బేస్ మోడల్‌లోనే 21 సేఫ్టీ ఫీచర్లు.. కస్టమర్ల ప్రాణాలకు గ్యారెంటీ ఇస్తున్న కార్ కంపెనీ ఇదే

ప్రముఖ కార్ల తయారీ సంస్థ రెనాల్ట్ ఇండియా మే 2026 నెలకు సంబంధించిన కార్ల అమ్మకాల గణాంకాలను అధికారికంగా విడుదల చేసింది. ప్రస్తుతం కంపెనీ భారతీయ మార్కెట్లో నాలుగు మోడళ్లను విక్రయిస్తోంది. ఇందులో డస్టర్, కైగర్ వంటి రెండు ఎస్‌యూవీలతో పాటు, 7-సీటర్ ఎంపీవీ ట్రైబర్ మరియు బడ్జెట్ హ్యాచ్‌బ్యాక్ క్విడ్ ఉన్నాయి. ఈ ఏడాది మార్చి నెలలో కంపెనీ ఎంతో ప్రతిష్టాత్మకంగా సరికొత్త డస్టర్‌ను మార్కెట్లోకి తీసుకువచ్చింది.

ఈ కొత్త మోడల్ రాకతో అమ్మకాలు భారీగా పెరుగుతాయని కంపెనీ ఆశించింది. దానికి తగ్గట్టే ఏప్రిల్ నెలలో డస్టర్ అద్భుతమైన అమ్మకాలతో కంపెనీలోనే టాప్ పొజిషన్‌లో నిలిచింది. కానీ మే నెల వచ్చేసరికి సీన్ రివర్స్ అయింది. డస్టర్ అమ్మకాలు ఒక్కసారిగా పడిపోగా, కంపెనీ పాత నమ్మకస్థుడైన 7-సీటర్ ఎంపీవీ ట్రైబర్ మళ్లీ మొదటి స్థానాన్ని కైవసం చేసుకుంది.

రెనాల్ట్ ఇండియాకు మే నెలలో మొత్తం అమ్మకాల పరంగా కాస్త నిరాశే ఎదురైంది. ఈ ఏడాది మోడల్ వైజ్ సేల్స్ పరిశీలిస్తే, రెనాల్ట్ ట్రైబర్ స్థిరమైన ప్రదర్శనతో దూసుకుపోతోంది. ట్రైబర్ కారు జనవరిలో 2,509 యూనిట్లు, ఫిబ్రవరిలో 2,419 యూనిట్లు, మార్చిలో 2,011 యూనిట్లు, ఏప్రిల్‌లో 1,917 యూనిట్లు విక్రయించబడగా, మే నెలలో 1,890 యూనిట్ల అమ్మకాలతో కంపెనీలోనే అత్యధికంగా అమ్ముడైన కారుగా నిలిచింది.

మరోవైపు ఎంతో క్రేజ్ ఉన్న డస్టర్ కారు మార్చిలో 1,402 యూనిట్లు, ఏప్రిల్‌లో 2,359 యూనిట్లతో దూసుకుపోయి, మే నెల వచ్చేసరికి కేవలం 1,267 యూనిట్లకు పరిమితమైంది. ఇక కైగర్ ఎస్‌యూవీ విషయానికి వస్తే జనవరిలో 703, ఫిబ్రవరిలో 701, మార్చిలో 1,184, ఏప్రిల్‌లో 727, మే నెలలో 656 యూనిట్లు అమ్ముడయ్యాయి.

అలాగే చిన్న కారు క్విడ్ జనవరిలో 503, ఫిబ్రవరిలో 375, మార్చిలో 449, ఏప్రిల్‌లో 410, మే నెలలో కేవలం 300 యూనిట్ల అమ్మకాలను నమోదు చేసింది. మొత్తంగా కంపెనీ జనవరిలో 3,715, ఫిబ్రవరిలో 3,495, మార్చిలో 5,046, ఏప్రిల్‌లో 5,413, మే నెలలో 4,113 యూనిట్లను విక్రయించింది.

