రూ.5 లక్షలోపు ధర.. 33 కిమీ మైలేజ్.. మార్కెట్‎ను షేక్ చేస్తున్న టాప్ 10 కార్లు ఇవే

భారత ఆటోమొబైల్ మార్కెట్లో ఎప్పటికప్పుడు కొత్త కొత్త ఎస్‌యూవీ (SUV) కార్లు వస్తున్నప్పటికీ, మధ్యతరగతి ప్రజలకు ఎంతగానో నచ్చే హ్యాచ్‌బ్యాక్ (Hatchback) కార్ల క్రేజ్ మాత్రం అస్సలు తగ్గడం లేదు. గత నెల అంటే ఏప్రిల్, 2026 నెలలో జరిగిన కార్ల అమ్మకాలను చూస్తే ఈ విషయం మరోసారి స్పష్టమైంది. తక్కువ ధర, ఎక్కువ మైలేజ్ ఇచ్చే కార్లకు మనవాళ్లు ఎంతగా బ్రహ్మరథం పడతారో సేల్స్ రిపోర్ట్ చెప్తోంది.

మళ్లీ నంబర్-1 స్థానంలో నిలిచిన వ్యాగన్ ఆర్
మారుతి సుజుకి చెందిన ఎవర్ గ్రీన్ మోడల్ మారుతి సుజుకి వ్యాగన్ ఆర్ (Maruti Suzuki WagonR) హ్యాచ్‌బ్యాక్ సెగ్మెంట్‌లో మరోసారి నంబర్-1 స్థానాన్ని కైవసం చేసుకుంది. ఏప్రిల్, 2026 నెలలో ఈ కారును ఏకంగా 18,648 మంది కొత్త కస్టమర్లు కొనుగోలు చేశారు. గతేడాది ఏప్రిల్ (2025) లో జరిగిన 13,413 యూనిట్ల అమ్మకాలతో పోలిస్తే.. ఈసారి వ్యాగన్ ఆర్ అమ్మకాలు ఏకంగా 39.03 శాతం మేర పెరగడం విశేషం.

రెండు, మూడు స్థానాల్లో నిలిచిన బలెనో, స్విఫ్ట్
ఈ అమ్మకాల లిస్ట్‌లో ప్రీమియం హ్యాచ్‌బ్యాక్ కారు మారుతి సుజుకి బలెనో 18,306 యూనిట్ల అమ్మకాలతో రెండో స్థానంలో నిలిచింది. గతేడాదితో పోలిస్తే బలెనో 38.89 శాతం వృద్ధిని నమోదు చేసింది. ఇక ఎప్పుడూ ట్రెండింగ్‌లో ఉండే 'మారుతి సుజుకి స్విఫ్ట్' 17,829 యూనిట్ల సేల్స్‌తో మూడో స్థానాన్ని దక్కించుకుంది. స్విఫ్ట్ కారు అమ్మకాలు కూడా ఏడాది ప్రాతిపదికన 22.18 శాతం పెరిగాయి.

టాప్-5 లో చోటు దక్కించుకున్న ఆల్టో, హ్యుందాయ్ i20
బడ్జెట్ కార్లలో రారాజైన మారుతి ఆల్టో 93.65 శాతం భారీ వార్షిక వృద్ధితో 10,856 యూనిట్లు అమ్ముడై నాల్గో స్థానంలో నిలిచింది. అలాగే, స్టైలిష్ లుక్‌తో ఆకట్టుకునే హ్యుందాయ్ i20 కారు 59.55 శాతం పెరిగిన అమ్మకాలతో మొత్తంగా 5,624 యూనిట్లు అమ్ముడై ఐదో స్థానాన్ని సొంతం చేసుకుంది.

టాటా టియాగోకు ఎదురుదెబ్బ.. ఎస్-ప్రెస్సో సరికొత్త రికార్డు
సురక్షితమైన కార్లకు కేరాఫ్ అడ్రస్ అయిన టాటా మోటార్స్ వారి టాటా టియాగో అమ్మకాలు ఈసారి నిరాశపరిచాయి. ఏకంగా 33.70 శాతం క్షీణతతో కేవలం 5,488 యూనిట్ల అమ్మకాలతో టియాగో ఆరో స్థానానికి పడిపోయింది. అయితే, మారుతి ఎస్-ప్రెస్సో (S-Presso) మాత్రం ఊహించని విధంగా 617.63 శాతం రికార్డు స్థాయి వార్షిక వృద్ధితో 5,210 యూనిట్లు అమ్ముడై ఏడో స్థానంలో నిలిచింది.

చివరి మూడు స్థానాల్లో నిలిచిన నియోస్, గ్లాంజా, ఆల్ట్రోజ్
ఈ సేల్స్ లిస్ట్‌లో ఎనిమిదో స్థానంలో హ్యుందాయ్ i10 నియోస్ (4,149 యూనిట్లు) నిలిచింది. టయోటా కంపెనీకి చెందిన టయోటా గ్లాంజా కారు అమ్మకాలు 18.68 శాతం తగ్గి 3,360 యూనిట్లతో తొమ్మిదో స్థానానికి పరిమితమైంది. ఇక చివరిగా పదో స్థానంలో టాటా ఆల్ట్రోజ్ ప్రీమియం కారు 19.06 శాతం వృద్ధితో 2,586 యూనిట్ల అమ్మకాలను నమోదు చేసింది.

ఇంతకీ వ్యాగన్ ఆర్ సక్సెస్ సీక్రెట్ ఏంటి?
మారుతి వ్యాగన్ ఆర్ కారు ఇంతలా అమ్ముడుపోవడానికి కారణం దాని ధర, నమ్మశక్యం కాని మైలేజ్. ఈ కారు 1.0-లీటర్, 1.2-లీటర్ కే-సిరీస్ ఇంజన్ ఆప్షన్లతో, 5-స్పీడ్ మాన్యువల్, ఆటోమేటిక్ గేర్‌బాక్స్‌లతో లభిస్తుంది.

పెట్రోల్ వేరియంట్లలో లీటరుకు 23.56 నుంచి 25.19 కిలోమీటర్ల మైలేజ్ ఇస్తుండగా.. సీఎన్‌జీ (CNG) వేరియంట్లో కేజీకి ఏకంగా 33.47 కిలోమీటర్ల మైలేజ్ ఇస్తుంది. ఇండియన్ మార్కెట్లో ఈ కారు ఎక్స్-షోరూమ్ ప్రారంభ ధర కేవలం రూ. 4.99 లక్షలుగా ఉంది. టాప్ వేరియంట్ ధర రూ.7.45 లక్షల వరకు ఉంటుంది.