ఇది నార్మల్ షాక్ కాదు భయ్యా.. ఉన్నట్లుండి ఏకంగా రూ.5 లక్షల వరకు కారు రేట్లు పెంచేసిన కంపెనీ

భారత ఆటోమొబైల్ మార్కెట్లో ఎలక్ట్రిక్ వాహనాలకు రోజురోజుకూ ఆదరణ పెరుగుతోంది. ముఖ్యంగా సాధారణ ఈవీ సెగ్మెంట్‌లో మంచి పట్టు సాధించిన జేఎస్‌డబ్ల్యూ ఎంజీ మోటార్ (JSW MG Motor), ఇప్పుడు ప్రీమియం, లగ్జరీ ఎలక్ట్రిక్ కార్ల విభాగంలోనూ దూసుకుపోతోంది. అయితే లగ్జరీ ఈవీలు కొనాలనుకునే వారికి కంపెనీ ఒక షాకింగ్ న్యూస్ చెప్పింది.

గతేడాది మార్కెట్లోకి తీసుకొచ్చిన తమ రెండు పాపులర్ ప్రీమియం మోడల్స్ ఎంజీ ఎం9 (MG M9), ఎంజీ సైబర్‌స్టర్ (MG Cyberster) ధరలను ఎలాంటి ముందస్తు ప్రకటన లేకుండా సైలెంట్‌గా దాదాపు రూ.5 లక్షల వరకు పెంచేసింది. కంపెనీ ప్రీమియం ఎంజీ సెలెక్ట్ డీలర్‌షిప్‌ల ద్వారా అమ్ముడవుతున్న ఈ కార్లకు మార్కెట్లో భారీ డిమాండ్ ఉన్నప్పటికీ, తయారీ ఖర్చులు పెరగడం వల్లే ఈ నిర్ణయం తీసుకున్నట్లు తెలుస్తోంది.

ఈ రెండు ప్రీమియం కార్ల ధరలు పెరగడం కేవలం నాలుగు నెలల వ్యవధిలో ఇది రెండోసారి కావడం గమనార్హం. గతేడాది సింగిల్ వేరియంట్‌లో లాంచ్ అయినప్పుడు ఎంజీ ఎం9 ఎక్స్-షోరూమ్ ధర రూ. 69.9 లక్షలుగా ఉండగా, సైబర్‌స్టర్ ధర రూ. 72.49 లక్షలుగా ఉండేది. ఆ తర్వాత ఏప్రిల్ 2026 లో ఎం9 ధరను రూ. 5 లక్షలు, సైబర్‌స్టర్ ధరను రూ. 2.5 లక్షలు పెంచారు.

ఇప్పుడు తాజాగా మరోసారి పెంచిన ధరల ప్రకారం.. ఎంజీ ఎం9 పై రూ. 4.05 లక్షలు భారం పడటంతో దీని కొత్త ఎక్స్-షోరూమ్ ధర రూ. 79.95 లక్షలకు చేరింది. అలాగే ఎంజీ సైబర్‌స్టర్ ఈవీ ధర ఏకంగా రూ. 5 లక్షలు పెరగడంతో, దీని కొత్త ఎక్స్-షోరూమ్ ధర రూ. 82.5 లక్షలకు చేరుకుంది.

ఎంజీ ఎం9 ఈవీ అనేది ఒక విలాసవంతమైన లార్జ్ సైజ్ ఎంపీవీ. ఇది 5,200 మిల్లీమీటర్ల పొడవు, 3,200 మిల్లీమీటర్ల భారీ వీల్‌బేస్‌తో వస్తుంది. ఇది మార్కెట్లో ఉన్న కియా కార్నివాల్, టయోటా వెల్‌ఫైర్ వంటి లగ్జరీ కార్ల కంటే పెద్దదిగా ఉంటుంది. కారు లోపల ప్రీమియం లెదర్ సీట్లు, ముందు భాగంలో 12.23-ఇంచుల టచ్‌స్క్రీన్, 7-ఇంచుల డ్రైవర్ డిస్‌ప్లే ఉన్నాయి.

