టాటా కార్లలోనే అత్యంత వేగవంతమైన కారు.. ఒక్క చార్జ్‌తో ఏకంగా 665 కిమీ రేంజ్‎తో సియెర్రా ఈవీ లాంచ్

భారత ఆటోమొబైల్ రంగంలో సరికొత్త సంచలనానికి తెరలేచింది. దేశీయ ప్రముఖ కార్ల తయారీ సంస్థ టాటా మోటార్స్ ఎంతో కాలంగా ఆటో లవర్స్ ఎదురుచూస్తున్న తమ ఐకానిక్ ఎస్‌యూవీ సియెర్రా ఈవీ(Tata Sierra EV)ని ముంబైలోని జియో కన్వెన్షన్ సెంటర్‌లో ఘనంగా విడుదల చేసింది. ఈ కారు ప్రారంభ ఎక్స్-షోరూమ్ ధరను రూ.18.79 లక్షలుగా కంపెనీ నిర్ణయించింది. పాత సియెర్రా కారు జ్ఞాపకాలను గుర్తు చేస్తూ, ఆధునిక ఎలక్ట్రిక్ పవర్‌ట్రైన్‌తో సరికొత్త అవతారంలో ఈ కారును టాటా కంపెనీ మార్కెట్లోకి తెచ్చింది.

రెండు బ్యాటరీ ప్యాక్ ఆప్షన్లు
టాటా సియెర్రా ఈవీ కారు వినియోగదారుల కోసం రెండు రకాల బ్యాటరీ ప్యాక్ ఆప్షన్లతో లభిస్తుంది. మొదటిది 63 kWh బ్యాటరీ కాగా, రెండోది పెద్దదైన 75 kWh బ్యాటరీ ప్యాక్. ఇందులో పెద్ద బ్యాటరీ ప్యాక్ (75 kWh) ద్వారా ఒక్కసారి చార్జ్ చేస్తే రియల్ వరల్డ్‎లో 500 కిలోమీటర్లకు పైగా ప్రయాణించవచ్చని కంపెనీ ధృవీకరించింది. దీని అఫీషియల్ MIDC క్లెయిమ్డ్ రేంజ్ 665 కిలోమీటర్లుగా ఉంది. అలాగే చిన్న బ్యాటరీ ప్యాక్ 565 కిలోమీటర్ల క్లెయిమ్డ్ రేంజ్‌ను ఇస్తుంది. ఈ కార్లు 120 kW డీసీ ఫాస్ట్ చార్జింగ్‌ను సపోర్ట్ చేస్తాయి, దీనివల్ల కేవలం 26 నిమిషాల్లోనే 20 నుంచి 80 శాతం వరకు బ్యాటరీని చార్జ్ చేసుకోవచ్చు.

వివిధ వేరియంట్లు, వాటి ధరలు
టాటా మోటార్స్ ఈ కారును ప్యూర్, అడ్వెంచర్, ఎంపవర్డ్ వంటి పలు వేరియంట్లలో ప్రవేశపెట్టింది. ఎక్స్-షోరూమ్ ధరల వివరాలను పరిశీలిస్తే.. 63 kWh (RWD) ఆప్షన్లలో బేస్ వేరియంట్ ప్యూర్ ధర రూ. 18.79 లక్షలు కాగా, ప్యూర్ S ధర రూ.19.99 లక్షలుగా ఉంది. అలాగే అడ్వెంచర్ వేరియంట్ ధర రూ.20.99 లక్షలు, ఎంపవర్డ్ వేరియంట్ ధర రూ.22.79 లక్షలుగా నిర్ణయించారు.

ఇక పెద్దదైన 75 kWh (RWD) బ్యాటరీ ఆప్షన్లలో అడ్వెంచర్ ధర రూ.22.19 లక్షలు, ఎంపవర్డ్ ధర రూ.23.79 లక్షలు, టాప్ ఎండ్ వేరియంట్ ఎంపవర్డ్ A ధర రూ.24.79 లక్షలుగా ఉంది. ఒకవేళ వినియోగదారులు క్వాడ్ వీల్ డ్రైవ్ (QWD) ఎక్స్‌పీరియన్స్ కావాలనుకుంటే ఎంపవర్డ్ A 75 వేరియంట్‌పై అదనంగా రూ.1.2 లక్షలు, అలాగే 7.2 kW ఏసీ ఫాస్ట్ చార్జర్ కోసం అదనంగా రూ.49,000 చెల్లించాల్సి ఉంటుందని కంపెనీ పేర్కొంది.

