తక్కువ ధరలో టాప్ క్లాస్ ఫీచర్లు.. కొత్త టాటా టియాగో ఫేస్‌లిఫ్ట్ మార్కెట్‌ను షేక్ చేస్తుందా?

భారతదేశంలోని దిగ్గజ ఆటోమొబైల్ సంస్థ టాటా మోటార్స్ (Tata Motors) మధ్యతరగతి ప్రజల కోసం ఒక అదిరిపోయే గుడ్ న్యూస్ చెప్పింది. తమ పాపులర్ హాచ్‌బ్యాక్ కారు టియాగోను సరికొత్త ఫేస్‌లిఫ్ట్ (Tiago Facelift) అవతారంలో మార్కెట్లోకి విడుదల చేసింది. ఈ కొత్త మోడల్‌ను కేవలం రూ.4.69 లక్షల (ఎక్స్-షోరూమ్) ప్రారంభ ధరకే కంపెనీ తీసుకురావడం విశేషం. కస్టమర్ల జేబుకు పెద్దగా చిల్లు పడకుండా, తక్కువ ధరలోనే సరికొత్త డిజైన్, అప్‌గ్రేడెడ్ ఇంటీరియర్, మోడ్రన్ టెక్నాలజీ ఫీచర్లతో ఈ కారును టాటా అద్భుతంగా తీర్చిదిద్దింది. పాత మోడల్‌తో పోలిస్తే ఇందులో ఏయే మార్పులు వచ్చాయో తెలుసుకుందాం.

అదిరిపోయే ఎక్స్‌టీరియర్ మార్పులు ఇవే
కొత్త టాటా టియాగో ఫేస్‌లిఫ్ట్ కారు పొడవు, వెడల్పు వంటి కొలతల్లో ఎలాంటి మార్పులు లేవు. కానీ, దీని ఎక్స్‎టీరియర్ మాత్రం చాలా స్టైలిష్‌గా మార్చేశారు. కారు ముందు భాగంలో సరికొత్తగా రీ-డిజైన్ చేసిన మెటల్ గ్రిల్ ఉంది. దీనికి ఇరువైపులా ఎల్‌ఈడీ (LED) హెడ్ లైట్లు, వాటితో పాటే కలిసిపోయేలా డేటైమ్ రన్నింగ్ లైట్లను (DRLs) అందించారు.

ఇక కారు వెనుక వైపు చూస్తే, ఈ కాలపు మోడ్రన్ కార్ల లాగా రెండు టెయిల్ లైట్లను కలుపుతూ ఒక కనెక్టింగ్ ప్యానెల్‌ను ఇచ్చారు. అయితే ఈ మధ్యలో ఉండే ప్యానెల్ వెలగదు (Non-illuminated). కారు రూఫ్ (Roof), అవుట్‌సైడ్ రేర్ వ్యూ మిరర్స్ (ORVMs)కు బ్లాక్ కలర్ ట్రీట్‌మెంట్ ఇవ్వడం వల్ల కారుకి మంచి యూత్‌ఫుల్ అండ్ స్పోర్టీ లుక్ వచ్చింది.

లగ్జరీగా మారిన ఇంటీరియర్ కేబిన్
టాటా టియాగో కేబిన్ లోపల ఈసారి అత్యంత ముఖ్యమైన అప్‌గ్రేడ్లు జరిగాయి. పాత మోడల్‌లో ఉన్న గ్లోసీ డాష్‌బోర్డ్‌ను మెయింటెనెన్స్ చేయడం కష్టంగా ఉండేది, అందుకే ఇప్పుడు దాని స్థానంలో సరికొత్త మేట్ ఫినిషింగ్ డాష్‌బోర్డ్‌ను ప్రవేశపెట్టారు. దీనికి మ్యాచ్ అయ్యేలా కారు డోర్ ప్యాడలు, సీట్లకు డ్యూయల్-టోన్ కలర్ ఫ్యాబ్రిక్ అప్హోల్స్టరీని అందించారు. డ్రైవర్‌కు సమాచారం అందించే సెమీ-డిజిటల్ ఇన్‌స్ట్రుమెంట్ క్లస్టర్ స్క్రీన్‌ను ఇప్పుడు పూర్తిగా ఫుల్లీ డిజిటల్ స్క్రీన్‌గా మార్చేశారు. కారులోని 2-స్పోక్ స్టీరింగ్ వీల్ డిజైన్ మారకపోయినా, దానిపై ఉండే కంట్రోల్ బటన్స్ షేప్‌ను కొద్దిగా అప్‌డేట్ చేశారు.

