కారు ధర తెలియకుండానే 6 నిమిషాల్లోనే స్టాక్ మొత్తాన్ని కొనేశారు.. భారత్‌లో స్కోడా కొత్త సెన్సేషన్

భారతీయ ఆటోమొబైల్ మార్కెట్లో కొత్త మోడళ్లకు మంచి స్పందన రావడం సాధారణ విషయమే. అయితే, కొన్ని వాహనాలు మాత్రం విడుదలకు ముందే వినియోగదారుల్లో అంతటి ఆసక్తిని రేకెత్తిస్తాయి, అవి మార్కెట్లోకి వచ్చిన వెంటనే రికార్డులు సృష్టిస్తాయి. తాజాగా స్కోడా కోడియాక్ ఆర్‌ఎస్ (skoda kodiaq rs) అలాంటి అరుదైన ఘనతను సాధించింది. చెక్ కార్ల తయారీ సంస్థ స్కోడా ఇటీవల ఈ ప్రీమియం 7-సీటర్ పెర్ఫార్మెన్స్ SUV కోసం భారతదేశంలో బుకింగ్‌లను ప్రారంభించగా, కేవలం కొన్ని నిమిషాల్లోనే వినియోగదారుల నుంచి ఊహించని స్థాయిలో స్పందన లభించింది. స్కోడా భారత మార్కెట్ కోసం తొలి విడతగా తీసుకొచ్చిన 50 యూనిట్లు కేవలం 6 నిమిషాల్లోనే పూర్తిగా బుక్ అయిపోవడం ఈ SUVపై ఉన్న క్రేజ్‌కు నిదర్శనం.

సాధారణంగా ఏ కొత్త కారు అయినా ధర ప్రకటించిన తర్వాతే వినియోగదారులు కొనుగోలు నిర్ణయం తీసుకుంటారు. కానీ కోడియాక్ RS విషయంలో పరిస్థితి పూర్తిగా భిన్నంగా కనిపించింది. కంపెనీ అధికారిక ధరను ప్రకటించకముందే, కస్టమర్లు రూ.3 లక్షల టోకెన్ మొత్తాన్ని చెల్లించి బుకింగ్‌లు పూర్తి చేయడం విశేషం. ఈ స్పందన వెనుక కోడియాక్ RS ప్రత్యేకతలు ప్రధాన కారణంగా కనిపిస్తున్నాయి. ఇది సాధారణ కోడియాక్ కంటే మరింత శక్తివంతమైనది.

ముఖ్యంగా కుటుంబ అవసరాలకు అనువైన 7-సీటర్ SUVలో స్పోర్ట్స్ కార్ స్థాయి పనితీరు అందుబాటులో ఉండటం కొనుగోలుదారులను ఆకర్షిస్తోంది. భారత మార్కెట్లో ప్రీమియం SUV సెగ్మెంట్‌కు ఉన్న డిమాండ్ రోజురోజుకూ పెరుగుతున్న తరుణంలో, కోడియాక్ RS సాధించిన ఈ విజయం స్కోడాకు మరింత ఆత్మవిశ్వాసాన్ని ఇచ్చే అంశంగా చెప్పవచ్చు. కేవలం 6 నిమిషాల్లో 50 యూనిట్లు అమ్ముడవడం అనేది సాధారణ విషయం కాదు.

గత ఏడాది భారత మార్కెట్లో విడుదలైన ఆక్టేవియా RS కూడా భారీ క్రేజ్‌ను సొంతం చేసుకున్నప్పటికీ, అది పూర్తిగా అమ్ముడవడానికి సుమారు 20 నిమిషాలు పట్టింది. అయితే కోడియాక్ RS పెర్ఫార్మెన్స్ మాత్రం ఆ రికార్డును కూడా అధిగమించి, కేవలం 6 నిమిషాల్లోనే తొలి 50 యూనిట్లను విక్రయించడం ద్వారా భారతీయ ఆటోమొబైల్ మార్కెట్లో తన సత్తాను చాటుకుంది. ఇక వచ్చే వారంలో స్కోడా దీని అధికారిక ధరను ప్రకటించనుంది.

7-సీటర్ SUVలో అధిక పనితీరు, ప్రీమియం ఫీచర్లు, స్పోర్టీ క్యారెక్టర్‌ను కోరుకునే కొనుగోలుదారులను లక్ష్యంగా చేసుకుని తీసుకొచ్చిన కోడియాక్ RSకు ఊహించిన దానికంటే ఎక్కువ స్పందన లభించింది. ప్రస్తుతం బుక్ అయిన వాహనాలు పూర్తిగా విదేశాల్లో తయారై భారతదేశానికి దిగుమతి చేయబడిన CBU మోడళ్లకు చెందిన తొలి 50 యూనిట్లు. ధర వెల్లడికాకముందే ఈ స్థాయి డిమాండ్ రావడం కంపెనీకి కూడా ఆశ్చర్యాన్ని కలిగించే అంశంగా మారింది.

మొదటి బ్యాచ్‌కు లభించిన అద్భుతమైన స్పందనను చూస్తుంటే, స్కోడా త్వరలోనే రెండో బ్యాచ్ కోడియాక్ RS యూనిట్లను భారతదేశానికి తీసుకురావాల్సిన పరిస్థితి ఏర్పడే అవకాశం కనిపిస్తోంది. ఎందుకంటే తొలి విడతలో వాహనాన్ని బుక్ చేసుకోలేకపోయిన అనేక మంది కొనుగోలుదారులు ఇంకా ఎదురుచూస్తున్నారు. ఈ నేపథ్యంలో కోడియాక్ RS భారత మార్కెట్లో స్కోడా అత్యంత విజయవంతమైన పెర్ఫార్మెన్స్ మోడళ్లలో ఒకటిగా నిలిచే అవకాశాలు బలంగా కనిపిస్తున్నాయి.

పనితీరు గురించి చూసినట్లయితే, 1,984 cc ఫోర్-సిలిండర్ టర్బోచార్జ్డ్ పెట్రోల్ ఇంజన్‌తో రన్ అవుతుంది. దీనికి 7-స్పీడ్ DSG ఆటోమేటిక్ ట్రాన్స్‌మిషన్‌ జోడించారు. పవర్ విషయానికి వస్తే, ఈ ఇంజన్, 265 bhp పవర్, 400 Nm టార్క్‌ను ఉత్పత్తి చేస్తుంది. దీని టాప్ స్పీడ్ వచ్చే సరికి 231 kmphగా ఉంటుంది. అదే సమయంలో ఈ కారు 6.3 సెకన్లలో 0 నుండి 100 kmph వేగాన్ని అందుకుంటుంది.