రూ.4.30లక్షలకే ఫ్యామిలీ కారు.. ఇప్పుడు కంపెనీ ఇచ్చే డిస్కౌంట్ తో ఇంకో స్కూటర్ కొనేయొచ్చు

కొత్తగా కారు కొనుగోలు చేయాలని ప్లాన్ చేస్తున్న వాహనదారులకు జూన్ నెల అదిరిపోయే గుడ్ న్యూస్ మోసుకొచ్చింది. ప్రముఖ ఫ్రెంచ్ ఆటోమొబైల్ దిగ్గజం రెనాల్ట్ (Renault) భారతీయ మార్కెట్లో తన కార్ల అమ్మకాలను పెంచేందుకు సరికొత్త ఆఫర్ల జాతరను ప్రకటించింది. ఈ జూన్ నెలలో కంపెనీ తన పాపులర్ కార్లపై గరిష్టంగా రూ.80,000 వరకు భారీ డిస్కౌంట్లు, బెనిఫిట్స్ అందిస్తోంది. ఇందులో నేరుగా లభించే క్యాష్ డిస్కౌంట్లతో పాటు ఎక్స్ఛేంజ్ బోనస్, స్క్రాపేజ్ బెనిఫిట్స్, లాయల్టీ బోనస్‌లు కూడా ఉన్నాయి. కంపెనీకి చెందిన బడ్జెట్ కార్లయిన కైగర్, ట్రైబర్, క్విడ్ మోడల్స్‌పై ఈ బంపర్ డీల్స్ అందుబాటులో ఉన్నాయి.

మధ్యతరగతి ప్రజలకు ఎంతో ఇష్టమైన చిన్న కారు రెనాల్ట్ క్విడ్ (Renault Kwid) పై ఈ నెలలో మొత్తం రూ.55,000 వరకు ప్రయోజనాలు లభిస్తున్నాయి. ఇందులో రూ.20,000 వరకు క్యాష్ డిస్కౌంట్, అలాగే రూ.25,000 వరకు ఎక్స్ఛేంజ్ బోనస్ కలిసి ఉన్నాయి. వీటితో పాటు అదనంగా రూ.10,000 వరకు కార్పొరేట్ డిస్కౌంట్ కూడా లభిస్తుంది.

అయితే తమిళనాడులోని కస్టమర్లకు ఈ కార్పొరేట్ బెనిఫిట్ రూ.15,000 వరకు ఉంది. పల్లెటూళ్లలో ఉండే వారికోసం ప్రత్యేకంగా రూ.4,000 రూరల్ ఆఫర్ ఇస్తున్నారు. కాగా, క్విడ్ బేస్ వేరియంట్ అయిన Authentic పై కేవలం లాయల్టీ, స్క్రాపేజ్ ప్రయోజనాలు మాత్రమే వర్తిస్తాయి. ప్రస్తుతం మార్కెట్లో క్విడ్ ప్రారంభ ధర రూ.4.30 లక్షల నుంచి మొదలై రూ.5.88 లక్షల (ఎక్స్-షోరూమ్) వరకు ఉంది.

కుటుంబ సమేతంగా ప్రయాణించేందుకు ఇష్టపడే వారి కోసం వచ్చిన 7-సీటర్ ఎమ్‌పీవీ రెనాల్ట్ ట్రైబర్ (Renault Triber) పై కూడా ఈ నెలలో అదిరిపోయే ఆఫర్లు ఉన్నాయి. 2026 కంటే ముందు తయారైన పాత ట్రైబర్ స్టాక్ యూనిట్లపై గరిష్టంగా రూ.60,000 వరకు లబ్ధి పొందవచ్చు. ఇందులో రూ.35,000 క్యాష్ డిస్కౌంట్, రూ.25,000 ఎక్స్ఛేంజ్ బోనస్ ఉన్నాయి. ఇక సరికొత్త MY2026 ట్రైబర్ మోడల్స్ కొనే వారికి రూ.25,000 ఎక్స్ఛేంజ్ బోనస్‌తో పాటు రూ.25,000 క్యాష్ డిస్కౌంట్ లభిస్తుంది.

ట్రైబర్ కారు విషయానికి వస్తే ఇతర రాష్ట్రాల కంటే తమిళనాడులో ఆఫర్లు కాస్త ఎక్కువగా ఉన్నాయి. అక్కడ కార్పొరేట్ బోనస్ రూ.15,000 వరకు లభిస్తుండగా, మిగిలిన రాష్ట్రాల్లో ఇది రూ.10,000కి పరిమితమైంది. గ్రామీణ ప్రాంతాల కస్టమర్ల కోసం రూ.4,000 ప్రత్యేక రూరల్ డిస్కౌంట్ కూడా ఉంది. ఈ కారు ఎంట్రీ-లెవల్ వేరియంట్ అయిన Authentic పై కేవలం లాయల్టీ, స్క్రాపేజ్ ప్రయోజనాలు మాత్రమే అందుబాటులో ఉన్నాయి. భారత మార్కెట్లో ఈ సూపర్ 7-సీటర్ కారు ధర రూ.5.81 లక్షల నుంచి ప్రారంభమై రూ.8.48 లక్షల వరకు పలుకుతోంది.

ఈ జూన్ నెలలో రెనాల్ట్ శ్రేణిలో ఉన్న కాంపాక్ట్ ఎస్‌యూవీ రెనాల్ట్ కైగర్ (Renault Kiger) పై కంపెనీ అన్నింటికంటే ఎక్కువగా అత్యధిక డిస్కౌంట్ ఇస్తోంది. ఎంపిక చేసిన వేరియంట్లపై వినియోగదారులు మొత్తం రూ.80,000 వరకు ప్రయోజనాలు అందుబాటులో ఉన్నాయి. ఇందులో రూ.40,000 భారీ క్యాష్ డిస్కౌంట్, రూ.25,000 ఎక్స్ఛేంజ్ బోనస్ లేదా స్క్రాపేజ్ బెనిఫిట్, రూ.15,000 వరకు లాయల్టీ బోనస్ లభిస్తాయి.

గత నెల లాగే ఈ జూన్ లో కూడా కైగర్ కారుపై దేశవ్యాప్తంగా రూ.10,000 కార్పొరేట్ డిస్కౌంట్, రూ.4,000 రూరల్ ఆఫర్ ఇస్తున్నారు. (తమిళనాడులో కార్పొరేట్ డిస్కౌంట్ రూ.15,000 గా ఉంది). ఈ స్టైలిష్ కారు ప్రారంభ ధర రూ.5.81 లక్షల నుంచి మొదలై టాప్ వేరియంట్ రూ.10.34 లక్షల వరకు ఉంటుంది.