మే నెలలో రెనాల్ట్ కంపెనీకి అత్యధిక అమ్మకాలను తెచ్చిపెట్టిన ట్రైబర్ ఫేస్‌లిఫ్ట్ మోడల్ సరికొత్త డిజైన్‌తో కస్టమర్లను ఆకట్టుకుంటోంది. దీని టాప్-స్పెక్ ఎమోషన్ వేరియంట్‌లో కస్టమర్లకు 6 సింగిల్-టోన్, 3 డ్యూయల్-టోన్ కలర్ ఆప్షన్లు లభిస్తున్నాయి. కారు ముందు భాగంలో ఇంటిగ్రేటెడ్ ఎల్‌ఈడీ డీఆర్‌ఎల్‌లు (LED DRLs), ఎల్‌ఈడీ ఫాగ్ ల్యాంప్‌లతో కూడిన ఎల్‌ఈడీ ప్రొజెక్టర్ హెడ్‌ల్యాంప్‌లు ఉన్నాయి.

అయితే ఇండికేటర్లు మాత్రం హాలోజన్ యూనిట్లతోనే వస్తాయి. ఈ ఫేస్‌లిఫ్ట్ మోడల్‌లో సరికొత్త ఫ్రంట్ బంపర్, గ్రిల్, సరికొత్త రెనాల్ట్ లోగోను అందించారు, ఇది అన్ని వేరియంట్లలోనూ అందుబాటులో ఉంటుంది. కారు ఎమోషన్ వేరియంట్‌లో స్టీల్ వీల్స్ ఉన్నప్పటికీ, అవి డ్యూయల్-టోన్ అలాయ్ వీల్స్ లా కనిపించేలా ప్రత్యేకమైన కవర్లతో డిజైన్ చేశారు.

ఇంకా ఇందులో వీల్ ఆర్చ్ క్లాడింగ్, బ్లాక్ డోర్ హ్యాండిల్స్, టర్న్ ఇండికేటర్లతో కూడిన ఓఆర్‌విఎంలు, 50 కేజీల బరువును మోయగల రూఫ్ రైల్స్ ఉన్నాయి. కారు వెనుక భాగంలో రియర్ డీఫాగర్, వాషర్, వైపర్, ఎల్‌ఈడీ టెయిల్ ల్యాంప్స్, స్పోర్టీ లుక్ ఇచ్చే సిల్వర్ ఫినిష్ స్కిడ్ ప్లేట్లు అందించారు. స్పేర్ వీల్ కేవలం టాప్ వేరియంట్‌లో మాత్రమే కారు కింది భాగంలో అమర్చబడి ఉంటుంది.

కారు లోపలి భాగం డ్యూయల్-టోన్ ఇంటీరియర్‌తో చాలా ప్రీమియంగా ఉంటుంది. ఇందులో డే-నైట్ ఐఆర్‌విఎమ్ (IRVM), డోర్ హ్యాండిల్స్‌పై సిల్వర్ ఫినిషింగ్, ఎల్‌ఈడీ కేబిన్ ల్యాంప్స్, అప్పర్ గ్లోవ్ బాక్స్, క్రోమ్ ఫినిష్డ్ హెచ్‌విఏసీ నోబ్స్ ఉన్నాయి. టెక్నాలజీ పరంగా ఇందులో 8-ఇంచుల ఫ్లోటింగ్ టచ్‌స్క్రీన్ ఇన్ఫోటైన్‌మెంట్ సిస్టమ్, 7-ఇంచుల టీఎఫ్‌టీ ఇన్‌స్ట్రుమెంట్ క్లస్టర్, స్మార్ట్ యాక్సెస్ కార్డ్, ఆండ్రాయిడ్ ఆటో, ఆపిల్ కార్ ప్లే సపోర్ట్ చేసే వైర్‌లెస్ స్మార్ట్‌ఫోన్ కనెక్టివిటీ ఉన్నాయి.

