టాటా పంచ్ ఈవీ యజమానులకు అలర్ట్.. బ్రేకుల్లో లోపం.. కస్టమర్లకు ఫోన్లు చేస్తున్న డీలర్లు

మీరు ఇటీవల టాటా పంచ్ ఈవీ (Tata Punch EV) కొన్నారా? అయితే ఈ వార్త కచ్చితంగా చదవాల్సిందే. టాటా మోటార్స్ నుంచి ఎంతో ప్రతిష్టాత్మకమైన ఆదరణ పొందుతున్న ఈ ఎలక్ట్రిక్ ఎస్‌యూవీ ఇప్పుడు వార్తల్లో నిలిచింది. కారణం సంతోషకరమైనది కాదు, కాస్త ఆందోళన కలిగించేది. ఈ కారు బ్రేకింగ్ సిస్టమ్‎లో ఏదో లోపం ఉందని, అందుకే కంపెనీ గుట్టుచప్పుడు కాకుండా కొన్ని వాహనాలను వెనక్కి పిలిపిస్తోందని (Recall) సమాచారం అందుతోంది. ఇప్పటికే డీలర్లు స్వయంగా కస్టమర్లకు ఫోన్ చేసి కారును సర్వీస్ సెంటర్‌కు తీసుకురావాలని కోరుతున్నారు.

డీలర్ల నుంచి ఫోన్ కాల్స్.. ఎందుకీ కంగారు?
ప్రముఖ ఆన్‌లైన్ ఫోరం టీమ్-బీహెచ్‌పీ (Team-BHP)లో ఒక వినియోగదారుడు షేర్ చేసిన అనుభవం ఇప్పుడు సోషల్ మీడియాలో వైరల్ అవుతోంది. సదరు వాహనదారుడికి టాటా మోటార్స్ నుంచి ఒక ఎమర్జెన్సీ మెసేజ్ వచ్చింది. అందులో కొత్త పంచ్ ఈవీ 2.0 మోడల్‌కు సంబంధించి వెనుక వీల్స్ బ్రేక్ కాలిపర్లు (Rear Brake Calipers), దానికి సంబంధించిన కొన్ని కీలక భాగాలను వెంటనే మార్చాలని డీలర్లు సూచించారు. మొదటి ఉచిత సర్వీస్ సమయంలోనే వీటిని మార్చడానికి డీలర్లు సిద్ధంగా ఉన్నారంటే, లోపం తీవ్రత ఎంతో అర్థం చేసుకోవచ్చు.

అసలు కారణం ఏమై ఉండొచ్చు?
అయితే ఈ వెనక్కి పిలిపింపు (Recall) పై టాటా మోటార్స్ ఇప్పటివరకు అధికారికంగా ఎటువంటి ప్రకటన చేయలేదు. కానీ, ఆటోమొబైల్ నిపుణుల విశ్లేషణ ప్రకారం.. కారును ఏదైనా వాలుగా ఉన్న ప్రదేశంలో పార్కింగ్ బ్రేక్ వేసి ఉంచినప్పుడు, వెనుక బ్రేకులు వాహనాన్ని పూర్తిగా ఆపడంలో ఇబ్బంది పడుతున్నట్లు తెలుస్తోంది. అంటే కారు వెనక్కి జారిపోయే ప్రమాదం ఉందని భావిస్తున్నారు. గతంలో టాటా నెక్సాన్ ఈవీ ప్రారంభ మోడళ్లలో కూడా ఇటువంటి ఫిర్యాదులే వచ్చాయని కొందరు నెటిజన్లు గుర్తు చేస్తున్నారు.

యజమానులు ఏం చేయాలి?
మీరు కొత్త పంచ్ ఈవీ వాడుతున్నట్లయితే, మీ డీలర్ నుంచి ఫోన్ గానీ, మెసేజ్ గానీ వచ్చిందో లేదో ఒకసారి చెక్ చేసుకోండి. ఒకవేళ రాకపోయినా, మీ సమీప సర్వీస్ సెంటర్‌కు వెళ్లి మీ కారు విన్ నంబర్ (VIN Number) చెక్ చేయించుకోవడం ఉత్తమం. బ్రేకులు అనేవి ప్రాణాలతో కూడుకున్న విషయం కాబట్టి, కంపెనీ అధికారికంగా చెప్పే వరకు వేచి చూడకుండా అప్రమత్తంగా ఉండటం మంచిది.

ఒకవైపు ఈ రీకాల్ వార్తలు వినిపిస్తున్నా, మరోవైపు పంచ్ ఈవీ అమ్మకాలు మాత్రం తగ్గడం లేదు. దీనికి ప్రధాన కారణం ఈ కారులోని ఆధునిక ఫీచర్లు. బ్యాటరీ-యాజ్-ఏ-సర్వీస్ (BaaS) మోడల్ కింద ఈ కారు కేవలం 6.49 లక్షల రూపాయలకే అందుబాటులోకి వస్తోంది. ఇందులో రెండు రకాల బ్యాటరీలు ఉన్నాయి. పెద్ద బ్యాటరీ ఏకంగా 468 కిలోమీటర్ల దూరం ప్రయాణిస్తుంది. కేవలం 26 నిమిషాల్లోనే 20 నుంచి 80 శాతం వరకు ఛార్జింగ్ ఎక్కుతుంది.

లోపల 10.25 అంగుళాల పెద్ద టచ్‌స్క్రీన్, వెంటిలేటెడ్ సీట్లు, 360 డిగ్రీల కెమెరా వంటి సౌకర్యాలు ఈ కారును ఒక చిన్న లగ్జరీ ఎస్‌యూవీలా మార్చాయి. ఆటోమొబైల్ రంగంలో ఇటువంటి చిన్నపాటి లోపాలు సహజమే అయినా, వాటిని కంపెనీలు ఎంత వేగంగా సరిదిద్దుతాయనేది ముఖ్యం. టాటా మోటార్స్ త్వరలోనే దీనిపై పూర్తి క్లారిటీ ఇస్తుందని ఆశిద్దాం.