Tata Sierra : లేటయినా లేటెస్ట్ గా వచ్చేసింది.. ఒక్క రోజు 101 కార్లు డెలివరీ చేసి టాటా డీలర్ రికార్డ్

Tata Sierra : భారతీయ ఆటోమొబైల్ రంగంలో టాటా మోటార్స్ సృష్టించిన ప్రభంజనం అంతా ఇంతా కాదు. పాత జ్ఞాపకాలను సరికొత్త హంగులతో వెండితెరపైకి తెచ్చినట్లుగా, టాటా సియెర్రా (Tata Sierra) ఎస్‌యూవీని మార్కెట్లోకి తెచ్చి కస్టమర్లను మంత్రముగ్ధులను చేస్తోంది. తాజాగా గుజరాత్‌లో జరిగిన ఒక సంఘటన టాటా సియెర్రాకు ఉన్న క్రేజ్‌ను అద్దం పడుతోంది. అహ్మదాబాద్‌లోని ఒక టాటా డీలర్ కేవలం ఒక్క రోజులోనే ఏకంగా 101 సియెర్రా ఎస్‌యూవీలను కస్టమర్లకు డెలివరీ చేసి రికార్డు సృష్టించారు. ఈ భారీ డెలివరీ కార్యక్రమానికి సంబంధించిన వీడియోను టాటా మోటార్స్ స్వయంగా తన అధికారిక యూట్యూబ్ ఛానల్‌లో షేర్ చేయడంతో అది కాస్తా వైరల్‌గా మారింది.

గుజరాత్‌లోని అహ్మదాబాద్ నగరంలో ఉన్న టాటా డీలర్‌షిప్ వద్ద పండుగ వాతావరణం నెలకొంది. తమ అభిమాన ఎస్‌యూవీ కోసం నెలల తరబడి వేచి చూసిన కస్టమర్లకు ఒకేసారి సర్ ప్రైజ్ ఇవ్వాలని డీలర్ నిర్ణయించారు. దీనికోసం ప్రత్యేకంగా ఒక వేడుకను ఏర్పాటు చేసి, ఏకకాలంలో 101 టాటా సియెర్రా కార్లను డెలివరీ చేశారు. వరుసగా నిలబెట్టిన తెల్లటి, బూడిద రంగు సియెర్రాల మధ్య కస్టమర్లు తమ కుటుంబ సభ్యులతో కలిసి వచ్చి కార్ల తాళాలను అందుకున్నారు. ఈ దృశ్యం అద్భుతంగా ఉండటంతో టాటా మోటార్స్ కూడా దీనిని గర్వంగా సోషల్ మీడియాలో పంచుకుంది. కేవలం అహ్మదాబాద్‌లోనే కాకుండా, గత వారం మధ్యప్రదేశ్ డీలర్ కూడా ఇలాగే వందకు పైగా కార్లను డెలివరీ చేయడం విశేషం.

గత ఏడాది నవంబర్‌లో లాంచ్ అయిన టాటా సియెర్రాకు బుకింగ్‌లు వెల్లువెత్తుతున్నాయి. జనవరి 2026 నుంచి డెలివరీలను ప్రారంభించిన టాటా మోటార్స్, కేవలం మూడు నెలల వ్యవధిలోనే సుమారు 14,000 యూనిట్లను కస్టమర్ల చేతిలో పెట్టింది. పాతసియెర్రా మోడల్‌కు ఉన్న సెంటిమెంట్‌కు తోడు, ఆధునిక టెక్నాలజీని జోడించడంతో యువత కూడా ఈ కారు వైపు మొగ్గు చూపుతోంది. ప్రస్తుతం మార్కెట్లో ఉన్న డిమాండ్ కారణంగా ఈ ఎస్‌యూవీకి వెయిటింగ్ పీరియడ్ కూడా గణనీయంగా పెరిగింది. అయినా సరే, కస్టమర్లు దీని కోసమే వేచి చూడటం విశేషం.

మూడు రకాల పవర్‌ఫుల్ ఇంజిన్ ఆప్షన్లు
కస్టమర్ల అభిరుచులకు అనుగుణంగా టాటా సియెర్రాను మూడు రకాల ఇంజిన్ ఆప్షన్లతో అందుబాటులోకి తెచ్చారు.
1.5 లీటర్ పెట్రోల్ ఇంజిన్: ఇది టాటా సొంతంగా అభివృద్ధి చేసిన సరికొత్త 4-సిలిండర్ ఇంజిన్. ఇది 105 bhp పవర్, 145 Nm టార్క్‌ను ఇస్తుంది. ఇది మాన్యువల్, డీసీఏ (DCA) గేర్‌బాక్స్ ఆప్షన్లతో వస్తుంది.