కంఫర్ట్ విషయానికి వస్తే కూల్డ్ సెంటర్ కన్సోల్, డ్రైవర్ సీట్ ఆర్మ్‌రెస్ట్, పుష్ బటన్ స్టార్ట్-స్టాప్, ఆటో హెడ్‌ల్యాంప్స్, స్టీరింగ్ మౌంటెడ్ కంట్రోల్స్, కారులోని 2వ, 3వ వరుసలలో కూడా ఏసీ వెంట్లను అందించారు. ఈ కారులోని సీట్లను మనకు నచ్చినట్లుగా 100 కంటే ఎక్కువ రకాల స్టోరేజ్ కాంబినేషన్లలో అడ్జస్ట్ చేసుకోవచ్చు.

సేఫ్టీ పరంగా రెనాల్ట్ కంపెనీ ఈ కారులో ఎలాంటి రాజీ పడలేదు. ట్రైబర్ అన్ని వేరియంట్లలోనూ కంపెనీ 21 రకాల స్టాండర్డ్ సేఫ్టీ ఫీచర్లను అందించింది. ఇందులో ముఖ్యంగా 6 ఎయిర్‌బ్యాగ్‌లు, ఎలక్ట్రానిక్ స్టెబిలిటీ ప్రోగ్రామ్ (ESP), హిల్ స్టార్ట్ అసిస్ట్, ట్రాక్షన్ కంట్రోల్ సిస్టమ్ వంటి అడ్వాన్స్‌డ్ ఫీచర్లు ఉన్నాయి.

వీటితో పాటు టైర్ ప్రెజర్ మానిటరింగ్ సిస్టమ్ (TPMS), రియర్ పార్కింగ్ సెన్సార్లు, బ్రేక్ అసిస్ట్‌తో కూడిన ఏబీఎస్ (ABS), ఈబీడీ (EBD) ఫీచర్లు కూడా అన్ని మోడళ్లలో కామన్‌గా వస్తాయి. ఇక టాప్ ఎండ్ ఎమోషన్ వేరియంట్‌లో అదనంగా ఫ్రంట్ పార్కింగ్ సెన్సార్లు, ఫాలో మీ హోమ్ హెడ్‌ల్యాంప్స్, టేక్ ఏ బ్రేక్ రిమైండర్ వంటి మరెన్నో సేఫ్టీ ఫీచర్లు అందుబాటులో ఉన్నాయి.

సరికొత్త రెనాల్ట్ ట్రైబర్ ఫేస్‌లిఫ్ట్ మోడల్‌లో 1.0-లీటర్, నేచురల్లీ ఆస్పిరేటెడ్, 3-సిలిండర్ పెట్రోల్ ఇంజన్‌ను ఉపయోగించారు. ఇది 72 పీఎస్ (PS) పవర్, 96 ఎన్ఎమ్ (Nm) గరిష్ట టార్క్‌ను ఉత్పత్తి చేస్తుంది. అన్ని వేరియంట్లలోనూ 5-స్పీడ్ మాన్యువల్ ట్రాన్స్‌మిషన్ స్టాండర్డ్‌గా వస్తుంది. అయితే టాప్-స్పెక్ ఎమోషన్ వేరియంట్‌లో 5-స్పీడ్ ఏఎమ్‌టీ (AMT) ఆటోమేటిక్ ఆప్షన్ కూడా కస్టమర్లకు లభిస్తుంది.

మైలేజ్ ఎక్కువ కావాలనుకునే వారి కోసం డీలర్ స్థాయిలో సీఎన్‌జీ (CNG) కిట్ ఆప్షన్ కూడా అందుబాటులో ఉంది. ఈ సీఎన్‌జీ కిట్ ధర సుమారుగా రూ. 80,000 వరకు ఉంటుంది, ఇది వివిధ నగరాలను బట్టి మారవచ్చు. ఇక మార్కెట్లో ఈ కారు ప్రారంభ ఎక్స్-షోరూమ్ ధర కేవలం రూ. 5.76 లక్షలుగా ఉంది. తక్కువ బడ్జెట్‌లో ఎక్కువ మంది ప్రయాణించేందుకు, పూర్తి రక్షణతో కూడిన ఫ్యామిలీ కార్ కోసం చూస్తున్న వారికి ఇది ఒక బెస్ట్ ఆప్షన్ అని చెప్పవచ్చు.