మిడిల్ క్లాస్ కారు కలను నెరవేర్చే కార్లు రాబోతున్నాయ్.. రూ.10లక్షల బడ్జెట్ ధరలో బుజ్జి ఈవీలివే

భారతదేశంలో ఇప్పుడు ఎలక్ట్రిక్ వాహనాల (EV) హవా నడుస్తోంది. పెట్రోల్, డీజిల్ ధరలు చుక్కలను తాకుతుండటంతో మధ్యతరగతి సామాన్యుడి చూపు సహజంగానే ఈవీల వైపు మళ్లుతోంది. అయితే, మార్కెట్లో లభించే మెజారిటీ ఎలక్ట్రిక్ కార్ల ధరలు 15 లక్షల రూపాయలకు పైగానే ఉండటం చాలా మందిని వెనకడుగు వేయిస్తోంది. ఈ గ్యాప్‌ను భర్తీ చేసేందుకు ప్రముఖ వాహన తయారీ సంస్థలు 2026లో సరికొత్త వ్యూహంతో ముందుకు వస్తున్నాయి.

తక్కువ ధర, చిన్న పరిమాణం, అదే సమయంలో మంచి రేంజ్ ఇచ్చేలా చిన్న ఎలక్ట్రిక్ కార్లను ఈ ఏడాది వరుసగా లాంచ్ చేయడానికి రంగం సిద్ధం చేశాయి. ముఖ్యంగా సిటీ ట్రాఫిక్‌లో సులభంగా దూసుకుపోయేలా ఉండే ఈ కార్ల వల్ల ఇంధన ఖర్చుల నుంచి శాశ్వత విముక్తి లభిస్తుందని వినియోగదారులు ఆశిస్తున్నారు. ఈ ఏడాది భారత మార్కెట్‌ను పలకరించబోతున్న ఆ టాప్-5 చిన్న ఎలక్ట్రిక్ కార్ల పూర్తి వివరాలు ఇక్కడ ఉన్నాయి.

టాటా పంచ్ ఈవీ ఫేస్‌లిఫ్ట్ (Tata Punch EV Facelift)
ఎలక్ట్రిక్ కార్ల విభాగంలో రారాజుగా వెలుగొందుతున్న టాటా మోటార్స్, తన అత్యంత ప్రజాదరణ పొందిన పంచ్ ఈవీని సరికొత్త రూపంలో తీసుకురాబోతోంది. ఈ ఫేస్‌లిఫ్ట్ వెర్షన్ 2026 ఫిబ్రవరి 20న అధికారికంగా లాంచ్ కానుంది. ఈ కొత్త మోడల్‌లో ప్రధానంగా డిజైన్ పరంగా చాలా మార్పులు చేశారు. ముందు భాగంలో వెడల్పాటి ఎల్ఈడీ లైట్ బార్, రీడిజైన్ చేసిన బంపర్లు ఈ కారుకు ప్రీమియం లుక్‌ను ఇస్తాయి. ముఖ్యంగా ఈసారి ఇందులో లెవల్ 2 ADAS ఫీచర్‌ను ప్రవేశపెడుతుండటం విశేషం.

ఇది డ్రైవింగ్ సేఫ్టీని మరో స్థాయికి తీసుకెళ్తుంది. బ్యాటరీ విషయానికి వస్తే, 25 kWh, 35 kWh ఆప్షన్లతో పాటు కొత్తగా 45 kWh బ్యాటరీ ప్యాక్‌ను కూడా అందించవచ్చని సమాచారం. దీనివల్ల ఈ కారు ఒక్కసారి ఛార్జ్ చేస్తే సుమారు 450 నుంచి 489 కిలోమీటర్ల వరకు ప్రయాణించగలదు. అదనంగా 12.3 ఇంచుల భారీ టచ్‌స్క్రీన్, వెంటిలేటెడ్ సీట్లు వంటి ఫీచర్లు కస్టమర్లను ఆకట్టుకోనున్నాయి.

విన్‌ఫాస్ట్ వీఎఫ్3 (VinFast VF3)
వియత్నాంకు చెందిన ప్రముఖ ఈవీ దిగ్గజం విన్‌ఫాస్ట్, భారత మార్కెట్లోకి తన ఎంట్రీ లెవల్ కారుగా వీఎఫ్3ని దించుతోంది. చూడటానికి బాక్సీ డిజైన్ మరియు రెట్రో లుక్‌తో ఉండే ఈ చిన్న ఎలక్ట్రిక్ ఎస్‌యూవీ, యువతను ఎక్కువగా ఆకర్షించనుంది. దీని ధర దాదాపు 7.5 లక్షల నుంచి 10 లక్షల రూపాయల మధ్యలో ఉండవచ్చని అంచనా.

