సెగ్మెంట్లోనే ఫస్ట్ టైమ్ 8-స్పీడ్ గేర్‌బాక్స్..పనోరమిక్ సన్‌రూఫ్, మసాజ్ సీట్లతో రచ్చ చేయనున్న స్కోడా

యూరప్ కార్ల తయారీ దిగ్గజం స్కోడా తన పాపులర్ ఎస్‌యూవీ కుషాక్(Skoda Kushaq)ను సరికొత్త హంగులతో భారత మార్కెట్లోకి అధికారికంగా విడుదల చేసింది. ఇండియా 2.0 ప్రాజెక్టులో భాగంగా వస్తున్న ఈ ఫేస్‌లిఫ్ట్ వెర్షన్.. కేవలం డిజైన్ పరంగానే కాకుండా.. సెగ్మెంట్లోనే మొదటిసారిగా వస్తున్న ఫీచర్లు, టెక్నాలజీతో వినియోగదారులను ఆకట్టుకోనుంది. హ్యుందాయ్ క్రెటా, కియా సెల్టోస్ వంటి కార్లకు ఇది గట్టి పోటీ ఇవ్వడం ఖాయంగా కనిపిస్తోంది.

డిజైన్‌లో అదిరిపోయే మార్పులు
కొత్త కుషాక్ ఫేస్‌లిఫ్ట్ ఇప్పుడు స్కోడా లేటెస్ట్ మోడరన్ సాలిడ్ డిజైన్ లాంగ్వేజ్‌ను కలిగి ఉంది. ముందు భాగంలో క్రోమ్ రిబ్స్‌తో కూడిన గ్రిల్, దానికి తోడుగా వెలిగే లైట్ బ్యాండ్ కారుకు ఒక విలక్షణమైన రూపాన్ని ఇచ్చాయి. వెనుక వైపు కనెక్టెడ్ ఎల్‌ఈడీ టెయిల్ లైట్లు, సీక్వెన్షియల్ టర్న్ ఇండికేటర్లు కారును మరింత ప్రీమియంగా మారుస్తున్నాయి. ఇక అన్ని వేరియంట్లలోనూ అల్లాయ్ వీల్స్, ఎల్‌ఈడీ లైటింగ్ స్టాండర్డ్‌గా వస్తున్నాయి. వినియోగదారుల కోసం సిమ్లా గ్రీన్, చెర్రీ రెడ్, స్టీల్ గ్రే వంటి మూడు సరికొత్త రంగులను పరిచయం చేసింది.

8-స్పీడ్ గేర్‌బాక్స్
ఈ అప్‌డేట్‌లో అతి ముఖ్యమైన మార్పు ఇంజిన్, ట్రాన్స్‌మిషన్. 1.0 లీటర్ టీఎస్‌ఐ (TSI) పెట్రోల్ ఇంజిన్‌తో పాటు ఇప్పుడు సెగ్మెంట్లోనే మొదటిసారిగా 8-స్పీడ్ టార్క్ కన్వర్టర్ ఆటోమేటిక్ గేర్‌బాక్స్ను స్కోడా పరిచయం చేసింది. ఇది నగర ప్రయాణాల్లోనూ, హైవేలపై కూడా అత్యంత సాఫీగా ప్రయాణించేలా చేస్తుంది. ఇక పవర్‌ఫుల్ 1.5 లీటర్ ఇంజిన్ వెర్షన్‌లో గాలి కోసం 7-స్పీడ్ డీఎస్‌జీ (DSG) ఆటోమేటిక్ గేర్‌బాక్స్ కొనసాగుతోంది. ఈ 1.5 లీటర్ వెర్షన్‌లో భద్రత కోసం నాలుగు చక్రాలకు డిస్క్ బ్రేక్‌లు ఇవ్వడం గమనార్హం.

లగ్జరీ కేబిన్.. మసాజ్ సీట్లు
కారు లోపలికి వెళ్తే ఒక లగ్జరీ కారులో కూర్చున్న ఫీలింగ్ కలుగుతుంది. మొదటిసారిగా కుషాక్‌లో పనోరమిక్ సన్‌రూఫ్ను ప్రెస్టీజ్, మోంటే కార్లో వేరియంట్లలో ప్రవేశపెట్టారు. అంతకు మించి, లాంగ్ డ్రైవ్ వెళ్ళేవారి అలసటను తగ్గించేందుకు మసాజ్ ఫంక్షన్ ఉన్న ఎలక్ట్రిక్ వెంటిలేటెడ్ సీట్లను అమర్చారు.

10.25-అంగుళాల భారీ డిజిటల్ కాక్‌పిట్, డ్యూయల్ కలర్ యాంబియంట్ లైటింగ్ కారు ఇంటీరియర్‌ను కలర్‌ఫుల్‌గా మార్చేస్తాయి. లగేజీ కోసం 491 లీటర్ల విశాలమైన బూట్ స్పేస్ ఉంది, సీట్లు ఫోల్డ్ చేస్తే ఇది 1,405 లీటర్ల వరకు పెరుగుతుంది.

గూగుల్ ఏఐ అసిస్టెంట్.. ఛాట్ బాట్ ఫీచర్లు!
టెక్నాలజీ పరంగా స్కోడా ఒక అడుగు ముందే ఉంది. 10.1-అంగుళాల ఇన్ఫోటైన్‌మెంట్ సిస్టమ్ ఇప్పుడు గూగుల్ ఆటోమోటివ్ ఏఐ ఏజెంట్ (Google AI Agent)తో వస్తోంది. ఇది భారతీయ ఇంగ్లీష్ యాసను సులభంగా గుర్తిస్తుంది. కేవలం వాయిస్ కమాండ్‌తో మీరు వార్తలు వినవచ్చు, ఫోన్ కాల్స్ చేయవచ్చు, ఏసీని కంట్రోల్ చేయవచ్చు. వైర్‌లెస్ ఆండ్రాయిడ్ ఆటో, ఆపిల్ కార్‌ప్లే సదుపాయం కూడా ఉంది.

6 ఎయిర్‌బ్యాగ్‌లు స్టాండర్డ్
స్కోడా కుషాక్ ఇప్పటికే గ్లోబల్ NCAP టెస్టుల్లో 5-స్టార్ రేటింగ్ సాధించి సురక్షితమైన కారుగా పేరు తెచ్చుకుంది. ఇప్పుడు కొత్త వెర్షన్‌లో 6 ఎయిర్‌బ్యాగ్‌లు, క్లైమేట్ కంట్రోల్, రైన్ సెన్సింగ్ వైపర్లు వంటి 25కు పైగా సేఫ్టీ ఫీచర్లను అన్ని వేరియంట్లలోనూ స్టాండర్డ్‌గా ఇస్తున్నారు. టాప్ వేరియంట్లలో 40 కంటే ఎక్కువ సేఫ్టీ ఫీచర్లు ఉండటం విశేషం.

బుకింగ్, వారంటీ
కొత్త కుషాక్ బుకింగ్‌లు స్కోడా వెబ్‌సైట్‌లో రూ.15,000 తో ప్రారంభమయ్యాయి. మార్చి 2026 చివరి నాటికి డెలివరీలు మొదలవుతాయి. ఈ కారుకు 4 ఏళ్ల వారంటీ, 4 ఏళ్ల రోడ్ సైడ్ అసిస్టెన్స్, ఉచిత సర్వీస్ ప్యాకేజీలను స్కోడా ఆఫర్ చేస్తోంది.