తిరుగులేని పవర్, క్వాడ్ వీల్ డ్రైవ్ టెక్నాలజీ
టాటా సియెర్రా ఈవీ భారతదేశంలోనే తయారైన అత్యంత వేగవంతమైన కార్లలో ఒకటిగా నిలవనుంది. ఇది కేవలం 5.8 సెకన్లలోనే 0 నుంచి 100 కిలోమీటర్ల వేగాన్ని అందుకోగలదు. ఈ కారు హయ్యర్ వేరియంట్లలో క్వాడ్ వీల్ డ్రైవ్ (QWD) లేదా ఆల్-వీల్ డ్రైవ్ టెక్నాలజీని అందించారు. ఇందులో రెండు ఎలక్ట్రిక్ మోటార్లు ఉంటాయి. వెనుక వైపు 175 kW మోటార్ (240 Nm టార్క్), ముందు వైపు 103 kW మోటార్ (164 Nm టార్క్) కలిసి కారుకు అద్భుతమైన పవర్‌ను ఇస్తాయి. దీనివల్ల కొండలు, బురద, ఇసుక రోడ్లపై కూడా ఈ కారు సులభంగా దూసుకుపోతుంది.

టాటా సియెర్రా ఈవీ మొత్తం ఏడు ఆకర్షణీయమైన కలర్ ఆప్షన్లలో అందుబాటులోకి వచ్చింది. వీటిలో రిషికేశ్ రాపిడ్స్, నైనిటాల్ నాక్టర్న్, ప్రిస్టిన్ వైట్, అండమాన్ అడ్వెంచర్, ప్యూర్ గ్రే, బెంగాల్ రూజ్, కూర్గ్ క్లౌడ్ ఉన్నాయి. వీటిలో రిషికేశ్ రాపిడ్స్, నైనిటాల్ నాక్టర్న్ రంగులు మాత్రమే క్వాడ్ వీల్ డ్రైవ్ (QWD) వేరియంట్లకు ప్రత్యేకంగా అందించనున్నారు.

ఇంటీరియర్‌లో థియేటర్ ప్రో అనుభూతి
ఈ కారు లోపలి భాగం (ఇంటీరియర్) అత్యంత విలాసవంతంగా, సరికొత్త టెక్నాలజీతో డిజైన్ చేయబడింది. కార్ల చరిత్రలోనే మొదటిసారిగా డ్యాష్‌బోర్డ్‌పై ట్రిపుల్ స్క్రీన్ (Triple Screen Layout) అమరికను ఇచ్చారు. ఇందులో డ్రైవర్ డిస్‌ప్లే, మెయిన్ ఇన్ఫోటైన్‌మెంట్ స్క్రీన్‌తో పాటు ముందు కూర్చునే ప్యాసింజర్ కోసం ప్రత్యేకంగా మూడో స్క్రీన్‌ను కూడా ఏర్పాటు చేశారు.

జేబీఎల్ (JBL) సౌండ్‌బార్, 12 స్పీకర్లు, డాల్బీ అట్మోస్ (Dolby Atmos) సపోర్ట్‌తో కారులోనే థియేటర్ లాంటి ఫీలింగ్ కలుగుతుంది. ఇవే కాకుండా హెడ్స్-అప్ డిస్‌ప్లే (HUD), వైర్‌లెస్ చార్జర్, ఎయిర్ ప్యూరిఫైయర్, కూల్డ్ సీట్లు, కారును ఆటోమేటిక్‌గా పార్క్ చేసే ఈ-వాలెట్ (సమన్ మోడ్) వంటి అత్యాధునిక ఫీచర్లు ఇందులో ఉన్నాయి.

లైఫ్ టైమ్ బ్యాటరీ వారెంటీ, సేఫ్టీ
వినియోగదారులలో ఎలక్ట్రిక్ కార్ల బ్యాటరీలపై ఉండే అపోహలను తొలగించడానికి టాటా మోటార్స్ ఈ కారుతో పాటు తమ మొత్తం ఈవీ పోర్ట్‌ఫోలియోపై లైఫ్‌టైమ్ బ్యాటరీ వారెంటీని ప్రకటించింది. సేఫ్టీ పరంగా ఈ కారులో 6 ఎయిర్‌బ్యాగ్‌లు, ఆల్-వీల్ డిస్క్ బ్రేక్‌లు, ఎలక్ట్రానిక్ పార్కింగ్ బ్రేక్, అడ్వాన్స్‌డ్ డ్రైవింగ్ అసిస్టెన్స్ సిస్టమ్ (ADAS Level 2) వంటి టాప్ క్లాస్ సేఫ్టీ ఫీచర్లను అందించారు. మార్కెట్లో ఇది మహీంద్రా BE 6, మారుతి సుజుకి ఈ-విటారా, హ్యుందాయ్ క్రెటా ఈవీ, ఎంజీ జెడ్ఎస్ ఈవీ వంటి మోడళ్లకు గట్టి పోటీ ఇవ్వనుంది.

బుకింగ్స్, డెలివరీల వివరాలు
ఈ సరికొత్త ఎలక్ట్రిక్ ఎస్‌యూవీ కోసం ఎదురుచూస్తున్న వారికి కంపెనీ అదిరిపోయే అప్‌డేట్ ఇచ్చింది. టాటా సియెర్రా ఈవీ బుకింగ్స్ ఈ రోజు నుంచే (జూన్ 30, 2026) ప్రారంభం అవుతున్నట్లు సంస్థ ప్రకటించింది. అంతేకాకుండా ఈ కారు డెలివరీలు వచ్చే నెల జూలై 15, 2026 నుంచి ప్రారంభం కానున్నాయి.