మార్కెట్లోకి రాగానే ప్రభంజనం.. ఒక్క నెలలోనే 1400 యూనిట్లు అవుట్.. డస్టర్ మేనియా మొదలైంది

ఒకప్పుడు భారత రోడ్లపై డస్టర్ సృష్టించిన ప్రభంజనం అంతా ఇంతా కాదు. మధ్యతరగతి ప్రజలకు ఎస్‌యూవీ (SUV) రుచి చూపించిన అసలైన బండి అది. సుదీర్ఘ నిరీక్షణ తర్వాత, సరికొత్త అవతారంలో వచ్చిన రెనాల్ట్‎ డస్టర్ 2026 (Renault Duster 2026) ఇప్పుడు మార్కెట్లోకి రీ-ఎంట్రీ ఇస్తూనే రికార్డులు సృష్టిస్తోంది. సేల్స్ మొదలైన తొలి నెలలోనే వెయ్యి యూనిట్ల మార్కును దాటేసి, ప్రత్యర్థులకు గట్టి వార్నింగ్ ఇచ్చింది. మార్చి 2026 నెలలో ఈ కారు సాధించిన విజయాలు, దీనిలోని అద్భుతమైన ఫీచర్ల గురించి పూర్తి వివరాలు తెలుసుకుందాం.

తొలి నెలలోనే అదిరిపోయే బోణీ
రెనాల్ట్‎ ఇండియాకు 2026 మార్చి నెల ఒక మైలురాయిగా నిలిచిపోయింది. కొత్త డస్టర్ రాకతో కంపెనీ అమ్మకాలు అమాంతం పెరిగాయి. గత ఏడాది మార్చితో పోలిస్తే ఏకంగా 77% వృద్ధిని నమోదు చేస్తూ మొత్తం 5,046 యూనిట్లను విక్రయించింది. ఇందులో కేవలం కొత్త డస్టర్ వాటానే 1,402 యూనిట్లు ఉండటం విశేషం. ప్రస్తుతం షోరూమ్‌లకు చేరిన ఈ యూనిట్లు డిస్ప్లే, డెమో వాహనాలుగా ఉన్నాయి. ఈ నెల నుంచే కస్టమర్లకు డెలివరీలు ప్రారంభం కానుండటంతో, రాబోయే రోజుల్లో ఈ సంఖ్య వేలల్లోకి చేరడం ఖాయంగా కనిపిస్తోంది.

కళ్ళు చెదిరే డిజైన్, గ్రౌండ్ క్లియరెన్స్
కొత్త డస్టర్ పాత మోడల్ కంటే చాలా భిన్నంగా, భవిష్యత్ డిజైన్ తో కనిపిస్తోంది. దీనికి ఉన్న ఐబ్రో స్టైల్ ఎల్‌ఈడీ డీఆర్‌ఎల్‌లు (LED DRLs), ఫెండర్ల మీద ప్రత్యేకమైన డిజైన్, వెనుక వైపు ఒకదానికొకటి అనుసంధానించబడిన ఎల్‌ఈడీ టెయిల్ ల్యాంప్స్ దీనికి ఒక రాయల్ లుక్ ఇస్తాయి. ముఖ్యంగా భారతీయ రోడ్లపై ఉన్న గుంతలను, గతుకులను లెక్కచేయకుండా వెళ్లడానికి ఇందులో 212 మిమీ గ్రౌండ్ క్లియరెన్స్ ఇచ్చారు. దీనివల్ల ఆఫ్-రోడింగ్ ప్రియులకు ఇది ఒక వరం. ఇక లగేజీ విషయానికి వస్తే, ఇందులో 700 లీటర్ల భారీ బూట్ స్పేస్ ఉంది, ఇది ఈ సెగ్మెంట్లో మరే కారులోనూ లేదు.

టెక్నాలజీతో నిండిన కేబిన్
కారు లోపలికి అడుగు పెడితే ఒక లగ్జరీ ప్రపంచం కనిపిస్తుంది. డ్యూయల్-టోన్ కలర్ స్కీమ్‌తో కేబిన్ చాలా రిచ్‌గా ఉంటుంది. ఇందులో 10.1 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్ ఉంది, దీనిలో గూగుల్ ఇంటిగ్రేషన్ తో పాటు వైర్‌లెస్ ఆపిల్ కార్ ప్లే, ఆండ్రాయిడ్ ఆటో సౌకర్యం ఉంది. డ్రైవర్ కోసం ప్రత్యేకంగా 10.25 అంగుళాల డిజిటల్ డిస్ప్లే ఏర్పాటు చేశారు. పనోరమిక్ సన్‌రూఫ్, 360-డిగ్రీ కెమెరా, వైర్‌లెస్ ఛార్జర్, డ్యూయల్-జోన్ క్లైమేట్ కంట్రోల్ వంటి ఫీచర్లు ప్రయాణాన్ని మరింత సుఖమయం చేస్తాయి. మ్యూజిక్ లవర్స్ కోసం ఇందులో 6-స్పీకర్ల అర్కామిస్ (Arkamy's) సౌండ్ సిస్టమ్ అమర్చారు.

పవర్‌ఫుల్ ఇంజిన్ ఆప్షన్లు:
కొత్త డస్టర్ రెండు రకాల టర్బో పెట్రోల్ ఇంజిన్లతో మార్కెట్లోకి వచ్చింది.
1.0 లీటర్ టర్బో పెట్రోల్: ఇది 98 hp పవర్, 160 Nm టార్క్‌ను అందిస్తుంది. ఇది కేవలం మాన్యువల్ గేర్‌బాక్స్‌తో మాత్రమే లభిస్తుంది.
1.3 లీటర్ టర్బో పెట్రోల్: ఇది అత్యంత శక్తివంతమైనది, 160 hp పవర్, 280 Nm టార్క్‌ను ఉత్పత్తి చేస్తుంది. ఇది మాన్యువల్ తో పాటు 6-స్పీడ్ డ్యూయల్ క్లచ్ ఆటోమేటిక్ (DCT) ట్రాన్స్‌మిషన్ ఆప్షన్ లో కూడా అందుబాటులో ఉంది.
త్వరలోనే ఇందులో 1.8 లీటర్ పవర్‌ఫుల్ హైబ్రిడ్ ఇంజిన్ కూడా రాబోతోంది, ఇది అదిరిపోయే మైలేజీని ఇస్తుందని సమాచారం.

ధర, సేఫ్టీ
కొత్త డస్టర్‌ను అత్యాధునికమైన R-GMP మోడ్యులర్ ప్లాట్‌ఫామ్‌పై నిర్మించారు. ఇది మునుపటి కంటే చాలా దృఢంగా ఉండటమే కాకుండా, ఎలక్ట్రానిక్ భద్రతా ఫీచర్లను సులభంగా ఇంటిగ్రేట్ చేసేలా రూపొందించబడింది. దీని ఎక్స్-షోరూమ్ ధర రూ. 10.49 లక్షల నుంచి ప్రారంభమై టాప్ వేరియంట్ రూ.18.71 లక్షల వరకు ఉంటుంది. ఎంజీ హెక్టార్, స్కోడా కుషాక్, ఫోక్స్‌వ్యాగన్ టైగూన్, టాటా కర్వ్ వంటి కార్లకు డస్టర్ ఇప్పుడు సింహస్వప్నంలా మారింది.