భారత్‌లో ఈ కారుకి పిచ్చి డిమాండ్.. దీని వెయిటింగ్ పీరియడ్ చూస్తే షాక్ అవుతారు!

కొత్త టాటా సియెర్రా (Tata Sierra) SUV భారత ఆటోమొబైల్ మార్కెట్లో అడుగుపెట్టినప్పటి నుంచి భారీ స్థాయిలో ఆసక్తిని రేకెత్తిస్తోంది. గత సంవత్సరం నవంబర్ నెలలో గ్రాండ్ లాంచ్‌తో పరిచయమైన ఈ SUV, లాంచ్ అయిన క్షణాల నుంచే తన స్టైలిష్ డిజైన్, ఆధునిక లుక్‌తో అందరి దృష్టిని ఆకర్షించింది. ఒకప్పటి ఐకానిక్ పేరైన 'సియెర్రా'ను ఆధునిక టచ్‌తో తిరిగి తీసుకురావడం టాటా మోటార్స్‌కు పెద్ద ప్లస్‌గా మారింది. డిజైన్ పరంగానే కాదు, మార్కెట్ రెస్పాన్స్ విషయంలో కూడా టాటా సియెర్రా అంచనాలను మించి విజయాన్ని సాధించింది. డిసెంబర్ 16 నుంచి అధికారికంగా బుకింగ్‌లు ప్రారంభం కావడంతో, వినియోగదారుల నుంచి ఊహించని స్థాయిలో స్పందన వచ్చింది.

కేవలం 24 గంటల వ్యవధిలోనే 70,000 మందికి పైగా కస్టమర్లు ఈ SUVను బుక్ చేయడం ఆటో రంగంలో ఒక సంచలనంగా మారింది. ఇది సియెర్రాపై ఉన్న క్రేజ్ ఎంత బలంగా ఉందో స్పష్టంగా చూపిస్తోంది. ఈ భారీ డిమాండ్ కారణంగా ఇప్పుడు కొత్త టాటా సియెర్రా కోసం వెయిటింగ్ పీరియడ్ వివరాలు కూడా వెలుగులోకి వచ్చాయి. ప్రస్తుతం దీని కోసం చాలా రోజులు వెయిట్ చేయాల్సిందే.

కంపెనీ ప్రకారం, ఈ SUVకి ప్రస్తుతం చాలా ఎక్కువ ఆర్డర్లు ఉండటంతో, వేరియంట్లను బట్టి డెలివరీకి 3 నుంచి 4 నెలల వరకు వేచి ఉండాల్సి వచ్చే పరిస్థితి ఉంది. ముఖ్యంగా ఎక్కువగా డిమాండ్ ఉన్న వేరియంట్లకు వెయిటింగ్ పీరియడ్ ఇంకా ఎక్కువగా ఉండే అవకాశం ఉంది. కొత్త టాటా సియెర్రా కేవలం ఒక SUVగా మాత్రమే కాకుండా, టాటా బ్రాండ్‌కు మరో పెద్ద సక్సెస్ స్టోరీగా మారుతోంది.

ఆకర్షణీయమైన డిజైన్, పాత సియెర్రా పేరు మీద ఉన్న నమ్మకం, అలాగే టాటా మోటార్స్‌పై వినియోగదారులకు ఉన్న విశ్వాసం ఇవన్నీ కలిసి ఈ కారును హాట్ ఫేవరెట్‌గా నిలబెట్టాయి. రాబోయే నెలల్లో కూడా ఈ డిమాండ్ తగ్గేలా కనిపించకపోవడంతో, టాటా సియెర్రా భారత SUV సెగ్మెంట్‌లో కీలక పాత్ర పోషించనుందని చెప్పవచ్చు. కొత్త సియెర్రా ధర రూ. 11.49 లక్షల నుండి రూ. 18.49 లక్షల (ఎక్స్-షోరూమ్) మధ్య ఉంటుంది.

దీని పొడవు 4,340 mm, వెడల్పు 1,841 mm, ఎత్తు 1,715 mmగా ఉండటంతో రోడ్డుపై దీనికి మంచి ప్రెజెన్స్ ఉంటుంది. కాంపాక్ట్ SUVల కంటే కొంచెం పెద్దదిగా ఉండే ఈ సైజ్, లోపల ప్రయాణికులకు మరింత స్థలాన్ని అందిస్తుంది. అంతేకాదు, 205 mm గ్రౌండ్ క్లియరెన్స్ ఉండటం వల్ల స్పీడ్ బ్రేకర్లు లేదా గ్రామీణ మార్గాల్లో కూడా ఎలాంటి ఇబ్బంది లేకుండా నడిచే సామర్థ్యాన్ని ఇస్తుంది.

పవర్‌ట్రెయిన్ విషయంలో SUV మూడు ఇంజిన్ ఆప్షన్‌లతో వస్తుంది. ఎంట్రీ లెవల్‌గా అందించే 1.5 లీటర్ నేచురల్లీ ఆస్పిరేటెడ్ పెట్రోల్ ఇంజన్ 106 bhp పవర్, 145 Nm పీక్ టార్క్‌ను ఉత్పత్తి చేస్తుంది. ఇక పనితీరుకు ఎక్కువ ప్రాధాన్యం ఇచ్చే వినియోగదారుల కోసం 1.5 లీటర్ టర్బో పెట్రోల్ ఇంజన్ కూడా ఉంది. ఇది 160 bhp పవర్‌తో పాటు 255 Nm పీక్ టార్క్‌ను అందిస్తుంది.

డీజిల్ ఇంజన్ కోరుకునే వారికి టాటా 1.5 లీటర్ డీజిల్ యూనిట్‌ను అందిస్తోంది. ఈ ఇంజన్ 118 PS పవర్, 260 Nm పీక్ టార్క్‌ను ఉత్పత్తి చేస్తుంది. ట్రాన్స్‌మిషన్ ఎంపికల విషయానికి వస్తే, వేరియంట్‌ను బట్టి ఈ కారు 6-స్పీడ్ మాన్యువల్, 6-స్పీడ్ ఆటోమేటిక్ అలాగే 7-స్పీడ్ DCT గేర్‌బాక్స్ ఆప్షన్‌లతో లభిస్తుంది. ఇది లీటరుకు సుమారు 16.8 నుండి 20.5 కి.మీ వరకు మైలేజ్ అందించగలదు.