దీనిలోని ప్రెసిడెన్షియల్ సీట్లు ప్రయాణికులకు మసాజ్, హీటింగ్, వెంటిలేషన్ సౌకర్యాలను అందిస్తాయి. వీటిని సీటు హెడ్‌రెస్ట్‌పై ఉండే చిన్న టచ్‌స్క్రీన్ ద్వారా కంట్రోల్ చేయవచ్చు. అంతేకాకుండా, దీనిలో పనోరమిక్ సన్‌రూఫ్, జేబీఎల్ సౌండ్ సిస్టమ్, పీఎమ్ 2.5 ఎయిర్ ఫిల్టర్ వంటి హైఎండ్ ఫీచర్లు ఉన్నాయి.

ఎంజీ ఎం9 కార్ ప్రయాణికుల సేఫ్టీకి కంపెనీ అత్యధిక ప్రాధాన్యత ఇచ్చింది. దీనికి యూరో ఎన్‌క్యాప్, ఆస్ట్రేలియన్ క్రాష్ టెస్టుల్లో పూర్తి 5-స్టార్ సేఫ్టీ రేటింగ్ లభించింది. ఇందులో సేఫ్టీ కోసం లెవెల్-2 ఏడీఏఎస్ (ADAS) టెక్నాలజీ, 7 ఎయిర్‌బ్యాగ్‌లు, 360-డిగ్రీల కెమెరా, నాలుగు చక్రాలకు డిస్క్ బ్రేకులు, ఎలక్ట్రానిక్ స్టెబిలిటీ ప్రోగ్రామ్ (ESP) వంటి ఫీచర్లు ఉన్నాయి.

ఈ కారులో 945 లీటర్ల భారీ బూట్ స్పేస్ ఉండటంతో పాటు, వెహికల్ టు లోడ్ (V2L), వెహికల్ టు వెహికల్ (V2V) చార్జింగ్ టెక్నాలజీని కూడా ఇది సపోర్ట్ చేస్తుంది. అంటే ఈ కారు బ్యాటరీ నుంచి ఇతర ఎలక్ట్రానిక్ వస్తువులకు లేదా వేరే ఈవీ కారుకు కూడా చార్జింగ్ ఇచ్చుకోవచ్చు.

ధర పెరిగిన మరో మోడల్ ఎంజీ సైబర్‌స్టర్ విషయానికి వస్తే, ఇది పూర్తిగా టూ-డోర్ కన్వర్టిబుల్ ఎలక్ట్రిక్ స్పోర్ట్స్ కార్. ఇందులో 77 కిలోవాట్ అవర్ (kWh) బ్యాటరీ ప్యాక్ ఉంటుంది, ఇది ఒక్కసారి చార్జ్ చేస్తే గరిష్టంగా 580 కిలోమీటర్ల రేంజ్ ఇస్తుందని కంపెనీ చెబుతోంది. ఈ స్పోర్ట్స్ కారులోని డ్యూయల్ మోటార్ ఆల్-వీల్ డ్రైవ్ సిస్టమ్ ఏకంగా 510 హార్స్‌పవర్ (PS), 725 న్యూటన్ మీటర్ల టాక్‌ను ప్రొడ్యూస్ చేస్తుంది.

లాంచ్ కంట్రోల్ టెక్నాలజీ సాయంతో ఈ కారు కేవలం 3.2 సెకన్లలోనే 0 నుంచి 100 కిలోమీటర్ల వేగాన్ని అందుకుంటుంది. దీని గరిష్ట వేగం గంటకు 200 కిలోమీటర్లుగా ఉంది. దీని ఇంటీరియర్‌లో 10.25-ఇంచుల మెయిన్ స్క్రీన్‌తో పాటు మరో మూడు 7-ఇంచుల డిస్‌ప్లేలు, 8-స్పీకర్ల బోస్ ఆడియో సిస్టమ్ లగ్జరీ అనుభూతిని అందిస్తాయి.