ప్రస్తుతం చాలా మంది కొంటున్న కారు ఇదే.. కేవలం 3 నెలల్లోనే 20,000! డిమాండ్‌కు బ్రేకులు లేవు

దేశీయ ఆటోమొబైల్ రంగంలో అగ్రగామిగా నిలిచిన టాటా మోటార్స్ (Tata Motors) మరోసారి తన సామర్థ్యాన్ని నిరూపించింది. ఎన్నో ఏళ్ల తర్వాత తిరిగి మార్కెట్లోకి తీసుకువచ్చిన టాటా సియోర్రా (Tata Sierra) ఇప్పుడు కొత్త రూపంలో వినియోగదారుల మనసులు గెలుచుకుంటూ, అద్భుతమైన విజయాన్ని నమోదు చేస్తోంది. పాత మోడల్‌కు ఉన్న నాస్టాల్జియాను కాపాడుతూ, ఆధునిక డిజైన్, అత్యాధునిక ఫీచర్లతో వచ్చిన ఈ కొత్త సియెర్రా, లాంచ్ అయిన కొద్ది కాలంలోనే భారీ స్పందనను దక్కించుకుంది. 2025 నవంబర్ చివరి వారంలో అధికారికంగా మార్కెట్లోకి అడుగుపెట్టిన టాటా సియోర్రా, చాలా తక్కువ సమయంలోనే కస్టమర్ల దృష్టిని ఆకర్షించింది.

లాంచ్ తర్వాత పెద్దగా ఆలస్యం చేయకుండా, 2026 జనవరి మధ్య నుంచి డెలివరీలను ప్రారంభించిన కంపెనీ, డిమాండ్‌కు తగ్గట్టుగా వేగంగా వాహనాలను అందించడంలో సక్సెస్ అయింది. ఈ క్రమంలో కేవలం రెండున్నర నెలల వ్యవధిలోనే 20,000 యూనిట్ల డెలివరీలను పూర్తి చేయడం ఒక పెద్ద మైలురాయిగా నిలిచింది. ఈ ఘనతను టాటా మోటార్స్ స్వయంగా తన అధికారిక సోషల్ మీడియా ప్లాట్‌ఫామ్ X ద్వారా ప్రకటించింది.

కొత్త సియెర్రా కోసం వినియోగదారులు ఎంతగానో ఎదురుచూసిన సంగతి తెలిసిందే. ఆ అంచనాలను నిలబెట్టుకుంటూ, కంపెనీ వేగంగా డెలివరీలు పూర్తి చేయడం, మార్కెట్లో దాని స్థాయిని మరింత బలపరిచింది. ఈ విజయం కేవలం ఒక సంఖ్య మాత్రమే కాదు; ఇది టాటా మోటార్స్‌పై వినియోగదారుల నమ్మకానికి నిదర్శనం. కొత్త సియెర్రా డిజైన్, పనితీరు, వినియోగదారులకు ఒక పూర్తి ప్యాకేజ్‌గా మారాయి. అందుకే, తక్కువ సమయంలోనే ఇంత పెద్ద డెలివరీ చేరుకుంది.

సియోర్రా మార్కెట్లోకి వచ్చిన మొదటి రోజునుంచే అద్భుతమైన స్పందనను సొంతం చేసుకుంది. బుకింగ్ విండో తెరిచిన కేవలం 24 గంటల్లోనే సుమారు 70,000 ఆర్డర్లు రావడం, ఈ SUVపై ఉన్న భారీ క్రేజ్‌ను స్పష్టంగా చూపించింది. లాంచ్ తర్వాత మొదటి నెలలోనే 7,003 యూనిట్లు అమ్ముడవడం, ఈ మోడల్ వేగాన్ని మరింత స్పష్టంగా తెలియజేసింది. తరువాత కూడా జోరు కొనసాగిస్తూ, మార్చి ప్రారంభానికి ముందే 10,000 యూనిట్ల మార్క్‌ను దాటింది.

ఈ పెరుగుతున్న డిమాండ్‌ను దృష్టిలో పెట్టుకుని టాటా మోటార్స్ తన ఉత్పత్తి సామర్థ్యాన్ని వేగంగా పెంచింది. ఈ క్రమంలో, మార్చి 31 నాటికి మొత్తం 20,000 యూనిట్ల డెలివరీలను పూర్తి చేయడం ఒక విశేషం. కేవలం కొన్ని వారాల్లోనే ఈ స్థాయి సంఖ్యను చేరుకోవడం, మార్కెట్లో సియోర్రాకి ఉన్న డిమాండ్ ఎంత ఎక్కువగా ఉందో తెలియజేస్తోంది. ప్రస్తుతం ఈ SUV కోసం బుకింగ్‌లు లక్షల్లోకి చేరుకున్నాయని కంపెనీ వర్గాలు సూచిస్తున్నాయి.

డిమాండ్ ఈ స్థాయిలో పెరుగుతున్న నేపథ్యంలో, Tata Motors ఉత్పత్తిని మరింత పెంచే దిశగా అడుగులు వేస్తోంది. వినియోగదారుల అవసరాలను తీర్చడానికి నెలకు సుమారు 15,000 యూనిట్లను తయారు చేయాలని కంపెనీ లక్ష్యంగా పెట్టుకుంది. సరఫరా గొలుసులో ఉన్న చిన్నచిన్న అడ్డంకులను తొలగించగలిగితే, ఏటా 1.5 లక్షల యూనిట్ల వరకు విక్రయాలు సాధించాలని కంపెనీ భావిస్తోంది.

టాటా సియోర్రా ఇప్పుడు మార్కెట్లో కేవలం డిమాండ్‌తోనే కాదు, తన విభిన్న వేరియంట్లు, ఇంజన్ ఆప్షన్‌లతో కూడా వినియోగదారులను ఆకట్టుకుంటోంది. మొత్తం ఏడు వేరియంట్లలో అందుబాటులోకి వచ్చిన ఈ SUV, రూ. 11.49 లక్షల ప్రారంభ ఎక్స్-షోరూమ్ ధర. పర్ఫార్మెన్స్ విషయానికి వస్తే, 1.5-లీటర్ నాచురల్లీ ఆస్పిరేటెడ్ పెట్రోల్ ఇంజన్ 104 హార్స్‌పవర్, 158 హార్స్‌పవర్ శక్తి గల టర్బో పెట్రోల్, 1.5-లీటర్ డీజిల్ ఇంజన్ ఎంపిక ఉంది.