రూ.5 లక్షల్లో టాటా బెస్ట్ కారు.. పెట్రోల్, CNG, EV మూడు ఆప్షన్‌లు.. చాలా మంది కొంటున్నారు!

సరసమైన ధర, బలమైన నిర్మాణం, మంచి భద్రతా ప్రమాణాలు, నమ్మకమైన పనితీరుతో భారత మార్కెట్లో ప్రత్యేక గుర్తింపు సంపాదించుకున్న హ్యాచ్‌బ్యాక్ కార్లలో టాటా టియాగో (Tata Tiago) ఒకటి. ముఖ్యంగా మొదటిసారి కారు కొనుగోలు చేయాలనుకునే వారు, తక్కువ బడ్జెట్‌లో మంచి ఫీచర్లు, సేఫ్టీ కోరుకునే కుటుంబాలు ఈ కారును ఎక్కువగా ఎంపిక చేస్తున్నారు. ఆకర్షణీయమైన డిజైన్‌తో పాటు నగరాల్లో, గ్రామాల్లో ప్రయాణాలకు అనువైన సైజు, తక్కువ నిర్వహణ ఖర్చు, మంచి మైలేజ్ వంటి అంశాలు టియాగోను తన సెగ్మెంట్‌లో బలమైన పోటీదారుగా నిలబెట్టాయి. టాటా మోటార్స్ ఈ కారును ఎప్పటికప్పుడు కొత్త ఫీచర్లతో అప్‌డేట్ చేస్తూ వినియోగదారుల అవసరాలకు అనుగుణంగా తీర్చిదిద్దుతోంది.

అందుకే మార్కెట్లోకి కొత్త మోడళ్లు వచ్చినప్పటికీ టియాగోపై వినియోగదారుల ఆసక్తి ఏమాత్రం తగ్గడం లేదు. తాజాగా విడుదలైన 2026 జూన్ అమ్మకాల గణాంకాలు కూడా టియాగోకు మార్కెట్లో ఉన్న ఆదరణను మరోసారి రుజువు చేశాయి. జూన్ నెలలో ఈ హ్యాచ్‌బ్యాక్‌ను 7,329 మంది కొనుగోలు చేశారు. గత ఏడాది ఇదే నెలలో నమోదైన 6,032 యూనిట్ల అమ్మకాలతో పోలిస్తే ఇది దాదాపు 22 శాతం వార్షిక వృద్ధి సాధించింది.

పెరుగుతున్న పోటీ మధ్య కూడా టియాగో ఇలాంటి వృద్ధిని నమోదు చేయడం, ఈ కారు ఇప్పటికీ భారతీయ వినియోగదారుల నమ్మకాన్ని నిలబెట్టుకుంటోందనే విషయాన్ని స్పష్టంగా తెలియజేస్తోంది. ముఖ్యంగా బడ్జెట్, సేఫ్టీ, పనితీరు మధ్య సమతుల్యత కోరుకునే వారికి టాటా టియాగో ఇప్పటికీ అత్యుత్తమ ఎంపికల్లో ఒకటిగా నిలుస్తోంది. యువత, చిన్న కుటుంబాలు, రోజువారీ నగర ప్రయాణాల కోసం ఇది అత్యంత ఇష్టమైన కారుగా కొనసాగుతోంది.

ధర పరంగా చూస్తే, టాటా టియాగో IC ఇంజిన్ వేరియంట్ ప్రారంభ ధర రూ.4.70 లక్షల (ఎక్స్-షోరూమ్) నుంచి ప్రారంభమవుతోంది. దీంతో తక్కువ బడ్జెట్‌లో మంచి ఫీచర్లు, భద్రత, విశ్వసనీయమైన పనితీరు కలిగిన కారు కోరుకునే వారికి ఇది మంచి ఎంపికగా మారింది. ఇదే మోడల్‌ను CNG వేరియంట్‌లో కూడా టాటా మోటార్స్ అందిస్తోంది. ఎక్కువ మైలేజ్, తక్కువ ఫ్యూయల్ ఖర్చు కోరుకునే వారికి ఈ ఆప్షన్ ప్రయోజనకరంగా ఉంటుంది.

టియాగో EV కూడా అందుబాటులో ఉంది. దీని ప్రారంభ ధర రూ.6.99 లక్షల (ఎక్స్-షోరూమ్) నుంచి ఉండటంతో, తక్కువ ధరలో ఎలక్ట్రిక్ కారు కొనుగోలు చేయాలనుకునే వారికి ఇది మంచి ఎంపిక. ఈ ధరలు అధికారిక వెబ్‌సైట్‌లో పేర్కొన్న ఎక్స్-షోరూమ్ ధరలు మాత్రమే. రిజిస్ట్రేషన్ ఛార్జీలు, ఇన్సూరెన్స్, RTO ఫీజులు, స్థానిక పన్నుల కారణంగా నగరం లేదా రాష్ట్రాన్ని బట్టి ఆన్-రోడ్ ధరల్లో స్వల్ప మార్పులు ఉండే అవకాశం ఉంది.

టియాగోలో 1.2-లీటర్ రెవోట్రాన్ 3-సిలిండర్ పెట్రోల్ ఇంజిన్ అందించారు. ఈ ఇంజిన్ పెట్రోల్ వేరియంట్‌లో గరిష్టంగా 86 PS పవర్, 113 Nm టార్క్ ఉత్పత్తి చేస్తూ నగరాల్లో, హైవేపై కూడా సంతృప్తికరమైన పనితీరును అందిస్తుంది. టాటా CNG వేరియంట్ అదే 1.2-లీటర్ ఇంజిన్ 74 PS పవర్‌ను ఉత్పత్తి చేస్తుంది. మైలేజ్ పరంగా ఈ మోడల్ కిలో CNGకు గరిష్టంగా 28.06 కిలోమీటర్లు అందిస్తుందని కంపెనీ పేర్కొంటోంది.

అదే సమయంలో టియాగో EV 19.2 kWh, 24 kWh అనే రెండు బ్యాటరీ ప్యాక్ ఆప్షన్లు లభిస్తున్నాయి. బ్యాటరీ వేరియంట్‌ను బట్టి ఒక్కసారి పూర్తి ఛార్జ్ చేస్తే 223 కిలోమీటర్ల నుంచి 293 కిలోమీటర్ల వరకు డ్రైవింగ్ రేంజ్‌ను అందిస్తుంది. దీంతో నగరంలో రోజువారీ ప్రయాణాలతో పాటు వారాంతపు ట్రిప్‌లకు కూడా టియాగో EV మంచి ఎంపికగా నిలుస్తోంది. మొత్తంగా టియాగో మూడు పవర్‌ట్రెయిన్‌లో కొనుగోలుకు లభిస్తుంది.