దేశం మొత్తం ఈ రెండు కార్ల జపం.. నంబర్-1, నంబర్-2 ఇవే.. టాటా సింహపు పిల్లలు

భారతీయ ఆటోమొబైల్ మార్కెట్లో టాటా మోటార్స్ (Tata Motors) మరోసారి తన సత్తాను ఘనంగా చాటుకుంది. గత కొంతకాలంగా అత్యధికంగా అమ్ముడవుతున్న కార్ల జాబితాలో మారుతి సుజుకి మోడళ్లు ఆధిపత్యం చెలాయిస్తుండగా, తాజాగా టాటా పంచ్ (Tata Punch) ఆ స్థానాన్ని తిరిగి కైవసం చేసుకుంది. అంతేకాదు, టాటా పంచ్‌తో పాటు అదే కంపెనీకి చెందిన నెక్సాన్ (Nexon) కూడా రెండో స్థానంలో నిలవడంతో టాటా మోటార్స్‌కు ఇది నిజంగానే డబుల్ సెలబ్రేషన్‌గా మారింది. ఒకే కంపెనీకి చెందిన రెండు కార్లు దేశంలో అత్యధికంగా అమ్ముడైన తొలి రెండు స్థానాలను ఆక్రమించడం కంపెనీ ఉత్పత్తులపై వినియోగదారుల విశ్వాసాన్ని మరోసారి రుజువు చేసింది. గత నెల టాటా మోటార్స్‌కు చారిత్రాత్మకంగా నిలిచింది. ఒక్క నెలలోనే మొత్తం 62,076 యూనిట్ల కార్లను విక్రయించి కొత్త రికార్డు సృష్టించింది.

ఈ విజయానికి ప్రధాన కారణంగా టాటా పంచ్, టాటా నెక్సాన్ మోడళ్లు నిలిచాయి. ఆకర్షణీయమైన డిజైన్, బలమైన నిర్మాణం, అత్యాధునిక భద్రతా ఫీచర్లు, అందుబాటు ధర ఈ రెండు కార్లకు భారీ డిమాండ్ తీసుకువచ్చాయి. తాజా అమ్మకాల గణాంకాల ప్రకారం, పంచ్ గత నెలలో ఏకంగా 21,006 యూనిట్ల అమ్మకాలతో దేశంలోనే అత్యధికంగా అమ్ముడైన కారుగా నిలిచింది. మే నెలతో పోలిస్తే పంచ్ అమ్మకాలు 3.9 శాతం పెరగడం విశేషం.

చిన్న ఎస్‌యూవీ అయినప్పటికీ, పెద్ద ఎస్‌యూవీలకు ఏమాత్రం తీసిపోని డిజైన్, 5-స్టార్ సేఫ్టీ రేటింగ్, నగరంతో పాటు గ్రామీణ ప్రాంతాల్లో కూడా సౌకర్యవంతమైన డ్రైవింగ్ అనుభవం అందించడం వంటి కారణాలతో ఈ కారు వినియోగదారులను ఆకట్టుకుంటోంది. మరోవైపు, టాటా నెక్సాన్ కూడా తన బలమైన మార్కెట్ స్థానాన్ని కొనసాగించింది. గత నెలలో 18,335 యూనిట్ల అమ్మకాలతో దేశంలో రెండో అత్యధికంగా అమ్ముడైన కారుగా నిలిచింది.

మే నెలతో పోలిస్తే అమ్మకాలు స్వల్పంగా 4 శాతం తగ్గినప్పటికీ, నెక్సాన్‌పై ఉన్న డిమాండ్ మాత్రం ఇంకా బలంగానే కొనసాగుతోంది. పెట్రోల్, డీజిల్, సీఎన్‌జీ, ఎలక్ట్రిక్ పవర్‌ట్రెయిన్ ఎంపికలు అందుబాటులో ఉండటం, అత్యుత్తమ భద్రతా ప్రమాణాలు, ఆధునిక ఫీచర్లు, ప్రీమియం ఇంటీరియర్ ఈ కారును వినియోగదారుల తొలి ఎంపికల్లో ఒకటిగా నిలబెడుతున్నాయి. మొత్తంగా చూస్తే, భారతీయ కార్ల మార్కెట్లో టాటా మోటార్స్ ఆధిపత్యం మరింత బలపడుతున్నట్లు గణాంకాలు స్పష్టం చేస్తున్నాయి.

2025 జూన్‌లో 11,602 యూనిట్లుగా ఉన్న నెక్సాన్ అమ్మకాలు ఈసారి 58 శాతం పెరిగి 18,335 యూనిట్లకు చేరుకున్నాయి. అదే విధంగా, గత ఏడాది జూన్‌లో 10,446 యూనిట్లు విక్రయమైన టాటా పంచ్ ఈసారి ఏకంగా 21,006 యూనిట్ల అమ్మకాలతో 101 శాతం వృద్ధిని నమోదు చేసింది. దీంతో పంచ్ మార్కెట్ వాటా 13.6 శాతానికి, నెక్సాన్ మార్కెట్ వాటా 11.75 శాతానికి చేరుకుంది.

పంచ్ అమ్మకాల్లో ఈ స్థాయి వృద్ధికి ప్రధాన కారణం ఈ ఏడాది జనవరిలో కంపెనీ ఐసీఈ ఫేస్‌లిఫ్ట్ వెర్షన్‌ను తీసుకురావడం సేల్స్ పెరగడానికి తోడ్పడింది. కొత్త డిజైన్, ఫీచర్లతో విడుదల చేయగా, ఫిబ్రవరిలో పంచ్ ఎలక్ట్రిక్‌ను మార్కెట్లోకి తీసుకొచ్చింది. ఇక జూన్ నెలలో అత్యధికంగా అమ్ముడైన టాప్-10 కార్ల జాబితాలో టాటా పంచ్, నెక్సాన్ తొలి రెండు స్థానాలను దక్కించుకోగా, మారుతి డిజైర్ 17,899 యూనిట్లతో మూడో స్థానంలో నిలిచింది.

అనంతరం మారుతి వ్యాగన్‌ఆర్ 16,962 యూనిట్లతో నాలుగో స్థానం, మారుతి ఎర్టిగా 16,111 యూనిట్లతో ఐదో స్థానం, మారుతి స్విఫ్ట్ 15,215 యూనిట్లతో ఆరో స్థానం దక్కించుకున్నాయి. మహీంద్రా స్కార్పియో 14,097 యూనిట్లతో ఏడో స్థానంలో నిలవగా, మారుతి ఫ్రాంక్స్ 13,135 యూనిట్లతో ఎనిమిదో స్థానం, మారుతి బాలెనో 12,488 యూనిట్లతో తొమ్మిదో స్థానం, హ్యుందాయ్ వెన్యూ 10,776 యూనిట్లతో పదో స్థానంలో నిలిచాయి.