26 కిమీ మైలేజీ, 5-స్టార్ సేఫ్టీతో అమ్మకాల్లో దుమ్మురేపుతున్న స్టైలిష్ కారు.. ఇది అస్సలు వదలొద్దు బ్రో

టాటా మోటార్స్ ప్రస్తుతం భారత ఆటోమొబైల్ మార్కెట్లో తిరుగులేని వేగంతో దూసుకుపోతోంది. ముఖ్యంగా నెక్సాన్, పంచ్ వంటి మోడళ్లతో ఇప్పటికే రికార్డులు సృష్టిస్తున్న ఈ స్వదేశీ దిగ్గజం, ఇప్పుడు తన ప్రీమియం హ్యాచ్‌బ్యాక్ ఆల్ట్రోజ్ (Tata Altroz) ద్వారా మరోసారి వార్తల్లో నిలిచింది. కారు కొనేటప్పుడు మైలేజీతో పాటు సేఫ్టీకి అత్యధిక ప్రాధాన్యత ఇచ్చే భారతీయులకు ఆల్ట్రోజ్ ఒక బెస్ట్ ఆప్షన్‌గా మారింది. ఫిబ్రవరి 2026 నాటి అమ్మకాల గణాంకాలను పరిశీలిస్తే, ఈ కారుపై కస్టమర్ల నమ్మకం మరింత పెరిగిందని స్పష్టమవుతోంది. గత నెలలో ఈ కారు అమ్మకాలు గణనీయంగా వృద్ధి చెందాయి.

గత నెలలో మొత్తం 2,063 మంది వాహనదారులు టాటా ఆల్ట్రోజ్‌ను తమ ఇంటికి తీసుకెళ్లారు. ఇది గత ఏడాదితో పోలిస్తే భారీ పెరుగుదల. ఫిబ్రవరి 2025లో ఈ మోడల్ కేవలం 1,604 యూనిట్లు మాత్రమే అమ్ముడయ్యాయి. అంటే ఏడాది కాలంలోనే ఆల్ట్రోజ్ అమ్మకాలు సుమారు 29 శాతం మేర పెరిగాయి. మార్కెట్లో ఎస్‌యూవీల హవా నడుస్తున్నప్పటికీ, ఒక హ్యాచ్‌బ్యాక్ కారు ఇంతటి వృద్ధిని నమోదు చేయడం సామాన్యమైన విషయం కాదు. మారుతి సుజుకి బాలెనో, హ్యుందాయ్ i20 వంటి హేమాహేమీలకు పోటీగా నిలుస్తూ ఆల్ట్రోజ్ తనకంటూ ఒక ప్రత్యేక స్థానాన్ని సంపాదించుకుంది.

టాటా ఆల్ట్రోజ్ విజయంలో దాని భద్రతా ప్రమాణాలు కీలక పాత్ర పోషించాయి. భారత్ NCAP (Bharat NCAP) నిర్వహించిన క్రాష్ టెస్టుల్లో ఈ కారు ప్రతిష్టాత్మకమైన 5-స్టార్ సేఫ్టీ రేటింగ్‌ను దక్కించుకుంది. పెద్దల రక్షణలో 32 పాయింట్లకు గానూ 29.65 పాయింట్లు, పిల్లల రక్షణలో 49 పాయింట్లకు గానూ 44.90 పాయింట్లు సాధించి దేశంలోనే అత్యంత సురక్షితమైన హ్యాచ్‌బ్యాక్ కార్లలో ఒకటిగా నిలిచింది. బడ్జెట్ ధరలో లభించే కారులో ఇంతటి భద్రత ఉండటమే దీని అమ్మకాలు పెరగడానికి ప్రధాన కారణం.

ధర విషయానికి వస్తే.. టాటా ఆల్ట్రోజ్ ప్రారంభ ఎక్స్-షోరూమ్ ధర రూ.6.30 లక్షలుగా ఉంది. ఇది టాప్ ఎండ్ మోడల్ వరకు రూ.10.51 లక్షల వరకు వెళ్తుంది. స్మార్ట్, ప్యూర్, క్రియేటివ్, అకాంప్లిష్డ్ వంటి మొత్తం 7 వేరియంట్లలో ఈ కారు అందుబాటులో ఉంది. తన సెగ్మెంట్లో డీజిల్ ఇంజన్ ఆప్షన్ అందిస్తున్న ఏకైక హ్యాచ్‌బ్యాక్ కూడా ఇదే కావడం విశేషం. దీనివల్ల ఎక్కువ దూరం ప్రయాణించే వారికి ఇది ఆర్థికంగా కలిసొచ్చే ఎంపికగా మారింది.

ఇంజన్ సామర్థ్యం, మైలేజీ పరంగా ఆల్ట్రోజ్ ఎక్కడా తగ్గడం లేదు. ఇందులో 1.2 లీటర్ పెట్రోల్ ఇంజన్, 1.5 లీటర్ టర్బో డీజిల్ ఇంజన్, 1.2 లీటర్ సిఎన్‌జీ (CNG) ఆప్షన్లు ఉన్నాయి. పెట్రోల్ వేరియంట్ లీటరుకు 19.33 కిలోమీటర్ల మైలేజీని ఇస్తుండగా, డీజిల్ వేరియంట్ 23.60 కిలోమీటర్ల మైలేజీని అందిస్తుంది. ఇక సిఎన్‌జీ వెర్షన్ అయితే కిలోగ్రాముకు ఏకంగా 26.90 కిలోమీటర్ల మైలేజీని ఇస్తూ సామాన్యుడి జేబుకు ఊరటనిస్తోంది. సిఎన్‌జీలో టాటా ప్రవేశపెట్టిన డ్యూయల్ సిలిండర్ టెక్నాలజీ వల్ల డిక్కీలో స్థలం కూడా వృధా కాదు.

ఆధునిక ఫీచర్ల విషయంలోనూ టాటా ఆల్ట్రోజ్ వెనకబడి లేదు. ఇందులో 10.25 ఇంచుల టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ ఆండ్రాయిడ్ ఆటో, ఆపిల్ కార్‌ప్లే, 360-డిగ్రీ కెమెరా, వైర్‌లెస్ ఫోన్ ఛార్జర్ వంటి ఫీచర్లు ఉన్నాయి. వీటితో పాటు సన్‌రూఫ్, ఆంబియంట్ లైటింగ్, ఎయిర్ ప్యూరిఫైయర్, 8-స్పీకర్ల సౌండ్ సిస్టమ్ ప్రయాణాన్ని మరింత ఆహ్లాదకరంగా మారుస్తాయి. సేఫ్టీ, మైలేజీ, లగ్జరీ ఫీచర్ల కలయికే ఆల్ట్రోజ్‌ను ఈ ఏడాది టాప్ గెయినర్‎గా నిలబెట్టింది.