రూ.5 లక్షలకే 366 కి.మీ రేంజ్ ఇచ్చే ఈవీ కారు? మధ్యతరగతి కోసం టాటా బిగ్ సర్ప్రైజ్

భారతీయ ఎలక్ట్రిక్ వాహన మార్కెట్‌లో సామాన్యులకు కూడా ఈవీ అనుభవాన్ని చేరువ చేసిన కార్లలో టాటా టియాగో ఈవీ ( Tata Tiago Ev) ఒకటి. తక్కువ ధరలో ఎలక్ట్రిక్ కారు కొనాలనుకునే కుటుంబాలకు ఇది మొదటి ఎంపికగా మారింది. నగర రోడ్లపై నిశ్శబ్దంగా పరుగులు తీస్తూ, పెట్రోల్ ఖర్చుల నుంచి ఉపశమనం కలిగించిన ఈ చిన్న ఎలక్ట్రిక్ కారు ఇప్పుడు మరింత కొత్త రూపంలో రాబోతోందనే వార్త ఆటోమొబైల్ రంగంలో ఆసక్తిని పెంచుతోంది. ప్రస్తుతం టాటా మోటార్స్ కొత్త Tiago Ev Facelift (టియాగో ఈవీ ఫేస్‌లిఫ్ట్) మోడల్‌ను భారతీయ రహదారులపై విస్తృతంగా పరీక్షిస్తోంది. ఇప్పటికే పలుమార్లు స్పై చిత్రాల్లో కనిపించిన ఈ కారు, పాత మోడల్‌తో పోలిస్తే మరింత ప్రీమియం లుక్‌తో రానుందని సమాచారం.

కొత్త టియాగో ఈవీ ఫేస్‌లిఫ్ట్ కేవలం బయట డిజైన్ మార్పులతో మాత్రమే పరిమితం కాకుండా, పనితీరు, రేంజ్ పరంగా కూడా భారీ అప్‌డేట్‌ను తీసుకురానుంది. ఇప్పటి వరకు అందిస్తున్న 19.2 kWh బ్యాటరీ ప్యాక్ స్థానంలో, కంపెనీ 30 kWh సామర్థ్యం గల పెద్ద బ్యాటరీని ప్రవేశపెట్టే అవకాశాలు కనిపిస్తున్నాయి. ఇదే జరిగితే, టియాగో ఈవీ మార్కెట్లో మరోసారి సంచలనం సృష్టించడం ఖాయం అంటున్నారు నిపుణులు.

పెద్ద బ్యాటరీ కారణంగా కారు ఒక్కసారి ఛార్జ్ చేస్తే మరింత ఎక్కువ దూరం ప్రయాణించే సామర్థ్యాన్ని పొందనుంది. కొత్త 30 kWh బ్యాటరీ ప్యాక్ రాకతో టియాగో ఈవీ పూర్తిగా కొత్త స్థాయికి చేరుకోనుందని ఆటో రంగం అంచనా వేస్తోంది. ఇప్పటి వరకు నగర ప్రయాణాలకు సరిపోయే చిన్న ఎలక్ట్రిక్ కారుగా గుర్తింపు పొందిన టియాగో ఈవీ, ఇప్పుడు లాంగ్ డ్రైవ్‌లకు కూడా అనువైన కారుగా మారబోతోందనే చర్చ మొదలైంది.

ప్రస్తుతం అందుబాటులో ఉన్న 19.2 kWh బ్యాటరీ ప్యాక్ పూర్తి ఛార్జ్‌పై సుమారు 223 కి.మీ.ల రేంజ్‌ను అందిస్తుండగా, 24 kWh బ్యాటరీ వేరియంట్ దాదాపు 293 కి.మీ.ల వరకు ప్రయాణించే సామర్థ్యాన్ని ఇస్తోంది. అయితే ఇప్పుడు రాబోయే కొత్త 30 kWh బ్యాటరీ వెర్షన్‌తో ఈ రేంజ్ భారీగా పెరిగి 366 కి.మీ.లకు చేరుకుంటుందని సమాచారం. ఈ అప్‌డేట్ టియాగో ఈవీకి గేమ్ ఛేంజర్‌గా మారే అవకాశాలు కనిపిస్తున్నాయి.

కొత్త బ్యాటరీతో టియాగో ఈవీ ఒక్కసారి ఛార్జ్ చేస్తే హైదరాబాద్ నుండి మంచిర్యాల వరకు మధ్యలో మళ్లీ ఛార్జింగ్ అవసరం లేకుండానే ప్రయాణించగలదనే అంచనాలు వినిపిస్తున్నాయి. ఇది వినియోగదారుల్లో ఈవీలపై ఉన్న "రేంజ్ ఆందోళన"ను గణనీయంగా తగ్గించే అంశంగా భావిస్తున్నారు. ముఖ్యంగా భారతదేశంలో చార్జింగ్ స్టేషన్లు ఇంకా అన్ని ప్రాంతాల్లో అందుబాటులో లేని పరిస్థితిలో, ఎక్కువ రేంజ్ అందించే ఈవీలకు డిమాండ్ మరింత పెరుగుతోంది.

అదేవిధంగా, కొత్త టియాగోలో డిజైన్, ఫీచర్ల పరంగా మార్పులు ఉండే అవకాశాలు ఉన్నాయి. కొత్త LED లైట్లు, అప్డేటెడ్ ఫ్రంట్ డిజైన్, పెద్ద టచ్‌స్క్రీన్, కనెక్టెడ్ కార్ టెక్నాలజీ, మెరుగైన ఇంటీరియర్ క్వాలిటీతో ఈ కారు మరింత ప్రీమియం అనుభూతిని ఇవ్వనుందని సమాచారం. పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ ఇన్‌స్ట్రుమెంట్ క్లస్టర్, వైర్‌లెస్ కనెక్టివిటీ, కనెక్టెడ్ కార్ టెక్నాలజీ వంటి ఆధునిక ఫీచర్లు ఇందులో ఉండే అవకాశాలు ఉన్నాయి.

టియాగో ఈవీ, తక్కువ ధరలో రావచ్చు. ఇందుకోసం టాటా మోటార్స్ 'బ్యాటరీ యాజ్ ఏ సర్వీస్' (BaaS) అనే ప్రత్యేక విధానాన్ని తీసుకురావచ్చని నివేదికలు చెబుతున్నాయి. ఈ పద్ధతి అమల్లోకి వస్తే, టియాగో ఈవీ ప్రారంభ ధర రూ. 5 లక్షల వరకు తగ్గే అవకాశం ఉంది. ప్రస్తుతం ఉన్న కారు ధర రూ. 7.99 లక్షల నుంచి ప్రారంభమవుతున్న నేపథ్యంలో, ఇది ఈవీ మార్కెట్లో భారీ మార్పులకు దారితీయవచ్చు.