20 నిమిషాల్లో అమ్ముడైన కారు మళ్లీ వస్తోంది.. సేల్స్ మొదలైతే మళ్లీ నిమిషాల్లో క్లోజ్ కావొచ్చు!

చెక్ రిపబ్లిక్‌కు చెందిన ప్రముఖ కార్ల తయారీ సంస్థ స్కోడా ఆటో (Skoda Auto) భారత మార్కెట్లో తన పెర్ఫార్మెన్స్ కార్ల ఇమేజ్‌ను మరింత బలపరిచే ప్రయత్నంలో భాగంగా స్కోడా ఆక్టేవియా RS (Skoda Octavia RS) మోడల్‌ను 2025 అక్టోబర్‌లో అధికారికంగా విడుదల చేసింది. సాధారణంగా భారత మార్కెట్లో స్కోడా కార్లకు మంచి ఫ్యాన్‌బేస్ ఉన్నప్పటికీ, ఆక్టేవియా RS విషయంలో కంపెనీకి వచ్చిన స్పందన మాత్రం ఊహించని స్థాయిలో ఉండటం ఇప్పుడు ఆటోమొబైల్ రంగంలో హాట్ టాపిక్‌గా మారింది. ఈ కారును భారతదేశంలో తయారు చేయలేదు. పూర్తిగా విదేశాల నుంచి అసెంబుల్ చేయబడిన రూపంలో దిగుమతి చేసుకుని దేశీయ మార్కెట్లో విక్రయించారు. అంటే ఇది పూర్తిగా CBU (Completely Built Unit) మోడల్‌గా భారత వినియోగదారులకు అందుబాటులోకి వచ్చింది.

ఇలాంటి కార్లపై దిగుమతి పన్నులు ఎక్కువగా ఉండటంతో ధర కూడా భారీగా ఉండటం సహజం. అయినప్పటికీ, స్కోడా ఈ పెర్ఫార్మెన్స్ సెడాన్‌ను రూ.49.99 లక్షల ఎక్స్-షోరూమ్ ధరకు తీసుకువచ్చింది. అయితే ధర కంటే ఎక్కువగా ఈ కారుపై ఆసక్తిని పెంచింది దాని అరుదైన లభ్యత. భారత మార్కెట్ కోసం స్కోడా కేవలం 100 యూనిట్లను మాత్రమే కేటాయించింది. ఇదే అంశం కార్ ప్రేమికుల్లో భారీ ఉత్సాహాన్ని రేకెత్తించింది.

ఎందుకంటే ఆక్టేవియా RS అనేది సాధారణ సెడాన్ కాదు. ఇది స్పోర్టీ డ్రైవింగ్ అనుభూతి, పవర్‌ఫుల్ ఇంజన్, అగ్రెసివ్ డిజైన్, హై-పెర్ఫార్మెన్స్ ట్యూనింగ్ కలయికతో రూపొందించిన ప్రత్యేక మోడల్. అందుకే ఈ కారును కొనుగోలు చేయడానికి ఆసక్తి చూపిన వారి సంఖ్య ఊహించిన దానికంటే చాలా ఎక్కువగా ఉండింది. బుకింగ్స్ ప్రారంభమైన కేవలం 20 నిమిషాల్లోనే భారతదేశానికి కేటాయించిన మొత్తం 100 కార్లు అమ్ముడైపోవడం స్కోడాకే ఆశ్చర్యాన్ని కలిగించిందని చెప్పాలి.

సాధారణంగా రూ.50 లక్షల ధర ఉన్న కార్లు విక్రయించడానికి కొంత సమయం పడుతుంది. కానీ ఆక్టేవియా RS విషయంలో మాత్రం పరిస్థితి పూర్తిగా భిన్నంగా కనిపించింది. ఇది భారత మార్కెట్లో పెర్ఫార్మెన్స్ కార్లకు ఉన్న డిమాండ్‌ను మరోసారి నిరూపించింది. ముఖ్యంగా ప్రీమియం సెడాన్‌లను ఇష్టపడే యువ వ్యాపారవేత్తలు, కార్ కలెక్టర్లు, డ్రైవింగ్ ఎక్స్‌పర్ట్స్ ఈ కారును సొంతం చేసుకోవడానికి పెద్ద ఎత్తున ఆసక్తి చూపారు.

ఈ అద్భుత స్పందన నేపథ్యంలో ఇప్పుడు స్కోడా మరో కీలక నిర్ణయం తీసుకునే అవకాశాలు కనిపిస్తున్నాయి. ఆక్టేవియా RSకు భారత్‌లో వచ్చిన డిమాండ్‌ను దృష్టిలో పెట్టుకుని కంపెనీ రెండో బ్యాచ్ లేదా 2వ ఎడిషన్‌ను త్వరలో తీసుకురావచ్చని సమాచారం వినిపిస్తోంది. ఇప్పటికే మొదటి బ్యాచ్‌ను కోల్పోయిన చాలా మంది కొనుగోలుదారులు మరో అవకాశం కోసం ఎదురుచూస్తున్నట్లు తెలుస్తోంది.

ఆక్టేవియా RS రెండవ బ్యాచ్‌ను 2026 సంవత్సరంలోని నాల్గవ త్రైమాసికంలో, అంటే అక్టోబర్ నుంచి డిసెంబర్ మధ్యకాలంలో భారతదేశంలో విడుదల చేసే అవకాశాలు కనిపిస్తున్నాయి. ముఖ్యంగా ఇదే సమయంలో దేశవ్యాప్తంగా దీపావళి పండుగ సీజన్ ఉండటంతో ఆటోమొబైల్ మార్కెట్ మరింత ఉత్సాహంగా మారనుంది. సాధారణంగా ప్రతి ఏడాది పండుగల సమయంలో కంపెనీలు కొత్త వాహనాలను విడుదల చేస్తుంటాయి.

అలాంటి కీలక సమయంలో ఆక్టేవియా RS రెండో విడతను తీసుకురావడం ద్వారా స్కోడా మరోసారి మార్కెట్లో సంచలనం సృష్టించాలని చూస్తోందని ఆటో వర్గాలు భావిస్తున్నాయి. మొదటి బ్యాచ్‌కు వచ్చిన స్పందనను చూస్తే, రెండో విడతపై కూడా భారీ డిమాండ్ ఉండటం ఖాయంగా కనిపిస్తోంది. అయితే ఈ సారి ఖచ్చితంగా ఎన్ని యూనిట్లు తీసుకువస్తారన్న విషయంపై కంపెనీ ఇప్పటివరకు అధికారిక ప్రకటన చేయలేదు.

పెర్ఫార్మెన్స్ విషయానికి వస్తే, ఆక్టేవియా RS ఇప్పటికీ తన సెగ్మెంట్‌లో అత్యంత పవర్‌ఫుల్ సెడాన్‌లలో ఒకటిగా నిలుస్తోంది. ఇందులో 2.0-లీటర్ TSI టర్బోచార్జ్డ్ పెట్రోల్ ఇంజన్‌ను అందిస్తున్నారు. ఈ ఇంజన్ గరిష్టంగా 263 hp పవర్‌తో పాటు 370 Nm టార్క్‌ను ఉత్పత్తి చేస్తుంది. దీనికి 7-స్పీడ్ DSG ఆటోమేటిక్ గేర్‌బాక్స్‌ను జత చేశారు. ఈ సెడాన్ కేవలం 6.4 సెకన్లలోనే 0 నుంచి 100 కిలోమీటర్ల వేగాన్ని అందుకోగలదు.