ఒక్కరోజులో 100 కార్లు చేతికి.. ఈ కారు డిమాండ్ ఎక్కడికి చేరిందో చూడండి! టాటా సియెర్రా రికార్డ్ క్రేజ్!

భారత ఆటోమొబైల్ రంగంలో ఒకప్పుడు ప్రత్యేక గుర్తింపు తెచ్చుకున్న టాటా సియోర్రా (Tata Sierra), ఇప్పుడు మళ్లీ కొత్త తరం రూపంలో వచ్చి అదే క్రేజ్‌ను కొనసాగించడం నిజంగా ఆసక్తికర పరిణామం. తొంభైలలోనే తన డిజైన్, పనితీరు, ప్రీమియం ఫీల్‌తో ట్రెండ్ సెట్టర్‌గా నిలిచిన ఈ SUV, ఇప్పటి నూతన అవతారంలో కూడా వినియోగదారులను అదే స్థాయిలో ఆకట్టుకోవడం టాటా మోటార్స్ (Tata Motors)కు మరింత నమ్మకాన్ని కల్పిస్తోంది. కొత్త సియెర్రా మార్కెట్లోకి వచ్చినప్పటి నుంచే, దీనిపై వినియోగదారుల ఆసక్తి గణనీయంగా పెరిగింది. డిజైన్‌లో మోడర్న్ టచ్, టెక్నాలజీలో అప్‌డేట్స్, అలాగే ఫ్యామిలీకి సరిపోయే ప్రాక్టికాలిటీ కలిపి ఈ SUVను మళ్లీ ఒక ప్రత్యేక స్థానంలో నిలిపాయి.

ఈ భారీ డిమాండ్‌ను దృష్టిలో పెట్టుకుని, టాటా మోటార్స్ ఇప్పటికే ఉత్పత్తి సామర్థ్యాన్ని పెంచే దిశగా ప్రణాళికలు రూపొందిస్తూ ముందుకు సాగుతోంది. ఇలాంటి సమయంలో, దేశవ్యాప్తంగా చర్చనీయాంశంగా మారిన ఒక సంఘటన చోటుచేసుకుంది. ఒక టాటా డీలర్‌షిప్ ఒక్కరోజులోనే 100కు పైగా సియెర్రా కార్లను డెలివరీ చేయడం అందరినీ ఆశ్చర్యపరిచింది. ఈ భారీ డెలివరీ ఈవెంట్‌కు సంబంధించిన ఫోటోలు, వివరాలను వాహన్ వార్త తమ ఎక్స్ ప్లాట్‌ఫామ్ ద్వారా పంచుకుంది.

ప్రస్తుతం ఈ వార్త మరింత వేగంగా వైరల్ అయింది. ఆసక్తికరమైన విషయం ఏమిటంటే, ఈ ఘనత కేరళలో కాదు, మధ్యప్రదేశ్‌లోని ఒక డీలర్‌షిప్ వద్ద చోటుచేసుకుంది. ఒకేసారి ఇంత పెద్ద సంఖ్యలో కార్లను కస్టమర్లకు అందించడం, ఆ మోడల్‌కు ఉన్న డిమాండ్‌, బ్రాండ్‌పై వినియోగదారుల విశ్వాసాన్ని స్పష్టంగా చూపిస్తోంది. సాధారణంగా కొత్త మోడల్‌లకు ప్రారంభంలో కొంత సమయం పట్టే పరిస్థితుల్లో, సియెర్రా ఈ రీతిలో మార్కెట్లో హడావుడి సృష్టించడం ప్రత్యేకం.

టాటా మోటార్స్‌కు చెందిన టాటా సియోర్రా మార్కెట్లో మంచి జోష్‌తో ముందుకు సాగుతోంది. ఫిబ్రవరి నెలలో కంపెనీ మొత్తం 7,100 యూనిట్ల సియెర్రాను విక్రయించగా, జనవరిలో ఈ సంఖ్య 7,003 యూనిట్లుగా నమోదైంది. అంటే నెల నెలకు డిమాండ్ క్రమంగా పెరుగుతోందని స్పష్టంగా తెలుస్తోంది. ఈ వృద్ధి కేవలం సంఖ్యల్లోనే కాదు, వినియోగదారుల ఆసక్తిలో కూడా కనిపిస్తోంది.

ఈ పెరుగుతున్న డిమాండ్‌ను దృష్టిలో ఉంచుకుని, టాటా మోటార్స్ ఇప్పుడు ఉత్పత్తి వేగాన్ని పెంచే దిశగా అడుగులు వేస్తోంది. ఉత్పత్తి పెరిగితే వాహనాలను కస్టమర్లకు త్వరగా అందించగలుగుతారు, దాంతో అమ్మకాల సంఖ్య మరింత పెరిగే అవకాశముంది. ప్రస్తుతం కంపెనీ ఎదుర్కొంటున్న ప్రధాన సమస్యల్లో ఒకటి సియెర్రా ఉత్పత్తి తగినంతగా లేకపోవడమే. డిమాండ్ ఉన్నప్పటికీ, సరఫరా పరిమితంగా ఉండటం వల్ల డెలివరీలలో ఆలస్యం జరుగుతోంది.

ఇటీవల కంపెనీ వెల్లడించిన వివరాల ప్రకారం, సియెర్రాకు వచ్చిన మొత్తం బుకింగ్‌లు ఇప్పటికే 70,000 యూనిట్లను దాటి, 1 లక్ష యూనిట్లకు పైగా చేరుకున్నాయి. ఇది ఈ SUVకు ఉన్న క్రేజ్‌ను స్పష్టంగా తెలియజేస్తోంది. అయితే, ప్రస్తుతానికి ఉత్పత్తి సామర్థ్యం అంత పెద్ద డిమాండ్‌ను తీరుస్తున్న స్థాయిలో లేకపోవడం వల్ల కంపెనీపై ఒత్తిడి పెరుగుతోంది.

ఈ సమస్యను అధిగమించడానికి, గుజరాత్‌లోని సనంద్‌లో ఉన్న తమ తయారీ కేంద్రంలో ఉత్పత్తి సామర్థ్యాన్ని పెంచే పనులను టాటా మోటార్స్ వేగవంతం చేసింది. రాబోయే రోజుల్లో ఉత్పత్తిని నెలకు సుమారు 15,000 యూనిట్ల వరకు పెంచాలని కంపెనీ లక్ష్యంగా పెట్టుకుంది. ఇది సాధ్యమైతే, పెండింగ్ బుకింగ్‌లను త్వరగా క్లియర్ చేయడమే కాకుండా, కొత్త కస్టమర్లను కూడా సంతృప్తిపరచడం సులభం అవుతుంది.

టాటా సియోర్రా ఇప్పుడు భారత మార్కెట్లో విభిన్న బడ్జెట్‌లకు సరిపోయేలా విస్తృత ధర శ్రేణిలో అందుబాటులో ఉంది. ఈ SUV ప్రారంభ ధర రూ. 11.49 లక్షల నుంచి మొదలై, టాప్ వేరియంట్‌లకు వెళ్లే కొద్దీ రూ. 21.29 లక్షల వరకు (ఎక్స్-షోరూమ్, ఇండియా) చేరుతుంది. ఇది 1.5-లీటర్ నేచురల్లి ఆస్పిరేటెడ్(NA) పెట్రోల్, 1.5-లీటర్ GDi టర్బో పెట్రోల్ ఇంజన్, 1.5-లీటర్ ఫోర్-సిలిండర్ డీజిల్‌లో లభిస్తుంది.