ఇందులో 18.64 kWh బ్యాటరీ ప్యాక్ ఉంటుంది, ఇది సుమారు 215 కిలోమీటర్ల రేంజ్ ఇస్తుంది. ఎంజీ కామెట్ ఈవీకి నేరుగా పోటీగా రాబోతున్న ఈ కారు, సిటీ లోపల తిరగడానికి పర్ఫెక్ట్ ఆప్షన్ అని చెప్పొచ్చు. 10 ఇంచుల ఇన్ఫోటైన్‌మెంట్ సిస్టమ్, పవర్ విండోస్, కంఫర్టబుల్ ఇంటీరియర్స్‌తో ఈ కారు 2026 మధ్యలో లాంచ్ అయ్యే అవకాశం ఉంది.

విన్‌ఫాస్ట్ వీఎఫ్5 (VinFast VF5)
విన్‌ఫాస్ట్ నుంచి రాబోతున్న మరో ఆసక్తికరమైన మోడల్ వీఎఫ్5. ఇది వీఎఫ్3 కంటే కొంచెం పెద్దదిగా మరియు ఫీచర్లతో నిండి ఉంటుంది. టాటా పంచ్ ఈవీకి గట్టి పోటీ ఇచ్చే లక్ష్యంతో దీనిని రూపొందించారు. దీని పొడవు 4 మీటర్ల కంటే తక్కువ ఉంటుంది, కాబట్టి పార్కింగ్ మరియు ట్రాఫిక్ ఇబ్బందులు ఉండవు.

ఇందులో 37.2 kWh బ్యాటరీ ప్యాక్ ఉండే అవకాశం ఉంది, ఇది 326 కిలోమీటర్ల (NEDC) రేంజ్‌ను వాగ్దానం చేస్తోంది. ఇది సుమారు 136 హెచ్‌పీ పవర్‌ను ఉత్పత్తి చేస్తుంది, దీనివల్ల కారు పర్ఫార్మెన్స్ చాలా స్మూత్‌గా ఉంటుంది. దీని ఎక్స్-షోరూమ్ ధర 10 లక్షల నుంచి 12 లక్షల రూపాయల మధ్యలో ఉండే ఛాన్స్ ఉంది.

కియా సిరోస్ ఈవీ (Kia Syros EV)
దక్షిణ కొరియా కంపెనీ కియా నుంచి వస్తున్న సరికొత్త కాంపాక్ట్ ఎలక్ట్రిక్ ఎస్‌యూవీ 'సిరోస్'. హ్యుందాయ్ ఇన్‌స్టర్ ఈవీ ప్లాట్‌ఫామ్ ఆధారంగా దీనిని తయారు చేస్తున్నారు. కియా కారంటేనే అద్భుతమైన ఫీచర్లు, గంభీరమైన లుక్స్ కచ్చితంగా ఉంటాయి. ఇందులో 42 kWh నుంచి 51 kWh బ్యాటరీ ప్యాక్ ఆప్షన్లను కియా ప్రవేశపెట్టే అవకాశం ఉంది.

దీని రేంజ్ సుమారు 390 కిలోమీటర్ల నుంచి 470 కిలోమీటర్ల వరకు ఉండవచ్చని విశ్లేషకులు భావిస్తున్నారు. పనోరమిక్ సన్‌రూఫ్, 360-డిగ్రీ కెమెరా, వెంటిలేటెడ్ సీట్లు వంటి లగ్జరీ ఫీచర్లు ఈ కారులో ప్రధాన ఆకర్షణగా నిలవనున్నాయి. దీని ధర 14 లక్షల నుంచి 18 లక్షల వరకు ఉండవచ్చు, కానీ ఇచ్చే రేంజ్ మరియు క్వాలిటీ పరంగా ఇది ఒక అద్భుతమైన ఫ్యామిలీ ఈవీ కానుంది.

టాటా టియాగో ఈవీ ఫేస్‌లిఫ్ట్ (Tata Tiago EV Facelift)
భారత్‌లో ప్రస్తుతం అత్యధికంగా అమ్ముడవుతున్న ఎలక్ట్రిక్ హ్యాచ్‌బ్యాక్ ఏదంటే అది టియాగో ఈవీనే. దీనిని మరింత ఫ్రెష్‌గా మార్చేందుకు టాటా సంస్థ టియాగో ఈవీ ఫేస్‌లిఫ్ట్‌ను ఈ ఏడాది మార్కెట్లోకి తీసుకురానుంది. ఇందులో బ్యాటరీ సామర్థ్యాన్ని యథాతథంగా ఉంచుతూ (19.2 kWh & 24 kWh), ఎక్స్‌టీరియర్ , ఇంటీరియర్ డిజైన్‌లో కొన్ని క్రూషియల్ మార్పులు చేయనున్నారు.

కొత్త కలర్ ఆప్షన్లు, మెరుగైన సేఫ్టీ ఫీచర్లు మరియు సాఫ్ట్‌వేర్ అప్‌డేట్లతో ఇది రానుంది. తక్కువ బడ్జెట్‌లో ఎలక్ట్రిక్ కారు కావాలనుకునే వారికి ఇది ఎప్పటికీ గోల్డెన్ ఛాయిస్. ఒక్కసారి ఛార్జ్ చేస్తే 250 నుంచి 315 కిలోమీటర్ల వరకు ప్రయాణించవచ్చు.