ఒక లక్ష మంది ఇదే కారును ఎంచుకున్నారు.. దీనికి అంత డిమాండ్ ఎందుకో మరి..?

స్కోడా (Skoda) భారతీయ మార్కెట్లో తన స్థానాన్ని మరింత బలోపేతం చేసిన మోడళ్లలో కుషాక్ (Kushaq) ఒకటి. మిడ్-సైజ్ SUV విభాగంలో భారీ పోటీ ఉన్నప్పటికీ, ఈ వాహనం తన ప్రత్యేక డిజైన్, యూరోపియన్ బిల్డ్ క్వాలిటీ, శక్తివంతమైన టర్బో పెట్రోల్ ఇంజన్లు, అధునాతన ఫీచర్లతో కొనుగోలుదారులను ఆకట్టుకుంది. 2021 జూన్ 28న భారత మార్కెట్లో అడుగుపెట్టిన ఈ SUV ఇప్పుడు ఒక కీలకమైన మైలురాయిని చేరుకుంది. విడుదలైన ఐదేళ్లలోపు స్కోడా కుషాక్ లక్ష యూనిట్ల అమ్మకాల మార్కును అధిగమించడం విశేషంగా చెప్పుకోవాలి. ముఖ్యంగా హ్యుందాయ్, మారుతి సుజుకి, టాటా మోటార్స్ వంటి భారీ ఉత్పత్తి సామర్థ్యం కలిగిన కంపెనీలతో పోటీ పడుతూ ఈ ఘనత సాధించడం కుషాక్ విజయానికి నిదర్శనంగా నిలుస్తోంది.

భారతీయ వినియోగదారుల అవసరాలను దృష్టిలో ఉంచుకుని రూపొందించిన ఈ SUV, స్కోడా బ్రాండ్ వృద్ధిలో కీలక పాత్ర పోషించింది. ఇప్పటివరకు అమ్ముడైన లక్ష యూనిట్లలో 4,500కు పైగా వాహనాలు విదేశీ మార్కెట్లకు ఎగుమతి చేయగా, మిగిలిన యూనిట్లు దేశీయ మార్కెట్లోనే విక్రయించబడ్డాయి. ఇది కేవలం భారతదేశంలోనే కాకుండా అంతర్జాతీయ మార్కెట్లలో కూడా కుషాక్‌కు మంచి ఆదరణ లభిస్తున్నట్లు సూచిస్తోంది.

భారతీయ వినియోగదారుల అవసరాలను దృష్టిలో ఉంచుకుని రూపొందించిన స్కోడా కుషాక్, కంపెనీ ఇండియా 2.0 ప్రోగ్రామ్ కింద విడుదలైన తొలి మోడల్‌గా ప్రత్యేక గుర్తింపు పొందింది. అధిక స్థాయి స్థానికీకరణతో తయారైన ఈ SUV, స్కోడా కోసం ప్రత్యేకంగా అభివృద్ధి చేసిన MQB-A0-IN ప్లాట్‌ఫామ్ ఆధారంగా రూపొందించిన తొలి వాహనం కూడా కావడం విశేషం. భారత మార్కెట్లో స్కోడా బ్రాండ్ వృద్ధికి కుషాక్ కీలకమైన మోడల్‌గా నిలిచింది.

అమ్మకాలు ప్రారంభమైన 2022 ఆర్థిక సంవత్సరంలో కుషాక్ మొత్తం 21,427 యూనిట్ల విక్రయాలను నమోదు చేసింది. ఆ సమయంలో స్కోడా ఇండియా మొత్తం SUV అమ్మకాలలో ఈ మోడల్ ఒక్కటే 98.05 శాతం వాటాను కలిగి ఉండటం దీని ప్రాధాన్యతను తెలియజేస్తుంది. అయితే 2023 ఆర్థిక సంవత్సరం కుషాక్‌కు స్వర్ణయుగంగా నిలిచింది. ఆ ఏడాదిలో ఈ SUV 25,300 యూనిట్ల అమ్మకాలతో ఇప్పటివరకు అత్యుత్తమ పనితీరును నమోదు చేసింది.

మిడ్-సైజ్ SUV సెగ్మెంట్‌లో పెరుగుతున్న డిమాండ్, కుషాక్‌కు లభించిన మంచి స్పందన ఈ వృద్ధికి ప్రధాన కారణాలుగా నిలిచాయి. అయితే ఆ తర్వాత అమ్మకాలలో క్రమంగా తగ్గుదల కనిపించడం ప్రారంభమైంది. 2024 ఆర్థిక సంవత్సరంలో కుషాక్ విక్రయాలు మొదటిసారిగా క్షీణించి, గత ఏడాదితో పోలిస్తే 7.53 శాతం తగ్గి 23,396 యూనిట్లకు చేరాయి. మార్కెట్లో కొత్త ప్రత్యర్థుల రాక, పెరుగుతున్న పోటీ ఈ ప్రభావానికి కారణమయ్యాయి.

ఈ ధోరణి 2025 ఆర్థిక సంవత్సరంలో కొనసాగింది. ఆ సమయంలో కుషాక్ అమ్మకాలు మరింతగా పడిపోయి 17,363 యూనిట్లకు చేరాయి. ఇది ఏడాది ప్రాతిపదికన 26 శాతం తగ్గుదల కావడం గమనార్హం. ఇక 2026 ఆర్థిక సంవత్సరంలో కుషాక్ తన అత్యల్ప వార్షిక అమ్మకాల సంఖ్యను నమోదు చేసింది. ఆ కాలంలో కేవలం 10,191 యూనిట్లు మాత్రమే విక్రయించబడ్డాయి. ఇది 2025 ఆర్థిక సంవత్సరంతో పోలిస్తే 41 శాతం క్షీణత.

అయినప్పటికీ, లక్ష అమ్మకాల మైలురాయిని చేరుకోవడం ద్వారా కుషాక్ భారత మార్కెట్లో స్కోడా విజయగాథలో ఒక కీలక అధ్యాయంగా నిలిచిపోయింది. 5 సంవత్సరాల కాలంలో ఈ SUV సాధించిన విజయాలు, స్కోడా ఇండియా 2.0 వ్యూహం ఎంత ప్రభావవంతంగా పనిచేసిందో స్పష్టంగా తెలియజేస్తున్నాయి. మొదటి తరం కుషాక్ ఇటీవల మార్చి 2026లో ఫేస్‌లిఫ్ట్‌ వచ్చింది. దీంతో రానున్న రోజుల్లో దీని అమ్మకాలు మరింత పెరగొచ్చు.