, అంటే జనవరి 2026లో, కంపెనీ మొత్తం 766 యూనిట్ల కామెట్ EVలను విక్రయించింది. ఇదే 2025 జనవరిలో కేవలం 173 యూనిట్లు మాత్రమే అమ్ముడయ్యాయి. ఈ సంఖ్యలను పోలిస్తే, వార్షిక ప్రాతిపదికన 342.77 శాతం వృద్ధి నమోదైంది. అంటే ఒక్క సంవత్సరంలోనే ఈ కారు బ్రాండ్‌కు గణనీయమైన స్థానం సంపాదించింది.

నగర వినియోగదారుల నుంచి వస్తున్న డిమాండ్, తక్కువ ధరలో అందుబాటులో ఉండటం, అలాగే పెరుగుతున్న EV అవగాహన ఈ వృద్ధికి ప్రధాన కారణాలుగా భావిస్తున్నారు. అయితే నెలవారీ ప్రాతిపదికన చూస్తే, స్వల్ప తగ్గుదల కనిపించింది. డిసెంబర్ 2025లో కామెట్ EV 1,143 యూనిట్లు అమ్ముడవగా, జనవరిలో అది 766 యూనిట్లకు తగ్గింది. అంటే సుమారు 32.98 శాతం మేర నెలవారీ అమ్మకాలలో పడిపోయినట్లు గణాంకాలు సూచిస్తున్నాయి.

ఈ కార్ ఎంట్రీ-లెవల్ వేరియంట్ ఎక్స్-షోరూమ్ ధర రూ. 7.50 లక్షల నుంచి ప్రారంభమవుతుంది. BaaS పథకం వల్ల కారును మరింత తక్కువ ప్రారంభ ధరకు కొనుగోలు చేసే అవకాశం కల్పిస్తోంది. BaaS పథకం కింద కారు ధరను మాత్రమే చెల్లించి, బ్యాటరీ ప్యాక్‌ను అద్దెకు తీసుకోవచ్చు. ఈ విధంగా కొంటే కామెట్ EV ధర రూ. 4.99 లక్షల నుంచి రూ. 7.80 లక్షల మధ్య ఉండవచ్చు (ఎక్స్-షోరూమ్).

అయితే, ఈ పద్ధతిలో EV నడిపే ప్రతి కిలోమీటరుకు రూ. 2.50 చొప్పున బ్యాటరీ అద్దె చెల్లించాలి. పనితీరు విషయానికి వస్తే, కామెట్ EV 17.4 kWh బ్యాటరీ ప్యాక్‌తో మార్కెట్లో అందుబాటులో ఉంది. కంపెనీ పేర్కొన్న వివరాల ప్రకారం, ఒకసారి పూర్తి ఛార్జ్ చేస్తే సుమారు 230 కి.మీ.ల వరకు రేంజ్ అందిస్తుంది. నగర ప్రయాణాలు, రోజువారీ ఆఫీస్, చిన్న దూరాల కోసం ఇది బెస్ట్.

చిన్న పరిమాణం ఉన్నప్పటికీ, ఈ కారు లోపల ఆధునిక టెక్నాలజీ ఫీచర్లు అందుబాటులో ఉన్నాయి. డిజిటల్ డిస్ప్లేలు, స్మార్ట్ కనెక్టివిటీ ఆప్షన్లు, కాంపాక్ట్ డిజైన్ వంటి అంశాలు దీన్ని అర్బన్ మొబిలిటీకి అనువైన ఎంపికగా నిలబెడుతున్నాయి. ఈ కారుకు కంపెనీ 8 సంవత్సరాలు లేదా 1.20 లక్షల కి.మీ బ్యాటరీ వారంటీని అందిస్తోంది. అదనంగా, MG కామెట్ EV బ్రాండ్ MG E-షీల్డ్ 3-3-3-8 ప్యాకేజీతో వస్తుంది.