రోడ్డు మీద పోతుంటే సింహంలా ఉంటుంది..పొలిటీషియన్లు ఇది లేనిదే అడుగు బయటపెట్టరు.. ఇక మీద కష్టమే

భారతదేశంలో ఇన్నోవా అంటే కేవలం ఒక కారు మాత్రమే కాదు, అది ఒక ఎమోషన్. 8 నుంచి 9 మంది ప్రయాణికులు ఎంతో విలాసవంతంగా ప్రయాణించగలిగే ఈ టయోటా ఇన్నోవా క్రిస్టా (Toyota Innova Crysta) గురించి ప్రస్తుతం సోషల్ మీడియాలో, ఆటోమొబైల్ వర్గాల్లో ఒక ఆసక్తికరమైన చర్చ సాగుతోంది. ఈ లెజెండరీ డీజిల్ ఎమ్‌పివి ఉత్పత్తిని మార్చి 2027 నాటికి టయోటా నిలిపివేసే అవకాశం ఉందని తాజా రిపోర్టులు సూచిస్తున్నాయి. దాదాపు రెండు దశాబ్దాల పాటు భారత రోడ్లపై రారాజుగా వెలుగొందిన ఇన్నోవా ప్రయాణంలో ఇది ఒక కీలక మలుపు కానుంది.

టయోటా ఇప్పటికే అధునాతన హైక్రాస్ (Hycross) మోడల్‌ను అందుబాటులోకి తెచ్చినప్పటికీ, డీజిల్ ఇంజిన్, లాడర్-ఫ్రేమ్ ఛాసిస్ కోసం ఉన్న డిమాండ్ కారణంగా క్రిస్టాను కొనసాగిస్తూ వస్తోంది. అయితే, రాబోయే కఠినమైన పర్యావరణ నిబంధనలు (CAFE 3 Norms) ఈ భారీ డీజిల్ కారుకు అడ్డంకిగా మారనున్నాయి. గాలిలోకి కార్బన్ డై ఆక్సైడ్ విడుదల తగ్గించాలనే లక్ష్యంతో ప్రభుత్వం తీసుకువస్తున్న కొత్త నిబంధనల వల్ల, హైబ్రిడ్, ఎలక్ట్రిక్ వాహనాలపై కంపెనీలు దృష్టి సారించక తప్పడం లేదు. అందుకే టయోటా తన హైబ్రిడ్ పోర్ట్‌ఫోలియోను పెంచి, డీజిల్ క్రిస్టాను పక్కన పెట్టాలని భావిస్తోంది.

చాలా మంది కస్టమర్లు ప్రస్తుతం గందరగోళంలో ఉన్నారు "2027లో ఆగిపోయే కారును ఇప్పుడు కొనవచ్చా?" అని. వాస్తవానికి, ఆటోమొబైల్ నిపుణుల అభిప్రాయం ప్రకారం, ఇన్నోవా క్రిస్టాను కొనడానికి ఇదే సరైన సమయం. ఎందుకంటే, ఇన్నోవా కార్లకు ఉండే రీసేల్ వాల్యూ (Resale Value) మరే కారుకు ఉండదు. మీరు ఈరోజు కొత్త క్రిస్టాను కొని ఐదేళ్ల తర్వాత అమ్మినా, మార్కెట్లో దానికి విపరీతమైన డిమాండ్ ఉంటుంది. పైగా, టయోటా ఇంజిన్ల విశ్వసనీయత గురించి ప్రత్యేకంగా చెప్పక్కర్లేదు. ఇవి లక్షల కిలోమీటర్లు తిరిగినా చెక్కుచెదరవు.

సాంకేతికంగా చూస్తే , క్రిస్టాలోని 2.4 లీటర్ టర్బో డీజిల్ ఇంజిన్ దాదాపు 148 హెచ్‌పి పవర్, 343 ఎన్ఎమ్ టార్క్‌ను ఉత్పత్తి చేస్తుంది. ప్రస్తుతం ఇది కేవలం 5-స్పీడ్ మాన్యువల్ గేర్‌బాక్స్‌తో మాత్రమే లభిస్తోంది. హైక్రాస్ మోనోకాక్ ప్లాట్‌ఫామ్‌పై నిర్మించబడితే, క్రిస్టా ఇప్పటికీ ధృడమైన లాడర్-ఫ్రేమ్ ఛాసిస్‌పై నడుస్తుంది. ఇది ఎక్కువ బరువును మోయడానికి, గుంతల రోడ్లపై ప్రయాణించడానికి ఎంతో అనుకూలం. దీని మెయింటెనెన్స్ కూడా ఇతర కార్లతో పోలిస్తే చాలా తక్కువ.

ఒకవేళ ఉత్పత్తి నిలిపివేసినా, స్పేర్ పార్ట్స్ గురించి ఆందోళన చెందాల్సిన పని లేదు. ఎందుకంటే క్రిస్టాలో వాడే ఇంజిన్, బాడీ పార్ట్స్ ఇతర టయోటా వాహనా ల్లోనూ (ఉదాహరణకు హిలక్స్) వాడతారు కాబట్టి, మరో 15-20 ఏళ్ల వరకు సర్వీస్ సమస్య ఉండదు. ముగింపుగా చెప్పాలంటే, రేపు సెకండ్ హ్యాండ్ మార్కెట్లో లక్షల రూపాయలు అదనంగా పోసి కొనేకంటే, ఇప్పుడు కొత్తది కొనుగోలు చేయడం బుద్ధిమంతుడి లక్షణం. డీజిల్ పవర్, రాజసం ఉట్టిపడే లుక్, తిరుగులేని సెక్యూరిటీ కోరుకునే వారికి క్రిస్టా ఎప్పటికీ కింగే!