చిన్న కార్లలో పెద్ద పోటీ! సై అంటే సై.. నువ్వా-నేనా అంటున్న తోపు కార్లు.. కొనాలంటే ఏది బెస్ట్?

భారత ఆటోమొబైల్ మార్కెట్లో ఎంట్రీ-లెవల్ హ్యాచ్‌బ్యాక్ విభాగానికి ప్రత్యేకమైన ప్రాధాన్యం ఉంది. ముఖ్యంగా తక్కువ ధరలో మంచి పనితీరు, సరిపడే ఫీచర్లు, తక్కువ నిర్వహణ ఖర్చు కావాలనుకునే వినియోగదారులు ఈ సెగ్మెంట్ కార్లను ఎక్కువగా ఎంచుకుంటారు. నగరాల్లో రోజువారీ ప్రయాణాలకు అనువైన ఈ చిన్న కార్లు మొదటిసారి కారు కొనుగోలు చేసే వారికి కూడా మంచి ఎంపికగా నిలుస్తాయి. ఈ విభాగంలో ప్రముఖంగా చెప్పుకునే రెండు కార్లు టాటా టియాగో (Tata Tiago), హ్యూందాయ్ గ్రాండ్ ఐ10 నియోస్ (Hyundai Grand i10 Nios). భారత మార్కెట్లో సరసమైన ధరతో పాటు విశ్వసనీయత కలిగిన ఈ రెండు మోడళ్లు వినియోగదారుల నుంచి మంచి స్పందన పొందుతున్నాయి. ఈ రెండు కార్ల మధ్య తేడాల గురించి ఈ కింది కథణంలో చూద్దాం.

ధర: ధర పరంగా చూస్తే హ్యూందాయ్ గ్రాండ్ ఐ10 నియోస్ సుమారు రూ.5.55 లక్షల (ఎక్స్-షోరూమ్) నుండి ప్రారంభమవుతుంది. మరోవైపు టాటా టియాగో ధర సుమారు రూ.4.57 లక్షల (ఎక్స్-షోరూమ్) నుంచి మొదలవుతుంది. అంటే టియాగో ధర కొంచెం తక్కువగా ఉండటంతో బడ్జెట్‌లో కారు కొనాలనుకునే వారికి ఇది మరింత ఆకర్షణీయమైన ఎంపికగా మారుతుంది. అయితే ఈ రెండు కార్ల ప్రత్యేకతలు వేర్వేరుగా ఉంటాయి.

కొలతలు: టాటా టియాగో పొడవు సుమారు 3,767 mm కాగా, వీల్‌బేస్ 2,400 mm ఉంటుంది. ఈ పరిమాణాలు నగరాల్లో సులభంగా డ్రైవ్ చేయడానికి, పార్కింగ్‌కు అనుకూలంగా ఉంటాయి. మరోవైపు హ్యూందాయ్ గ్రాండ్ ఐ10 నియోస్ కొద్దిగా పెద్ద పరిమాణంతో వస్తుంది. దీని పొడవు సుమారు 3,815 mm కాగా, వీల్‌బేస్ 2,450 mm ఉంటుంది. ఈ అదనపు పరిమాణం కారణంగా కారులోని అంతర్గత స్థలం కొద్దిగా ఎక్కువగా ఉంటుంది.

ఇంజిన్-పనితీరు: ఈ రెండు హ్యాచ్‌బ్యాక్ కార్లు కూడా దాదాపు సమానమైన సామర్థ్యంతో వస్తాయి. నగర ప్రయాణాలను దృష్టిలో పెట్టుకుని ఇవి 1.2-లీటర్ పెట్రోల్ ఇంజన్‌లతో రూపొందించబడ్డాయి. గ్రాండ్ ఐ10 నియోస్‌లో 1.2-లీటర్ కప్పా పెట్రోల్ ఇంజన్ అందుబాటులో ఉంటుంది. ఈ ఇంజన్ గరిష్టంగా 83 PS పవర్, 113.8 Nm టార్క్‌ను ఉత్పత్తి చేస్తుంది. అదే సమయంలో ఈ కారులో CNG వేరియంట్ కూడా అందుబాటులో ఉంది.

ఇది 69 PS పవర్‌ను ఉత్పత్తి చేస్తుంది. మరోవైపు టాటా టియాగో 1.2-లీటర్ రెవోట్రాన్ 3-సిలిండర్ పెట్రోల్ ఇంజన్‌తో వస్తుంది. ఈ ఇంజన్ పెట్రోల్ వేరియంట్‌లో గరిష్టంగా 86 PS శక్తి, 113 Nm టార్క్‌ను ఉత్పత్తి చేస్తుంది. టియాగోలో కూడా CNG ఆప్షన్ అందుబాటులో ఉండటం వినియోగదారులకు మరో ప్రయోజనం. CNG వెర్షన్‌లో ఈ ఇంజన్ సుమారు 74 PS పవర్‌ను అందిస్తుంది.

మైలేజ్: భారతీయ వినియోగదారులు కారు కొనుగోలు చేసే సమయంలో ఎక్కువగా దృష్టి పెట్టే అంశాల్లో ఇంధన సామర్థ్యం ఒకటి. గ్రాండ్ ఐ10 నియోస్‌ పెట్రోల్ వేరియంట్ 16 నుంచి 18 కి.మీ/లీటర్ మైలేజ్ ఇస్తుంది. CNG వెర్షన్ 27 కి.మీ/కిలో వరకు మైలేజ్ ఇస్తుంది. టియాగో పెట్రోల్ వేరియంట్ సుమారు 19 కి.మీ/లీటర్ వరకు అందిస్తుంది. అలాగే CNG వెర్షన్ 28 కి.మీ/కిలో వరకు మైలేజ్ ఇవ్వగలదని చెప్పబడుతోంది.

సేఫ్టీ: భద్రతలో టియాగో కొంత ముందంజలో ఉంది. ఇది Global NCAP నుండి 4-స్టార్ భద్రతా రేటింగ్‌ను పొందింది. డ్యూయల్ ఎయిర్‌బ్యాగులు, EBDతో కూడిన ABS, కార్నర్ స్టెబిలిటీ కంట్రోల్, రియర్ పార్కింగ్ సెన్సార్‌ల వంటి ఫీచర్లతో వస్తుంది. Grand i10 Niosలో ఆరు ఎయిర్‌బ్యాగులు అందుబాటులో ఉండటం ఈ కారుకు ముఖ్యమైన బలంగా చెప్పుకోవచ్చు. అలాగే ABS, ఎలక్ట్రానిక్ స్టెబిలిటీ కంట్రోల్ వంటి ఫీచర్లు ఉన్నాయి.