1.5 లీటర్ టర్బో పెట్రోల్: ఇది స్పీడ్ కోరుకునే వారి కోసం ప్రత్యేకంగా రూపొందించబడింది. ఏకంగా 158 bhp పవర్, 255 Nm టార్క్‌ను అందిస్తుంది. ఇది కేవలం 6-స్పీడ్ ఆటోమేటిక్ ట్రాన్స్‌మిషన్‌తో మాత్రమే అందుబాటులో ఉంది.
1.5 లీటర్ టర్బో డీజిల్: లాంగ్ జర్నీలు చేసే వారికి ఇది బెస్ట్ ఆప్షన్. ఇది 116 bhp పవర్, 260 Nm టార్క్‌ను ఇస్తుంది. మాన్యువల్, ఆటోమేటిక్ గేర్‌బాక్స్ రెండింటిలోనూ ఇది లభిస్తుంది.

టాటా సియెర్రా లోపలి భాగం ఒక లగ్జరీ హోటల్ రూమ్‌ను తలపిస్తుంది. తన సెగ్మెంట్‌లోనే అతిపెద్ద పనోరమిక్ సన్ రూఫ్ కలిగిన కార్లలో ఇది ఒకటి. డ్యాష్‌బోర్డ్ మీద ట్రిపుల్ డిస్ప్లే సెటప్ ఉండటం ఈ కారు ప్రత్యేకత. ఇందులో రెండు టచ్‌స్క్రీన్ ఇన్ఫోటైన్‌మెంట్ సిస్టమ్‌లు మరియు ఒక ఫుల్లీ డిజిటల్ ఇన్‌స్ట్రుమెంట్ క్లస్టర్ ఉంటాయి. ఇవే కాకుండా లెదర్ సీట్లు, సీట్ వెంటిలేషన్, మెమరీ సీట్ ఫంక్షన్, ఎలక్ట్రిక్ టెయిల్ గేట్ వంటి ప్రీమియం ఫీచర్లు ఉన్నాయి. సంగీత ప్రియుల కోసం ఇందులో అత్యాధునిక ఆడియో సిస్టమ్‌ను కూడా అమర్చారు.

సేఫ్టీలో టాటా అంటే తిరుగులేదు!
ఎప్పటిలాగే సేఫ్టీ విషయంలో టాటా ఎక్కడా రాజీ పడలేదు.సియెర్రా ఎస్‌యూవీలో లెవల్ 2 ఏడీఏఎస్ (ADAS) టెక్నాలజీని ఇచ్చారు. ఇది రోడ్డుపై ప్రమాదాలను ముందుగానే గుర్తించి డ్రైవర్‌ను హెచ్చరిస్తుంది. అలాగే 6 ఎయిర్‌బ్యాగ్‌లు, ఎలక్ట్రానిక్ స్టెబిలిటీ కంట్రోల్ (ESC), ట్రాక్షన్ కంట్రోల్, ఐసోఫిక్స్ చైల్డ్ సీట్ యాంకర్లు వంటి భద్రతా ప్రమాణాలను కఠినంగా పాటించారు. గ్లోబల్ ఎన్‌క్యాప్ రేటింగ్‌లో కూడా ఈ కారు అద్భుతమైన స్కోరు సాధిస్తుందని కంపెనీ ధీమాగా ఉంది. ఈ కారణాల వల్లే ఫ్యామిలీ కస్టమర్లుసియెర్రాను కొనేందుకు క్యూ కడుతున్నారు.

టాటా సియెర్రా ఎక్స్-షోరూమ్ ధర రూ.11.49 లక్షల నుంచి రూ. 21.29 లక్షల వరకు ఉంది. ఈ ధర వద్ద ఇది ఎంజీ హెక్టర్, మహీంద్రా మరాజో, స్కోడా కుషాక్, హోండా ఎలివేట్ వంటి కార్లకు గట్టి పోటీనిస్తోంది. ఐకానిక్ లుక్ తో పాటు మోడ్రన్ ఫీచర్లు తక్కువ ధరకే లభిస్తుండటంతో కస్టమర్లు సియెర్రా వైపు మొగ్గు చూపుతున్నారు. ముఖ్యంగా ఆఫ్-రోడింగ్ సామర్థ్యం కలిగిన ఎస్‌యూవీ కోసం చూసే వారికి ఇది ఒక సరైన గమ్యస్థానం. రాబోయే రోజుల్లో సియెర్రా అమ్మకాలు మరిన్ని రికార్డులను సృష్టించడం ఖాయంగా కనిపిస్తోంది.