10.24-ఇంచ్ టచ్ స్క్రీన్ ఇన్ఫోటైన్‌మెంట్
వినోదం విషయానికి వస్తే.. ఈ కారులో పెద్దగా మార్పులు చేయనప్పటికీ యూజర్ ఎక్స్‌పీరియన్స్‌ను పెంచే ప్రయత్నం చేశారు. ఇందులో మునుపటి లాగే 10.24-ఇంచుల సైజు గల పెద్ద టచ్ స్క్రీన్ ఇన్ఫోటైన్‌మెంట్ సిస్టమ్‌ను కొనసాగించారు. అయితే, దీని సాఫ్ట్‌వేర్ ఇంటర్‌ఫేస్‌ను టాటా మరింత స్మూత్‌గా, అప్‌గ్రేడెడ్‌గా మార్చింది. దీనివల్ల కారు నడుపుతున్నప్పుడు స్క్రీన్‌ను ఆపరేట్ చేయడం మునుపటి కంటే చాలా సులభంగా, వేగంగా మారుతుంది. వీటన్నింటితో పాటు టియాగోలోని వేరియంట్ల పేర్లను కూడా టాటా ఈసారి మార్చడం విశేషం.

ఇంజన్ పవర్ సేమ్ టు సేమ్
ఇంజన్ పరంగా చూస్తే టియాగోలో ఎలాంటి మార్పులు లేవు. ఇందులో ఎప్పటిలాగే నమ్మకమైన 1.2-లీటర్ నేచురల్లీ-ఆస్పిరేటెడ్ పెట్రోల్ ఇంజన్‌ను వాడారు. ఇది పెట్రోల్ మోడ్‌లో 85 bhp పవర్‌ను జనరేట్ చేస్తుంది. అదే సీఎన్‌జీ (CNG) మోడ్‌లో అయితే 74 bhp పవర్‌ను ఇస్తుంది. ఈ రెండు ఇంధన ఆప్షన్లలోనూ 5-స్పీడ్ మాన్యువల్, ఏఎమ్‌టీ (AMT) గేర్‌బాక్స్ ఆప్షన్లు అందుబాటులో ఉన్నాయి. అయితే, ఏఎమ్‌టీ (AMT) కార్లలో పాత గేర్ స్టిక్‌కు టాటా స్వస్తి పలికింది. దానికి బదులుగా ప్రీమియం కార్లలో వచ్చేలాంటి సరికొత్త రోటరీ డయల్ సెలెక్టర్‎ను ఈ ఫేస్‌లిఫ్ట్ మోడల్‌లో అమర్చింది.

మార్కెట్లో గట్టి పోటీ ఖాయం

టాటా మోటార్స్ టియాగోను కేవలం లుక్స్ పరంగానే కాకుండా, టెక్నాలజీ పరంగా కూడా ఎంతో మెరుగుపరిచింది. ఇంతటి భారీ ఫేస్‌లిఫ్ట్ మార్పులు చేసినప్పటికీ, కారు ధరను భారీగా పెంచకుండా బడ్జెట్ పరిధిలోనే ఉంచడం టాటా చేసిన గొప్ప విషయమని చెప్పాలి. మార్కెట్లోకి సరికొత్తగా వచ్చిన ఈ చౌకైన టాటా హ్యాచ్‌బ్యాక్ కారు.. విక్రయాల పరంగా మారుతి సుజుకి స్విఫ్ట్, వ్యాగన్ఆర్, హ్యుందాయ్ గ్రాండ్ ఐ10 నియోస్ వంటి పాపులర్ కార్లకు గట్టి పోటీ ఇవ్వడం ఖాయంగా కనిపిస్తోంది.